پرەزيدەنت • 21 قاڭتار، 2022

ەلدە تابىس تاۋىپ، ونى شەتەلدە جۇمسايمىز قاعيداتى توقتايدى – پرەزيدەنت

1284 رەت كورسەتىلدى

مەملەكەت باسشىسى ينۆەستيتسيالىق ساياساتتى رەتكە كەلتىرۋدىڭ ماڭىزى زور ەكەنىنە توقتالدى. سونداي-اق ول ءبىلىم سالاسىنداعى جۇمىستاردى شيراتۋ كەرەكتىگىن اتاپ ءوتتى، دەپ حابارلايدى Egemen.kz.

«ۇكىمەت ينۆەستيتسيالىق مىندەتتەمەنىڭ ورىندالۋىنا زەردەلەۋ جۇرگىزۋى شارت. ءدال قازىر شەتەلدىك ينۆەستيتسيالار ءۇشىن كۇرەس شيەلەنىسكەن كەزدە ءبىز ىشكى رەزەرۆتەرگە بارىنشا كوبىرەك ارقا سۇيەگەنىمىز ابزال. مۇندا ارينە، وتاندىق كومپانيالاردىڭ قاراجاتى تۋرالى ايتىلىپ وتىر. ەگەر سىزدەر ءوز بولاشاقتارىڭىزدى قازاقستانمەن بايلانىستىرساڭىزدار، وندا قاراجاتتارىڭىزدى ءبىزدىڭ ەلگە قايتا ينۆەستيتسيالاۋ كەرەك. سىزدەردىڭ قازاقستان الدىنداعى الەۋمەتتىك جانە ساياسي جاۋاپكەرشىلىكتەرىڭىز وسى. ءىس جۇزىندە «ەلدە تابىس تابامىز – ونى شەتەلدە جۇمسايمىز» دەگەن قاعيداتتىڭ بولۋىنا بۇدان بىلاي ەش قۇقىق جوق»، دەدى قاسىم-جومارت توقاەۆ.

پرەزيدەنت نەگىزگى جۇمىس ەكى باعىت بويىنشا ىسكە اساتىنىن تىلىنە تيەك ەتتى. «جۇمىس ەكى باعىت بويىنشا جۇرگىزىلەتىن بولادى. ەلگە كاپيتالدى قايتارۋ مەن كاپيتالدى قايتارۋدى ىنتالاندىرۋ، سونداي-اق وفشورعا قارجى شىعارۋعا توسقاۋىل قويۋ»، دەدى قاسىم - جومارت توقاەۆ.

سونداي-اق پرەزيدەنت مەملەكەتتىك-جەكەمەنشىك سەرىكتەستىكتى قايتا رەتكە كەلتىرۋدىڭ ماڭىزدىلىعىن اتاپ ءوتتى.

«ەلگە ينۆەستيتسيا تارتۋدىڭ تاعى ءبىر باعىتى مەملەكەتتىك-جەكەشەلىك سەرىكتەستىكتى قايتا رەتكە كەلتىرۋ بولۋى ءتيىس. بۇگىندە بۇل قۇرال شىن مانىندە مەملەكەتتىك ساتىپ الۋلار پروتسەدۋراسىن اينالىپ ءوتۋدىڭ قۇرالىنا اينالعان. بيۋدجەتكە بارلىق كاسىپكەرلىك تاۋەكەل اۋدارىلادى. جوعارى جەڭىلدىكتەر مەن جوعارى شەكتەۋلەر نەگىزسىز ۇسىنىلادى»، دەپ اتاپ ءوتتى مەملەكەت باسشىسى.سونىمەن قاتار ول «ۇكىمەتكە مەملەكەتتىك-جەكەشەلىك سەرىكتەستىكتىڭ جاڭا زاماناۋي تاسىلدەرىن قۇرۋ قاجەت»، دەدى. قىسقاسى قاسىم - جومارت توقاەۆ بۇل باعىتتاعى جۇمىس جاڭاشا پروتسەسپەن ءجۇرۋى كەرەكتىگىن قاداپ ايتتى.

ء«بىلىم سالاسى تۋرالى ايتار بولساق، اينالىپ كەلگەندە اڭگىمە ونىڭ ساپاسىنا كەلىپ تىرەلەدى. نارىق ناقتى ءبىر سالا ماماندارىن تالاپ ەتسە، ال ءبىزدىڭ ءبىلىم مينيسترلىگىنىڭ نورماتيۆتىك تالابى باسقا. ەگەر قازىرگى نارىق سۇرانىسى بەلگىلى ءبىر سالا مامانىن تالاپ ەتسە، سوعان ساي سىزدەر دە وزگەرىپ وتىرۋلارىڭىز كەرەك»، دەدى قاسىم - جومارت توقاەۆ ءىرى بيزنەس وكىلدەرىمەن كەزدەسۋىندە.

پرەزيدەنت ءبىلىم بەرۋ مەن مامان دايارلاۋ ۋاقىت تالابىمەن ۇندەسۋى قاجەتتىگىن ەسكەرتتى. «قايتالاپ ايتامىن، ءبىز ستاندارتتى ءبىلىم بەرۋ فورماتىن قايتا قاراۋىمىز كەرەك. سونىمەن قوسا وسكەلەڭ ۇرپاقتىڭ دا مەنتاليتەتىن وزگەرتكەن ءجون. بۇل ماسەلە ەلدە بولعان قايعىلى جاعدايدان ساباق الاتىن جايتتاردىڭ ءبىرى»، دەدى ول.

سوڭعى جاڭالىقتار

ۇقساس جاڭالىقتار