قازىرگى تاڭدا قازاقستاندىق فۋتبولشىلاردىڭ الدى يسپانيا, بەلگيا, پولشا سەكىلدى ەلدەردىڭ نەگىزگى بىرىنشىلىكتەرىندە بولماسا دا, ەكىنشى, ءۇشىنشى دەڭگەيلى ليگالارىندا ونەر كورسەتىپ ءجۇر. سونىمەن قاتار كەيىنگى جىلدارى سولتۇستىكتەگى كورشىلەرىمىزدىڭ كلۋبتارى دا ءبىزدىڭ جىگىتتەرگە ءجيى «قۇدا تۇسە» باستادى. سەبەبى قازاقستاندىق فۋتبولشىلار رەسەيدە لەگيونەر بولىپ سانالمايدى. بۇگىندە رەسەي بىرىنشىلىگىندە ءۇش جەرلەسىمىز باق سىناپ ءجۇر. ولار: تارازدىق باقتيەر زاينۋتدينوۆ (تسسكا, ماسكەۋ), قوستانايلىق مارات بىستروۆ («احمات», گروزنىي) جانە تالدىقورعاندىق الەكسەي ششەتكين («روتور», ۆولگوگراد).
بىلتىر بۇل ويىنشىلاردىڭ قاتارى بۇدان الدەقايدا كوپ بولاتىن. وكىنىشكە قاراي, بىرنەشە جەرلەسىمىز رەسەي چەمپيوناتىندا لايىقتى ويناي الماي, ەل چەمپيوناتىنا قايتا ورالدى. اتاپ ايتار بولساق, قورعاۋشىلار دميتري شومكو مەن يۋري لوگۆينەنكو, جارتىلاي قورعاۋشىلار يسلامبەك قۋات, رومان مۋرتازاەۆ, شابۋىلشىلار ابات ايىمبەتوۆ, ارمان كەڭەسوۆ ءوز مۇمكىندىكتەرىن كورسەتە المادى.
جۋىق ارادا جوعارىداعى ءۇش جەرلەسىمىزدىڭ قاتارىن ماڭعىستاۋلىق ءنۇرالى ءالىپ تولىقتىرىپ قالۋى ابدەن مۇمكىن. قازاقستان ۇلتتىق قۇراماسى مەن الماتىلىق «قايراتتىڭ» قورعاۋشىسى بۇل كۇندەرى دۋبايدا سانكت-پەتەربۋرگتىڭ «زەنيتىندە» قارالىمدا ءجۇر. 14 قاڭتاردا باستالعان رەسەي چەمپيوندارىنىڭ وقۋ-جاتتىعۋ جيىنى 25 قاڭتاردا اياقتالدى. ەكى اپتاعا جۋىق جيىننىڭ ناتيجەسىندە ن.ءالىپ «زەنيت» ساپىندا ەكىنشى جاتتىعۋ جيىنىنا بارادى.
– ءبىز ءالىپتى كوپتەن بەرى باقىلاپ ءجۇرمىز. ول – جاس ويىنشى. تولقۇجات جاعىنان دا ول رەسەي چەمپيوناتىندا لەگيونەر بولىپ ەسەپتەلمەيدى. قازىرگى تاڭدا ءبىزدىڭ كلۋبتا ءۇش ورتالىق قورعاۋشى بار. ءنۇرالىنىڭ كەلۋىمەن كلۋبتىڭ قورعانىس شەبىندە باسەكەلەستىك پايدا بولادى. ەگەر ءالىپ ءوزىنىڭ جاقسى قورعاۋشى ەكەنىن دالەلدەي السا, ونى كوماندادا قالدىرامىز. جالپى ءنۇرالىنىڭ «زەنيتتە» قالۋ-قالماۋى وزىنە بايلانىستى, – دەيدى «زەنيتتىڭ» باس باپكەرى سەرگەي سەماك.
وسى جەردە وقىرماندار اراسىندا ءنۇرالى ءالىپ دەگەن كىم, ول قايدان كەلگەن فۋتبولشى دەگەن ساۋال تۋىنداۋى مۇمكىن. وقىرماندارعا تۇسىنىكتى بولۋ ءۇشىن ايتا كەتسەك, ءنۇرالى 1999 جىلدىڭ 22 جەلتوقسانىندا اقتاۋ قالاسىندا دۇنيەگە كەلگەن. 2008 جىلى جەرگىلىكتى «كاسپي» كلۋبىنىڭ بالالار اكادەمياسىنا قابىلدانىپ, فۋتبولدىڭ قىر-سىرىنا قانىعا باستادى. ال 2015 جىلى ن.ءالىپ الماتىنىڭ «قايرات» كلۋبىنىڭ اكادەمياسىنا وقۋعا ءتۇسىپ, فۋتبولشى رەتىندە شەبەرلىگىن ودان ءارى شىڭداي ءتۇستى. سول ۋاقىت ارالىعىندا ول «قايراتتىڭ» جاستار كومانداسىمەن بىرگە بىرقاتار ءىرى جەتىستىككە قول جەتكىزىپ, ساۋاتتى ويىنىنىڭ ارقاسىندا نەگىزگى قۇرام باپكەرلەرىنىڭ نازارىن وزىنە اۋداردى. ورتالىق قورعاۋشى پوزيتسياسىندا وينايتىن ول 2018 جىلدىڭ 11 ناۋرىزىندا پرەمەر-ليگاداعى دەبيۋتىن وتكىزسە, اراعا بىرنەشە كۇن سالىپ قازاقستان ۇلتتىق قۇراماسىنىڭ جەيدەسىن كيۋگە لايىق فۋتبولشى ەكەنىن دالەلدەدى. سول ۋاقىتتان بەرى ول «قايراتتىڭ» دا, ۇلتتىق قۇرامانىڭ دا نەگىزگى قورعاۋشىسىنا اينالىپ ۇلگەردى.
