وليمپياداشىلاردان وڭدى ناتيجەلەر كۇتەمىز

سوڭعى ءۇش قىسقى وليمپيا ويىندارىنان قازاقستان قۇراماسى جۇلدەمەن ورالعانىن جانكۇيەرلەر جاقسى بىلەدى. 2010 جىلى ۆانكۋۆەردە بياتلونشى ەلەنا حرۋستالەۆا كۇمىس مەدالدى يەلەندى. 15 شاقىرىمدىق جەكەلەگەن سايىستا ول نورۆەگيالىق تۋرا بەرگەردەن عانا قالىپ قويدى. ەسەسىنە ءوزىنىڭ بۇرىنعى وتانداسى، بەلارۋستىڭ ماقتانىشى داريا دومراچەۆادان وزدى. 2014 جىلى سوچيدە مانەرلەپ سىرعاناۋشى دەنيس تەننىڭ ايشىقتى ونەرىنە قول سوقتىق. جامپوز سپورتشىمىز جاپونيالىق يۋدزۋرۋ حانيۋ مەن كانادالىق پاتريك چانعا عانا ەسە جىبەرىپ، قولا جۇلدەنى يەلەندى. 2018 جىلى پحەنچحاندا فريستايلشى يۋليا گالىشەۆا ءدال سول مەجەدەن كورىندى. موگۋل سايىسىندا جەرلەسىمىز فرانتسيا وكىلى پەررين لاففون مەن كانادا سپورتشىسى جيۋستين-ديۋفۋر لاپۋجانتتى العا جىبەردى. بايقاساڭىزدار، وسى جارىستاردىڭ بارلىعىندا جالقى جۇلدەگە يەلىك ەتكەن ەكەنبىز.

ال بەيجىڭدەگى دودادا وسى كورسەتكىشتى جاقسارتۋعا جەرلەستەرىمىزدىڭ كۇش-جىگەرى جەتە مە؟ اتالعان جارىستا بىرنەشە سپورتشىعا ايرىقشا سەنىم ارتىلىپ وتىر. وسى ورايدا، يۋليا گالىشەۆانىڭ ەسىمىن ايرىقشا اتاپ وتۋگە ءتيىسپىز. 29 جاستاعى شىعىس قازاقستان وبلىسى تۋماسىنىڭ وليمپيا ويىندارى جۇلدەسىنەن بولەك، باسقا دا تولىپ جاتقان اتاقتارى بار. ماسەلەن، 2019 جىلى ول پارك-سيتيدە وتكەن الەم چەمپيوناتىندا التىننان القا تاقتى. 2015 جىلى كرايشبەرگتە قولا السا، 2017 جىلى سەررا-نەۆادا مەن 2021 جىلى الماتىدا كۇمىسكە قول سوزدى. گالىشەۆانىڭ ەنشىسىندە دۇنيەجۇزىلىك ۋنيۆەرسيادانىڭ ەكى جانە ازيا ويىندارى مەن الەم كۋبوگىنىڭ ءۇش التىنى بار. ەندى كەندى التايدىڭ ارۋى قىتاي ەلىندە قازاقستان جانكۇيەرلەرىنە التىن مەدالدىڭ سىڭعىرىن ەستىتسە دەگەن تىلەگىمىز بار.

فريستايلدا يۋليا گالىشەۆادان بولەك، پاۆەل كولماكوۆ، دميتري رەيحەرد جانە جانبوتا الدابەرگەنوۆا سىندى ساقا سپورتشىلار دا ونەر كورسەتەدى. 25 جاستاعى كولماكوۆ بىلتىر الەم چەمپيوناتىنىڭ قولا جۇلدەگەرى اتانىپ، دۇنيەجۇزىلىك ۋنيۆەرسيادادا مەدالداردىڭ تولىق جيىنتىعىن ولجالادى. ياعني پاۆەلدىڭ قورجىنىندا التىن دا، كۇمىس تە، قولا دا بار. بيىل ول الەم كۋبوگىنىڭ كەزەڭدىك سايىسىندا جەڭىس تۇعىرىنا كوتەرىلدى. 33 جاستاعى رەيحەرد – ءتورت وليمپيا ويىندارى مەن التى الەم چەمپيوناتىنا قاتىسقان سپورتشى. بىرقاتار بايراقتى باسەكەدە ول ەل نامىسىن ابىرويمەن قورعادى. 26 جاستاعى الدابەرگەنوۆانىڭ ناتيجەلەرى دە جامان ەمەس. ول سوچي وليمپياداسىندا التىنشى ورىنعا تابان تىرەسە، پحەنچحاندا 13-ساتىعا جايعاستى. باسقا دا تۋرنيرلەردە ءوزىن جاقسى قىرىنان كورسەتتى. ماماندار تاراپىنان ونىڭ مۇمكىندىگى مەن الەۋەتى ءالى دە جوعارى باعالانۋدا. ولاي بولسا، ءدال وسى دودادا جانبوتا جاسىنداي جارقىلداسا دەيمىز. 

