ۇكىمەت • 25 قاڭتار، 2022

قازاقستاننىڭ ەنەرگيا جۇيەسى قالپىنا كەلتىرىلدى — ۇكىمەت

بۇگىن ەلىمىزدىڭ بىرقاتار وڭىرلەرى ۋاقىتشا جارىقسىز قالعان بولاتىن. مامانداردىڭ جۇمىلا ەڭبەك ەتۋى ارقاسىندا ماسەلە دەر كەزىندە وڭىنان شەشىلدى، دەپ حابارلايدى Egemen.kz قر پرەمەر-ءمينيسترىنىڭ ءباسپاسوز قىزمەتىنە سىلتەمە جاساپ.

تابيعات مۇسىلمانقۇل

25 قاڭتار كۇنى ساعات 11:59-دا (نۇر-سۇلتان ۋاقىتى بويىنشا) ورتالىق ازيانىڭ ەنەرگيا جۇيەسىندەگى ەلەكتر ەنەرگياسىن تۇتىنۋدان گەنەراتسيانىڭ ايتارلىقتاي اۋىتقۋىنا بايلانىستى 500 كۆ «قازاقستاننىڭ سولتۇستىك-شىعىس-وڭتۇستىك» ەلەكتر ءترانزيتى شامادان تىس جۇكتەلدى. ەلەكتر جەلىلەرىنىڭ زاقىمدالۋىنا جول بەرمەۋ جانە ءىرى جۇيەلىك اۆاريانى بولدىرماۋ ماقساتىندا «قازاقستاننىڭ سولتۇستىك-شىعىس-وڭتۇستىك» ەلەكتر ءترانزيتى اۆارياعا قارسى اۆتوماتيكانىڭ دۇرىس جۇمىس ىستەۋى ارقىلى ءبولىندى، بۇل قازاقستاننىڭ وڭتۇستىك ايماعىنداعى تۇتىنۋشىلاردىڭ توقتان تولىق اجىراتىلۋىنا جول بەرمەدى.

شتاتتان تىس جاعداي ورىن العان كەزدە قازاقستاننىڭ وڭتۇستىك ايماعىنداعى تۇتىنۋ كولەمى 3200 مۆت قۇرادى. اپاتقا قارسى اۆتوماتيكا ارەكەتىمەن تۇتىنۋشىلاردى 1300 مۆت كولەمىندە ەلەكترمەن جابدىقتاي وتىرىپ، جامبىل گرەس-ءى، شىمكەنت جەو-3، قىزىلوردا جەو-6 جانە الماتى وبلىسىنىڭ ەلەكتر ستانتسيالارىنىڭ جۇمىسىن تولىق توقتاتۋعا جول بەرىلمەدى. ءماجبۇرلى شەكتەۋلەر 1900 مۆت قۇرادى. 50 گتس نورماتيۆتىك جيىلىكتە – ورتالىق ازيانىڭ ەنەرگيا جۇيەسىندەگى جيىلىك 47 گتس-كە دەيىن كۇرت تومەندەدى، سونىڭ سالدارىنان وزبەكستان مەن قىرعىزستاننىڭ ەنەرگيا جۇيەلەرى تولىق ءوشىرىلدى. ساعات 13:39-دا قازاقستاننىڭ ۇلتتىق ەلەكتر جەلىسىنىڭ قالىپتى سحەماسى قالپىنا كەلتىرىلدى. قىرعىزستاننىڭ ەنەرگيا جۇيەسىمەن ءبىر ۋاقىتتا جۇمىس قايتا جانداندى. ساعات 14:53-تە الماتى قالاسى مەن الماتى وبلىسى بويىنشا بارلىق شەكتەۋلەر الىنىپ تاستالدى. ساعات 15:10-دا جامبىل 500 كۆ، شىمكەنت 500 كۆ شاعىن ستانتسيالارىنا كەرنەۋ بەرىلدى. قازاقستاننىڭ وڭتۇستىك ايماعىنىڭ بارلىق وڭىرلەرىنىڭ تۇتىنۋشىلارىن ەلەكترمەن جابدىقتاۋ 16:00-دە قالپىنا كەلتىرىلدى.

ۋاقتىلى قابىلدانعان شارالاردىڭ ارقاسىندا ەنەرگيا جۇيەسىنىڭ قالىپتى رەجيمى جانە تۇتىنۋشىلاردى ەلەكترمەن جابدىقتاۋ قىسقا مەرزىمدە قالپىنا كەلتىرىلدى. وزبەكستان مەن قىرعىزستاننىڭ ەنەرگيا جۇيەسىندە تۇتىنۋشىلار توقتان تولىق ءوشىرىلدى. جۇمىس اياسىندا قازاقستان تاراپىنان وزبەكستان رەسپۋبليكاسىنداعى اۆاريانى جويۋعا كومەك كورسەتىلىپ جاتىر، وڭىرلىك ستانتسيالار كەزەڭ-كەزەڭىمەن ىسكە قوسىلىپ، ەلەكترمەن جابدىقتاۋ قالپىنا كەلتىرىلۋدە.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز