ەل پرەزيدەنتىنىڭ ايتۋىنشا, قاڭتارداعى قاسىرەت – بىرنەشە جىل بويى الدىن الا ويلاستىرىلعان ز ۇلىمدىقتىڭ كورىنىسى. «مۇنىڭ قاتارىندا جامبىل وبلىسىندا بولعان تارتىپسىزدىكتەر, ەتنوسارالىق سيپاتتاعى ارانداتۋشىلىقتار مەن باسقا دا شيەلەنىستەر بار. قوعامىمىزدىڭ تۇتاستىعىن جۇيەلى تۇردە, سونىڭ ىشىندە نارازىلىقتار مەن كاسىبي تۇردە ازىرلەنگەن ستسەناريلەردى قولدانۋ ارقىلى شايقالتىپ كەلگەن. راديكالدى شارالاردىڭ ناقتى ورىنداۋشىلارىن دايىنداۋ جاسىرىن تۇردە جۇرگىزىلگەن. ۇلتتىق قاۋىپسىزدىك كوميتەتى ۋاكىلەتتى ورگان رەتىندە وسى بۇلدىرگى جۇمىستارعا ناقتى باعا بەرە المادى جانە بەرگىسى دە كەلمەدى. ۇلتتىق قاۋىپسىزدىككە تونگەن اسا ۇلكەن قاۋىپتى كورمەدى», دەدى قاسىم-جومارت توقاەۆ.
مەملەكەت باسشىسى قاڭتارداعى قاسىرەتتىڭ قايتالانۋىنا جول بەرمەۋ ماقساتىندا الداعى ۋاقىتتا اتقارىلاتىن ماڭىزدى جۇمىس باعىتتارىنىڭ ءبىرى – ءدىني ەكسترەميزمگە قارسى كۇرەستە جۇيەلى ءىس-شارالار كەشەنىن ىسكە اسىرۋ ەكەنىن اتاپ كورسەتتى. ويتكەنى الماتى قالاسى مەن كەيبىر وڭىرلەردە قولدارىنا قارۋ الىپ, بيلىك ورگاندارىن شابۋىلداعاندار, بەيبىت تۇرعىنداردى قورقىتىپ, ء«تىرى قالقان» ەتىپ ۇستاعانداردىڭ ىشىندە دەسترۋكتيۆتى ءدىني اعىمنىڭ وكىلدەرى بار ەكەنى اشكەرەلەنىپ وتىر.
بۇدان بىرنەشە جىل بۇرىن اقتوبە, تاراز, الماتى قالالارىندا بولعان قاندى تەرروريستىك قىلمىستار دا وسىنداي جات اعىمعا ەرگەن جاستاردىڭ قولدارىمەن جاسالعانى بەلگىلى. وكىنىشكە قاراي, مەملەكەت باسشىسى ايتقانداي, ەلىمىزدىڭ ۇلتتىق قاۋىپسىزدىك ورگاندارى تاراپىنان سول قىلمىستاردىڭ شىعۋ سەبەپتەرى جان-جاقتى زەرتتەلىپ, ولاردى الداعى ۋاقىتتا بولدىرماۋدىڭ پارمەندى شارالارى قابىلدانباعانى انىق. قاڭتارداعى قاسىرەت – سونىڭ ايعاعى.
شىندىعىندا, مۇددەلى مەملەكەتتىك ورگاندار مىقتاپ قولعا السا, ءدىن سالاسىنداعى كوكەيكەستى ماسەلەلەردى وڭىنان شەشۋگە بولاتىنىن ءومىر تاجىريبەسى كورسەتكەن. ماسەلەن, وسىدان ون بەس جىلداي بۇرىن ەلىمىزگە سىرتتان كىرگىزىلگەن ءبىر دەسترۋكتيۆتى ءدىني اعىمدى ۋاعىزداۋشىلار توبى انىقتالىپ, ولار قولدانىستاعى زاڭناماعا سايكەس جاۋاپقا تارتىلدى, قايسىبىرى ءتىپتى ەلدەن الاستاتىلعان. سودان كەيىن ول اعىمنىڭ ءورىسى تارىلىپ, بۇگىندە ۇمىتىلۋعا اينالعانداي. سول كەزدە حالقىمىزدى يسلام ءدىنىنىڭ اتا-بابامىز ۇستانعان, ەجەلگى سالت-داستۇرلەرىمىزبەن ۇيلەسكەن حانافي مازحابى اياسىنا توپتاستىرۋ حاقىندا كەڭىنەن ۇگىت-ناسيحات جۇرگىزىلگەندىگىن ايتقان ءجون. الايدا كەيىنگى جىلدارى وسى باعىتتاعى ءتۇسىندىرۋ جۇمىستارى الدەبىر سەبەپتەرمەن السىرەپ كەتكەن ءتارىزدى.
قازىر الەۋمەتتىك جەلىلەردە: «ساقالدى سودىرلار اناۋ ءدىني اعىمنىڭ وكىلدەرى ەكەن. سوندىقتان ونداي ءدىني اعىمعا زاڭ بويىنشا تىيىم سالۋ كەرەك» دەگەن ماعىناداعى پىكىرلەر ايتىلىپ ءجۇر. ال كەيبىر بۇقارالىق اقپارات قۇرالدارى قاڭتارداعى قانتوگىس كەزىندە قولعا تۇسكەن بۇزاقىلاردىڭ ىشىندە قازاقستاندا ەكسترەميستىك ۇيىمدار قاتارىنا جاتقىزىلعان «تابليعي جاماعاتتىڭ» ءبىر قاناتى – «ياكىن ينكار» راديكالدى ۇيىمىنىڭ جاقتاستارى بولعاندىعىن حابارلادى.
ارينە, بەيبىت شەرۋلەردىڭ بۇلدىرگىشتىك سيپات الىپ كەتۋىنە كىنالى سودىرلاردىڭ ناقتى قانداي ءدىني اعىمنىڭ وكىلدەرى ەكەنىن جەتە انىقتاپ بارىپ قانا ءادىل شەشىم قابىلداۋ كەرەك. بىراق ءبىر نارسەنىڭ باسى اشىق – شولاق بالاقتى, شوقشا ساقالدى جاستار دا – ءوز باۋىرلارىمىز. كوبى – ەكى بۇيىردەن قىسقان جوقشىلىقتىڭ سالدارىنان ازعىنداۋعا ەرىپ, اداسقان جاندار سياقتى. ەندى ولاردى كەۋدەلەرىنەن كەرى يتەرمەي, ءتۇزۋ جولعا ءتۇسىرۋدىڭ امالىن ىزدەگەنىمىز ابزال. سونىمەن قاتار جاستارىمىزدى جات اعىمعا كىرگىزىپ, ارانداتقانداردىڭ كىمدەر ەكەنىن دە اشكەرەلەپ, ايىلدارىن جيعىزۋ قاجەتتىگى دە داۋسىز. ءدىنىمىزدىڭ تۇتاستىعىنا, ۇلتىمىزدىڭ بىرلىگىنە تونگەن ەلەۋلى قاۋىپتى ەسكەرمەسكە بولمايدى.
