«الماتى قالاسىنا جۇمىس ساپارىمەن باردىم. ءبىلىم جانە عىلىم نىساندارىن ارالاپ, كەزدەسۋلەر وتكىزدىم. بارلىق ءبىلىم بەرۋ ۇيىمدارى تۇراقتى جانە شتاتتىق رەجيمدە جۇمىس ىستەيدى. مەن بارعان 206 مەكتەپ-گيمنازيا 2021 جىلدىڭ جەلتوقسانىندا پايدالانۋعا بەرىلدى. بۇل مەملەكەت باسشىسىنىڭ تاپسىرماسى بويىنشا 2025 جىلعا دەيىن 1000 مەكتەپتىڭ قۇرىلىسى اياسىندا سالىنعان نىسانداردىڭ ءبىرى. جانىنداعى مەكتەپتە قابىلداۋ قورىتىندىسى بويىنشا 1 سىنىپ وقۋشىلارى كوپ بولدى, «يۋ» سىنىبىنا دەيىن. 1800 وقۋشىعا ارنالعان تاعى ءبىر مەكتەپتىڭ پايدا بولۋى وقۋشى ورىندارىنىڭ تاپشىلىعىن شەشۋگە كومەكتەستى. ارىپتەس-پەداگوگتەرمەن اڭگىمەلەستىم. ساپالى پەداگوگيكالىق قۇرامى قۋانتتى. تالەن سالتانات - حيميا مۇعالىمى, پەداگوگ - زەرتتەۋشى, بالىبەكوۆا رابيعا جۇمانازارقىزى - بيولوگيا مۇعالىمى, پەدوگوگ - زەرتتەۋشى, نيازبەكوۆا اقمارال قالتايقىزى - فيزيكا مۇعالىمى, پەداگوگ-شەبەر. ارىپتەستەرمەن وسى پاندەر بويىنشا وقۋ باعدارلامالارىنىڭ مازمۇنىن جانە وقۋ پروتسەسىن جاقسارتۋ يدەيالارىن تالقىلادىق», دەپ جازدى ا. ايماعامبەتوۆ الەۋمەتتىك جەلىدەگى پاراقشاسىندا.
سونىمەن قاتار مينيستر 315 ورىنعا ارنالعان 186 بوبەكجايىنىڭ جۇمىسىمەن تانىستى. بۇرىن بۇل نىسان جالعا بەرىلگەن ەدى. قازىر عيمارات جوندەلىپ, جاڭا بالاباقشا اشىلدى.
«قانىش ساتباەۆ اتىنداعى قازاق ۇلتتىق تەحنيكالىق زەرتتەۋ ۋنيۆەرسيتەتىنە باردىم. جوندەۋ جۇمىستارىمەن تانىسىپ, جاتاقحانالارعا بارىپ كەلدىم. ۋنيۆەرسيتەت تاراپىنان عىلىمي جوبالار تانىستىرىلدى. ارىپتەستەرىم ايتقان بارلىق سۇراقتار مەن ۇسىنىستاردى مۇقيات تىڭداپ, جاتاقحانادا قالعان ستۋدەنتتەرمەن اڭگىمەلەستىم», دەدى ۆەدومستۆو باسشىسى.
ساپار بارىسىندا ا. ايماعامبەتوۆ قالا مەكتەپتەرىنىڭ ديرەكتورلارىمەن كەزدەسۋ وتكىزدى.
«مەكتەپ باسشىلارىنىڭ ۇسىنىستارىن تىڭداپ, قىزىقتىرعان سۇراقتارعا جاۋاپ بەرۋگە تىرىستىم. ءبىز «الماتى مەكتەپتەرى» جوباسىن ىسكە اسىرۋ بارىسىن تالقىلاپ, جان باسىنا قارجىلاندىرۋ تەتىگىنىڭ تيىمدىلىگىن ارتتىرۋ, سىنىپ جەتەكشىلەرىنىڭ ينستيتۋتىن كۇشەيتۋ ماسەلەلەرىن تالقىلادىق جانە اتا-انالارمەن ءوزارا ءىس-قيمىلدى نىعايتۋعا باعىتتالعان جوبالار تۋرالى ءسوز قوزعادىق. ارىپتەستەر قويىلعان بارلىق مىندەتتەردى ءتيىمدى ىسكە اسىرۋدىڭ ماڭىزدىلىعىن تۇسىنەتىندەرىنە جانە قولدايتىندارىنا كوزىم جەتتى», دەدى ول.
