پرەزيدەنت • 22 قاڭتار، 2022

پرەزيدەنت جەكەلەگەن مەملەكەتتىك ورگانداردىڭ باسشىلارىمەن كەڭەس وتكىزدى

87 رەت كورسەتىلدى

مەملەكەت باسشىسى قاسىم-جومارت توقاەۆتىڭ توراعالىعىمەن پرەزيدەنت اكىمشىلىگى، قاۋىپسىزدىك كەڭەسى، باس پروكۋراتۋرا، ۇلتتىق قاۋىپسىزدىك كوميتەتى، قورعانىس جانە ىشكى ىستەر مينيسترلىكتەرى باسشىلارىنىڭ كەڭەسى ءوتتى، دەپ حابارلادى Egemen.kz اقورداعا سىلتەمە جاساپ.

مەملەكەت باسشىسىنا ەلىمىزدەگى احۋالدى تۇراقتاندىرۋ ءۇشىن بەرىلگەن تاپسىرمالاردىڭ ورىندالۋ بارىسى تۋرالى باياندالدى. اسىرەسە قاۋىپسىزدىك پەن قۇقىقتىق ءتارتىپتى قايتا قالپىنا كەلتىرۋگە، ازاماتتاردىڭ زاڭدى قۇقىقتارىن قامتاماسىز ەتۋگە باسا ءمان بەرىلدى.

ىشكى ىستەر ءمينيسترى ەرلان تۇرعىمباەۆ پرەزيدەنتكە ەلىمىزدىڭ بارلىق وڭىرىندە جۇرگىزىلىپ جاتقان «قۇقىقتىق ءتارتىپ» دەپ اتالاتىن شۇعىل الدىن الۋ شارالارىنىڭ جۇزەگە اسىرىلۋ بارىسى تۋرالى باياندادى. حالىقتان زاڭسىز ساقتاپ وتىرعان قارۋلارىن الۋ ءىسى جالعاسۋدا. ۆەدومستۆونىڭ مالىمەتى بويىنشا تەرروريزم، كىسى ءولتىرۋ، بيلىك وكىلدەرىنە زورلىق-زومبىلىق كورسەتۋ، بۇزاقىلىق، مەملەكەتتىك ورگانداردىڭ عيماراتتارىنا شابۋىل جاساۋ جانە باسقا دا قىلمىستار بويىنشا 1 822 قىلمىستىق ءىس قوزعالعان. ونىڭ 116-سى ارناۋلى پروكۋرورلارعا جولدانعان. ءىىم جەكە قاۋىپسىزدىك دەپارتامەنتى جانىنان سەنىم تەلەفونى ىسكە قوسىلعان. ءمينيستردىڭ ايتۋىنشا، ۇستالعان ازاماتتاردىڭ كونستيتۋتسيالىق قۇقىقتارىنىڭ بۇزىلۋىنا جول بەرمەۋ ماقساتىندا قۇقىق قورعاۋ ۇيىمدارىمەن تىعىز ىقپالداستىق ورناتىلعان.

ۇلتتىق قاۋىپسىزدىك كوميتەتىنىڭ توراعاسى ەرمەك ساعىمباەۆ مەملەكەت باسشىسىنا لاڭكەستىك قاۋىپتەردى جويۋ جانە كەلەشەكتە ونداي قاتەرلەرگە جول بەرمەۋ مەحانيزمدەرىن ازىرلەۋ جونىندەگى شارالار تۋرالى باياندادى.

قورعانىس ءمينيسترى رۋسلان جاقسىلىقوۆ پرەزيدەنتكە قازىرگى ۋاقىتتا قارۋلى كۇشتەردىڭ جەكەلەگەن بولىمشەلەرى ىشكى ىستەر ورگاندارىمەن بىرلەسىپ، تەرروريستىك قاۋىپتىڭ «قىزىل» دەڭگەيىندە تۇرعان وڭىرلەردە قۇقىقتىق ءتارتىپتى قامتاماسىز ەتۋ جونىندەگى مىندەتتەرىن ورىنداۋدى جالعاستىرىپ جاتقانىن باياندادى. اسكەري نىسانداردىڭ، سونىڭ ىشىندە قارۋ-جاراق جانە وق-ءدارى قويمالارىنىڭ كۇزەتى كۇشەيتىلگەن.