قازاقستان جانكۇيەرلەرى شورت-ترەكشىلەر سايىسىن تاعاتسىزدانا كۇتۋدە. ويتكەنى ۇلتتىق قۇراما تىزگىنىن مادىعالي قارسىبەكوۆتەي مايتالمان مامان ۇستاعالى بەرى ءبىزدىڭ ەلدە سپورتتىڭ بۇل ءتۇرى وتە جاقسى قارقىنمەن دامىپ كەلەدى. ەڭ قۋانىشتىسى، بىرەر جىلدان بەرى باس كوماندامىزدىڭ باسىم بولىگىن ءوز قانداستارىمىز قۇراپ وتىر. قازىرگى كەزدە قازاقستان سپورتشىلارىنىڭ حالىقارالىق ارەناداعى قارقىنى جامان ەمەس. وسىدان ءتورت جىل بۇرىن پحەنچحان وليمپياداسىنىڭ ەستافەتالىق سايىسىندا جەرلەستەرىمىز جەڭىس تۇعىرىنا سىنىق-سۇيەم عانا جەتپەي قالىپ، التىنشى ورىنعا تابان تىرەگەنى دە ەسىمىزدە. الەم چەمپيوناتتارى مەن الەم كۋبوكتارىنىڭ كەزەڭدىك سايىستارىنداعى ناتيجەلەرىمىز دە كوڭىل كونشىتەرلىكتەي. بۇل جولى بەي­جىڭدە ابزال اجىعاليەۆ، دەنيس ني­كيشا، ءادىل عالياحمەتوۆ، ولگا تيحونوۆا جانە يانا حان ونەر كورسەتەدى. ولاردىڭ بارلىعى دا كوپتەن بەرى كوزگە ءتۇسىپ جۇرگەن سپورتشىلار. وسى جارىستىڭ جەكەلەگەن سايىسىندا نەمەسە كوماندالىق ەستافەتادا كەمىندە ءبىر جۇلدەگە قولىمىز جەتسە، سونىڭ ءوزى ءبىز ءۇشىن تاماشا جەتىستىك بولىپ سانالاتىنى ءسوزسىز.

كەزىندە داڭقتى ۆلاديمير سميرنوۆ قازاقستاننىڭ شاڭعى سپورتىن وراسان زور بيىككە كوتەرگەن ەدى. كوكشە ءوڭىرىنىڭ تۋماسى وتكەن عاسىردىڭ توقسانىنشى جىلدارى قىسقى وليمپيادادا 1 التىن، 2 كۇمىس جانە 1 قولا مەدالدى ولجالاپ، بارشا جۇرتتىڭ العىسىنا بولەندى. بۇل تاۋەلسىز قازاقستاننىڭ عالامدىق دودالارداعى العاشقى جۇلدەلەرى ەدى. ودان بولەك، 1988 جىلى كالگاريدە ۆلاديمير ءۇش رەت جەڭىس تۇعىرىنا كوتەرىلدى. ول الەم چەممپيوناتتارى مەن باسقا دا اسا ءىرى حالىقارالىق جارىستاردا جۇلدەلەردى كۇرەپ الدى. سودان كەيىن كەڭ بايتاق ەلىمىزدەن اتاعى الىسقا جايىلعان سميرنوۆتىڭ جەڭىستى جولىن جالعاستىراتىن بىردە-ءبىر شاڭعىشىنىڭ شىقپاعانى وكىنىشتى، ارينە!

