وليمپيادا قالاشىعىنا ورنالاسقان سپورتشىلار, جاتتىقتىرۋشىلار, دەلەگاتسيا مۇشەلەرى جانە بۇقارالىق اقپارات قۇرالدارىنىڭ وكىلدەرى جەرگىلىكتى حالىقپەن جۇزدەسۋ تۇرماق, بەلگىلەنگەن ايماقتان سىرتقا اتتاپ باسا المايدى. سپورت جارىسى قىتايدا ءوتىپ جاتىر دەمەسەڭىز, ونىڭ قىتاي كورەرمەنى مەن جانكۇيەرلەرىنە تىكەلەي قاتىسى جوق كورىنەدى. مۇنى بەيجىڭگە بارىپ ورنالاسقان قوناقتىڭ بارلىعى بىردەي ايتىپ جاتىر. قوناق ءۇي مەن سپورت نىساندارى قورشاۋلى جانە كۇنى-ءتۇنى كۇزەتىلەدى. ۇيىمداستىرۋشىلار ىندەتتىڭ تارالۋىن بولدىرماۋ ءۇشىن وسىنداي شارالار قولعا الىنعانىن ايتادى.
شەتەلدىك مەديا باسىلىمدار بۇل كورىنىستى قىتايدىڭ «قىسقى وليمپيادا شارى» دەپ اتاپ كەتتى. بۇل – سىرتتان نە ىشتەن ەشكىمگە كىرۋگە رۇقسات جوق قولدان جاسالعان شار دەگەندەرى. بەيجىڭدەگى 2022 جىلعى ويىندار حالىقارالىق سپورت ءىس-شارالارىنىڭ ىشىندەگى باقىلاۋ دەڭگەيى ەڭ جوعارى جارىس بولىپ ەستە قالاتىن سەكىلدى. جالپى, كوروناۆيرۋس پاندەمياسىندا وليمپيادا وتكىزۋگە بولاتىنىنا بىلتىر جاپونيادا كوز جەتكىزدىك. قىتاي وزىنە جۇكتەلگەن مىندەتكە اسا تىڭعىلىقتى دايىندىقپەن كەلگەنگە ۇقسايدى.
ويىنعا قاتىسى بار سپورتشىلار, كوماندالاردىڭ رەسمي تۇلعالارى, باق, ەرىكتىلەر مەن باسقالاردى قوسا العاندا بارلىعى 60 مىڭعا جۋىق ادام جۇمىلدىرىلعان. بۇل جانداردىڭ الداعى اپتالارداعى كۇندەلىكتى ارەكەتى كوروناۆيرۋسقا تەكسەرىلۋمەن باستالادى. وتكەن ايدان باستاپ ەلگە كەلە باستاعانداردىڭ اراسىنان 300-گە جۋىق ادامنان ۆيرۋس انىقتالعان. ولاردىڭ كەلەسى تەست ناتيجەلەرى تەرىس بولماي, ويىنعا قوسىلا المايدى. نىساندارداعى ءجيى دەزينفەكتسيا سەكىلدى ساقتىق شارالارى دا مۇنداي دايىندىققا قانشالىقتى ماڭىز بەرىلگەنىن كورسەتەتىندەي. اسحاناداعى تاعام تاسيتىن, ەدەن جۋاتىن روبوتتار دا جۇمىسىنا ادال. وليمپياداعا جەتكەن جۋرناليستەر مەن قوناقتاردىڭ العاشقى اسەرى وسىنداي.
قىتايداعى وليمپيا ويىندارىنىڭ ساياسي سيپاتىنا كەلەر بولساق, الەمدەگى الپاۋىت ەلدەردىڭ سوڭعى جىلدارداعى قارىم-قاتىناسى كۇردەلى ەكەندىگى بەلگىلى. اقش پەن قىتاي, اقش پەن رەسەي تەكەتىرەسىن بۇكىل الەم باقىلاپ وتىر. وليمپيادانىڭ ساياسيلانباۋى تۋرالى قانشا ايتىلعانىمەن, بۇل مۇمكىن بولماي تۇر. ماسەلەن, اقش قىتايعا ديپلوماتيالىق بايكوت جاريالاپ, ويىنعا ءوز وكىلىن جىبەرمەيتىنىن مالىمدەدى.
جاقىندا قىتايدىڭ سىرتقى ىستەر ءمينيسترى ويىننىڭ اشىلۋ سالتاناتىنا كەلەتىن تۇلعالاردىڭ ءتىزىمىن جاريالادى. حابارلامادا بەيجىڭدەگى قىسقى وليمپيا ويىندارىنىڭ اشىلۋىنا 30-دان استام مەملەكەت, ۇكىمەت جانە حالىقارالىق ۇيىم باسشىلارىنىڭ قاتىساتىنى ايتىلعان. شاقىرىلعان جوعارى لاۋازىمدى تۇلعالار تىزىمىندە رەسەي پرەزيدەنتى ۆلاديمير پۋتين, مىسىر پرەزيدەنتى ابدەل فاتتاح ءاس-سيسي, ساۋد ارابياسى كورولدىگىنىڭ تاق مۇراگەرى حانزادا مۇحاممەد بەن سالمان, قاتار ءامىرى شەيح تاميم بەن حاماد ءال تاني, ابۋ-ءدابيدىڭ تاق مۇراگەرى شەيح مۇحاممەد بەن زايد ءال ناحايان جانە پاكىستان پرەمەر-ءمينيسترى يمران حان بار.
سونداي-اق ورتالىق ازيا ەلدەرى – قازاقستان, قىرعىزستان, تاجىكستان, تۇرىكمەنستان مەن وزبەكستان باسشىلارى دا وليمپيادا قوناقتارى بولادى. اقوردا قازاقستان پرەزيدەنتى قاسىم-جومارت توقاەۆتىڭ قحر توراعاسى سي ءتسزينپيننىڭ شاقىرۋىمەن XXIV قىسقى وليمپيا ويىندارىنىڭ اشىلۋ سالتاناتىنا قاتىسۋ ءۇشىن بەيجىڭ قالاسىنا جۇمىس ساپارىمەن باراتىنىن حابارلادى.
ودان بولەك پولشا, سەربيا, سينگاپۋر, ارگەنتينا, ەكۆادور جانە موڭعوليا پرەزيدەنتتەرى دە بەيجىڭدە بولادى. حالىقارالىق ۇيىمداردان قوناقتار قاتارىندا بۇۇ باس حاتشىسى انتونيو گۋتەرريش, بۇۇ باس اسسامبلەياسىنىڭ توراعاسى ابدۋللا شاحيد جانە دۇنيەجۇزىلىك دەنساۋلىق ساقتاۋ ۇيىمىنىڭ باسشىسى تەدروس ادحانوم گەبرەيەسۋس بار.
اقش-پەن قوسا اۋستراليا, بەلگيا, كانادا, دانيا, ەستونيا, گەرمانيا, جاپونيا, ليتۆا مەن ۇلىبريتانيا باسشىلارى دا قىتايدا ادام قۇقىعى شەكتەلدى دەلىنگەن ايىپقا بايلانىستى ءوز وكىلدەرىن جىبەرمەيتىنىن مالىمدەگەن. وسىلايشا, الەم ەلدەرىنىڭ كوشباسشىلارى ويىندى ساياسيلاندىرعانعا ۇقسايدى. جاقىن كۇندەرى سي تسزينپين مەن ۆلاديمير پۋتين كەزدەسۋىنىڭ ماڭىزى سپورت جارىستارىنان كەم تۇسپەيىن دەپ تۇر.