قورعانىس مينيسترلىگى مەملەكەت باسشىسىنىڭ قارۋلى كۇشتەردى رەفورمالاۋ جونىندە بەرگەن تاپسىرماسىن ورىنداۋعا كىرىستى.

باس پروكۋرور عيزات نۇرداۋلەتوۆ مەملەكەت باسشىسىنا تەرروريزم مەن جاپپاي تارتىپسىزدىك دەرەكتەرى بويىنشا جۇرگىزىلىپ جاتقان تەرگەۋ امالدارىنىڭ بارىسى تۋرالى ەسەپ بەردى. سونىمەن قاتار ۇستالعان جانە تۇتقىندالعان ازاماتتاردىڭ قۇقىقتارىن قامتاماسىز ەتۋ ءۇشىن پروكۋرورلاردىڭ قابىلداعان شارالارى جونىندە باياندادى. عيزات نۇرداۋلەتوۆتىڭ ايتۋىنشا، ولاردىڭ ءبارى قورعاۋ، زاڭدى كومەك الۋ، شاعىم جاساۋ قۇقىعىمەن قامتاماسىز ەتىلىپ جاتىر. پروكۋراتۋرا ورگاندارىنا قاڭتار وقيعاسىنا قاتىسقان ازاماتتاردان 84 شاعىم تۇسكەن. قاداعالاۋ شارالارى بويىنشا ۇستالعان 96 ادام بوساتىلعان.

سونىمەن قاتار قاداعالاۋ ورگانىنىڭ جەتەكشىسى ناقتى دالەلى جوق جاعدايلاردا  جازانى جەڭىلدەتۋ جونىندەگى مەملەكەت باسشىسىنىڭ بەرگەن تاپسىرماسىنىڭ ورىندالۋ بارىسى تۋرالى ەسەپ بەردى. بەرىلگەن مالىمەتتەر بويىنشا اكىمشىلىك تارتىپكە سايكەس سوتتاردىڭ شەشىمىمەن 3314 ادام تۇتقىندالعان. پروكۋرورلار 1884 ىسكە قاتىستى جازانى جەڭىلدەتۋ جونىندە ءوتىنىش بەرگەن. ولاردى تەكسەرۋ ناتيجەسىندە 1083 ادام تۇتقىننان بوساتىلعان. 493 ازاماتقا سالىنعان ايىپپۇل ەسكەرتۋ جازاسىنا اۋىستىرىلعان.

باياندامالاردى تىڭداعان مەملەكەت باسشىسى بولعان وقيعانىڭ بارلىق ءمان-جايىن انىقتاۋ جۇمىستارىن جالعاستىرۋ قاجەت ەكەنىن ايتتى.

قاسىم-جومارت توقاەۆ اقپارات سالاسىنداعى كۇشتىك قۇرىلىمدار مەن وكىلەتتى ورگاندار كۇش-جىگەرلەرىن ۇيلەستىرىپ، جۇرتشىلىق تاراپىنان تۇسەتىن ساۋالدارعا جەدەل جاۋاپ بەرۋگە ءتيىس.

مەملەكەت باسشىسى تۇرعىنداردىڭ قازاسىنا قاتىستى ماسەلە بويىنشا باس پروكۋراتۋراعا جانە ىشكى ىستەر مينيسترلىگىنە ءاربىر جاعدايدى مۇقيات تەرگەپ-تەكسەرۋ جونىندە تاپسىرما بەردى.

– جۇرتشىلىقتىڭ بولعان وقيعالار جونىندە دولبار مەن قاۋەسەتكە نەگىزدەلگەن پىكىر قالىپتاستىرۋىنا جول بەرۋگە بولمايدى. ازاماتتار بيلىكتىڭ اشىقتىق پەن زاڭدىلىقتى قامتاماسىز ەتىپ وتىرعانىن كورۋگە ءتيىس، – دەدى مەملەكەت باسشىسى.

پرەزيدەنت اكىمشىلىگىنىڭ باسشىلىعىنا اتالعان ماسەلەنى باقىلاۋعا الۋ تاپسىرىلدى.

سوڭعى جاڭالىقتار

وتكەن تاۋلىكتە 8 ادام كۆي جۇقتىردى

كوروناۆيرۋس • بۇگىن، 10:35

ۇقساس جاڭالىقتار