قازاقستاندىق سپورت ءجۋرناليسى بەك تولەۋوۆ «زەنيتتىڭ» ءنۇرالىنى وقۋ-جاتتىعۋ جيىنىنا شاقىرعانىنا تاڭقالعانىن جانە ول كلۋبپەن كەلىسىمشارت جاساسقاننىڭ وزىندە باسقا كلۋبقا جالعا بەرىلۋى مۇمكىن ەكەنىن ايتادى.
– ءنۇرالىنىڭ «زەنيتپەن» بىرگە دۋبايعا اتتانعانى مەنى ازداپ تاڭداندىردى. سەبەبى ول «قايرات» چەمپيون اتانعان 2020 جىلمەن سالىستىرعاندا بىلتىر جوعارى دەڭگەيلى ويىن كورسەتە العان جوق. بۇل جەردە كلۋب قوجايىنى قايرات بورانباەۆتىڭ بايلانىسى سەبەپ بولىپ وتىرعانى تۇسىنىكتى. باۋىرجان يسلامحاندى دا «زەنيت» سىناقتان وتكىزگەنىن بىلەمىز. ءنۇرالىنىڭ باۋىرجانمەن سالىستىرعاندا ءبىر عانا ارتىقشىلىعى بار. ياعني ول ءالى جاس. سوندىقتان «زەنيت» بولاشاقتى ويلاپ, ونى كلۋبتا الىپ قالۋى مۇمكىن. سودان سوڭ رەسەيدىڭ ورتاڭقول كوماندالارىنىڭ بىرىنە جالعا بەرۋى دە عاجاپ ەمەس. مىسالى, «كرىليا سوۆەتوۆكە» دەگەن سياقتى. ەكى كوماندا اراسىندا جاقسى بايلانىس ورناتىلعان. ال كومانداعا ءدال قازىر الىپ قالماسى انىق, – دەيدى سپورت ساراپشىسى.
ال رەسەيلىك «سپورت-ەكسپرەسس» باسىلىمىنىڭ جازۋىنشا, ءدال قازىرگى ۋاقىتتا «زەنيت» ورتالىق قورعاۋشىعا مۇقتاج. «كلۋبتا چيستياكوۆ, لوۆرەن, راكيتسكي جانە 19 جاستاعى حوتۋلەۆ بار. ازىرشە سەماكتىڭ باپكەرلەر شتابى حوتۋلەۆقا سەنىم ارتپاي وتىر (وسى ماۋسىمدا ول 1 مينۋت قانا ويناعان). سونىمەن قاتار كوكتەمدە ۋكراينالىق ياروسلاۆ راكيتسكيدىڭ كەلىسىمشارتى اياقتالادى, سوندىقتان «زەنيتكە» قازىر ورتالىق قورعاۋشى كەرەك. ونىڭ ۇستىنە الىپتە قازاقستاندىق تولقۇجات بولعاندىقتان, اسا كوپ ىقتيمالدىلىقپەن ول «زەنيتتە» قالۋى مۇمكىن», دەپ جازادى باسىلىم.
ايتا كەتەيىك, ءنۇرالى ءالىپ «زەنيتتىڭ» وقۋ-جاتتىعۋ جيىنىنا شاقىرىلعان العاشقى قازاقستاندىق فۋتبولشى ەمەس. جانكۇيەرلەردىڭ ەسىندە بولسا, وسىدان ەكى جىل بۇرىن باۋىرجان يسلامحان دا «زەنيتتىڭ» جاتتىعۋىنا قاتىسقان بولاتىن. وكىنىشكە قاراي, يسلامحاننىڭ ويىنى باس باپكەر سەرگەي سەماكتىڭ كوڭىلىنەن شىقپاسا كەرەك, ونىمەن كەلىسىمشارت جاساسپادى. سونداي-اق 2017 جىلى ەركەبۇلان سەيداحمەت تە «زەنيتتىڭ» جاستار كلۋبىنىڭ قاتارىنا شاقىرىلعان-دى. الايدا جەرلەسىمىزدىڭ كامەلەت جاسىنا تولماۋىنا بايلانىستى بۇل ترانسفەر دە ىسكە اسپاي قالعان ەدى.