سوڭعى 10 جىل بەدەرىندە مانەرلەپ سىرعاناۋ سپورتى ەلىمىزدە ەڭسە تىكتەپ قالعان ەدى. بايراقتى باسەكەلەردە العاشقى بولىپ دەنيس تەن اتوي سالدى. الماتىلىق سپورتشى سوچي وليم­پيا­داسىنىڭ قولا جۇلدەسىنەن بولەك، 2013 جانە 2015 جىلدارى جالاۋى جەلبىرەگەن الەم چەمپيوناتتارىندا جۇلدەگەرلەر ساناتىنان كورىندى. ء«تورت قۇرلىق چەم­پيوناتى»، ازيا ويىندارى جانە دۇنيە­جۇزىلىك ۋنيۆەرسيادادا تەنگە تەڭ كەلەر ەشكىم تابىلمادى. ودان كەيىن ەليزابەت تۇرسىنباەۆانىڭ ورەلى ونەرىنە قول سوقتىق. پحەنچحان وليمپياداسىندا 12-ورىندى قاناعات تۇتقان ول 2019 جىلى ءۇش بىردەي ءدۇبىرلى دودادا دارالاندى. قازاق قىزى الەم چەمپيوناتى مەن دۇنيەجۇزىلىك ۋنيۆەرسيادادا جانە ء«تورت قۇرلىق چەمپيوناتىندا» كۇمىس مەدالدى موينىندا جارقىراتتى.

ەسىمدەرى جوعارىدا اتالعان ەكى جەرلە­سىمىز قىتايداعى قىسقى ويىندارعا قاتىس­قاندا قالىڭ كورەرمەن «ەڭ بولماعاندا بىرەۋى جۇلدە الۋعا ءتيىس» دەپ تاقىمىن قىسىپ وتىرار ەدى. بىراق قازىر ەكەۋى دە ۇلتتىق قۇراما ساپىندا جوق. دەنيس 2018 جىلدىڭ شىلدە ايىندا الماتىنىڭ قاق ورتاسىندا قاندىقول قاراقشىلاردىڭ قولىنان قازا تاپتى. ول نەبارى 25 جاستا ەدى. اقپان ايىنىڭ بەل ورتاسىندا 22 جاسقا تولعالى وتىرعان ەليزابەت ەسكى جاراقاتىنان ايىعا الماي، سونىڭ سالدارىنان ۇلكەن سپورتتان قول ءۇزدى. وكىنىشكە قاراي، قازىرگى كەزدە ۇلتتىق كوماندا ساپىندا ونەر كورسەتىپ جۇرگەن ۇل-قىزدار اراسىنان تەن مەن تۇرسىنباەۆانىڭ جەمىستى جولىن جالعاستىراتىنداي ەشكىمدى كورىپ تۇرعان جوقپىز.  

كونكيشىلەر قاتارىندا دەنيس كۋزين مەن ەكاتەرينا ايدوۆا سەكىلدى ساقا سپورتشىلار بار. ولاردىڭ ارقايسىسى وليمپيا ويىندارىنا ءۇش رەتتەن قاتىستى. ەكەۋىنىڭ دە الەم چەمپيونى دەگەن دارداي اتاقتارى بار. كەزىندە كۋزين ەرەسەكتەر سىنىندا الدىنا جان سالماسا، ايدوۆا جاستار بۋىنى اراسىنداعى دودادا دارالاندى. الايدا قازىر ولار ارداگەر سپورتشىلار ساناتىندا. ۋاقىت وزعان سايىن ناتيجەلەرى دە ناشارلاپ كەلەدى. وسى جايتتىڭ بارلىعىن ەسكەرە كەلە، «دەنيس پەن ەكاتەرينانىڭ عالامدىق دودادا جۇلدە الۋى ەكىتالاي» دەسەك، ەشكىم ايىپقا بۇيىرا قويماس. سول سەكىلدى بياتلون، تاۋ شاڭعىسى، شاڭعىمەن ترامپليننەن سەكىرۋ جانە شاڭعى قوسسايىسىن سەرىك ەتكەندەر اراسىندا دا جەڭىس تۇعىرىنا كوتەرىلۋگە كۇش-جىگەرى جەتەتىن سپورتشىلار كورىنبەيدى.