پولشا شەكارا كۇزەتىنىڭ حابارلاۋىنشا, ەكى ەل اراسىنداعى 5 مەترلىك بوگەتتىڭ قۇرىلىسىنا ارنالعان الاڭدار تاپسىرما ورىنداۋشىلارعا بەرىلدى. جۇمىستار ءبىر مەزگىلدە ءتورت ۋچاسكەدە جۇرگىزىلەدى.
پولشا-بەلارۋس شەكاراسىنىڭ جالپى ۇزىندىعى – 418 كم. شەكارانىڭ كوپ بولىگى بۋگ وزەنى ارقىلى وتەدى.
پولشا ۇكىمەتى بۇل جوبانىڭ قۇنى 1,6 ملرد زلوتى, ياعني 340 ملن ەۋرونى قۇرايتىنىن حابارلادى. قۇرىلىسقا قاراجات ەل بيۋدجەتىنەن بولىنەدى. 186 شاقىرىمدىق توسقاۋىل ماۋسىم ايىندا دايىن بولۋى كەرەك.
«قازىرگى ۋاقىتتا شاعىن-شاعىن توپ بولىپ پولشا-بەلارۋس شەكاراسىن زاڭسىز كەسىپ وتۋگە تىرىساتىندار كوپ. ادەتتە 30 ادامعا دەيىن جينالىپ, رۇقساتسىز وتەدى. وتكەن جىلدىڭ قازان ايىندا مۇنداي توپتاردىڭ سانى ارتىپ, بىرنەشە مىڭعا جەتتى», دەيدى پولشا شەكارا كۇزەتىنىڭ رەسمي وكىلى كريستينا ياكيميك-ياروش.
بولاشاقتا قابىرعانى زاماناۋي باقىلاۋ قۇرالدارىمەن جابدىقتاۋ جوسپارلانۋدا.
بەلارۋس پەن لاتۆيا, ليتۆا جانە پولشا شەكاراسىنداعى جاعداي 2021 جىلعى 8 قاراشادا كۇرت ناشارلادى. بىرنەشە مىڭ ادام بەلارۋس جاعىنان پولشا شەكاراسىنا كەلدى, كەيبىرەۋلەرى تىكەندى سىمنان جاسالعان قورشاۋدى بۇزىپ, پولشا اۋماعىنا وتۋگە تىرىستى.
وتكەن جىلى بەلارۋستان پولشاعا 40 مىڭعا جۋىق زاڭسىز كىرگەن ميگرانت تىركەلدى. ءبىر جىل بۇرىن ولاردىڭ سانى تەك 122 بولاتىن. زاڭسىز وتۋشىلەر سانى ارتقاننان كەيىن پولشا ۇكىمەتى توسقاۋىل-قابىرعا سالۋ شەشىمىن قابىلدادى.
