«مەملەكەت باسشىسى عىلىم مەن ءبىلىمدى دامىتۋ ءۇشىن بارلىق جاعدايدى جاسادى. ينستيتۋت, ۋنيۆەرسيتەتتەر مەكتەپتەرمەن, وقۋشىلار سارايلارىمەن تىعىز جۇمىس ىستەۋى كەرەك. بىزدە وسى سالا اقساپ تۇر. ول تەك كاسىبي باعىتتاعى جۇمىس ەمەس, ءارتۇرلى عىلىم جارىستار, وليمپيادالار ۇيىمداستىرۋ. الماتى قالاسىنداعى قاي مەكتەپتى الساق تا, عىلىمي ينستيتۋتتار, ۋنيۆەرسيتەت ماماندارىمەن بىرلەسە جۇمىس ىستەۋگە قۋانا كەلىسەدى. ينستيتۋتتارعا مەكتەپتەرمەن بىرلەسە جۇمىس ىستەۋدى تاپسىرامىن. ءبىز پرەزيدەنت تاپسىرمالارىن ساپالى, ءارى, تىڭعىلىقتى ۇيىمداستىرۋ كەرەكپىز. ءبىزدىڭ عىلىمي الەۋەتىمىز جوعارى. ستاندارتتارعا ساي كەلمەيتىن جوو-لاردى جاۋىپ جاتىرمىز», دەدى مينيستر.
بۇدان بولەك بىرلەسە مامان دايىنداۋ ءۇشىن عىلىمي-زەرتتەۋ ينستيتۋتتارىنىڭ زەرتحانالارى ماگيسترانتتار مەن دوكتورانتتارعا, ال وقۋ ورىندارىنىڭ زەرتحانالارى ينستيتۋت قىزمەتكەرلەرىنە قولجەتىمدى بولادى. ولار ۇلتتىق يادرولىق ورتالىق, يادرولىق فيزيكا ينستيتۋتى, ۇلتتىق بيوتەحنولوگيا ورتالىعى, بيولوگيالىق قاۋىپسىزدىك ينستيتۋتى جانە تاعى دا باسقا تەڭدەسسىز عىلىمي زەرتحانالاردا جۇمىس ىستەپ, تاعىلىمدامادان وتە الادى.
سونداي-اق جوعارى وقۋ ورىندارى مەن عىلىمي-زەرتتەۋ ينستيتۋتتارىنىڭ قىزمەتكەرلەرىنەن جاساقتالعان جۇزدەن اسا ديسسەرتاتسيالىق كەڭەس اشىلادى. وسىعان دەيىن عىلىمي-زەرتتەۋ ينستيتۋتتارىنىڭ عالىمدارى ديسسەرتاتسيالىق كەڭەستەردىڭ جۇمىسىنا قاجەتتى دەڭگەيدە جۇمىلدىرىلماعان بولاتىن.
ءمينيستردىڭ سوزىنشە, قابىلدانعان شارالار عىلىمي زەرتتەۋ ساپاسى مەن عىلىمي كادرلاردى دايىنداۋدىڭ تيىمدىلىگىن ارتتىرىپ, عىلىمعا تالانتتى جاستاردى تارتۋعا وڭ ىقپال ەتەدى.
