سپورت • 18 قاڭتار، 2022

چەمپيوندى كۇتىپ الدى

57 رەت كورسەتىلدى

كەشە شاحماتتان الەم چەمپيونى ءبيبىسارا اساۋباەۆانى جانكۇيەر قاۋىم ەلوردا اۋەجايىنان سىي-قۇرمەت كورسەتىپ كۇتىپ الدى. جاھاندىق جارىستا جاسىنداي جارقىلداعان جەر­لەسىمىزدىڭ جەڭىسىنە ورتاقتاسقان ءدۇيىم جۇرتشىلىق سپورتشىعا ىزگى تىلەكتەرىن جولدادى.

جۋىردا پولشا استاناسى ۆارشاۆادا شاحماتتان الەم چەمپيوناتى اياقتالعانى بەلگىلى. الەم­دىك جارىستاردا شاشاسىنا شاڭ جۇقتىرماۋعا تىرىساتىن ءبىز­دىڭ ءبيبىسارا بۇل جولى دا جۇرى­سىنەن جاڭىلعان جوق. ول بليتس باسەكەسىندە قارسىلاستارىن قاپىدا قالدىرىپ، الەمدىك شاحمات تاريحىندا ايەلدەر اراسىندا چەمپيون اتانعان ەڭ جاس شاحماتشى دەپ تانىلدى.

اتاپ وتەرلىگى، جەرلەسىمىز بۇل باسەكەدە ەشكىمگە دەس بەرمەي، جارىستىڭ اياقتالۋىنا ءبىر تۋر قالعاندا چەمپيون اتاندى. بۇل وتاندىق سپورت تاريحىنداعى ەرەك­شە وقيعا. بليتس جارىسىندا ەكىن­شى ورىن رەسەيلىك الەكساندرا كوستەنيۋككە بۇيىردى. ول بۇ­عان دەيىن راپيد باسەكەسىندە توپ جار­عان بولاتىن. تاعى ءبىر رەسەيلىك سپورتشى ۆالەنتينا گۋنينا ءۇشىن­شى ورىندى قاناعات تۇتتى.

جالپى، ءبيبىسارا بۇعان دەيىن 8، 10، 12 جانە 14 جاسقا دەيىنگى قىزدار اراسىندا كلاسسيكالىق شاح­ماتتان الەم چەمپيونى اتان­عان بولاتىن. سونداي-اق ونىڭ 7 جانە 9 جاسقا دەيىنگى وقۋشىلار ارا­سىن­داعى الەم چەمپيونى دەگەن اتاق­تارى بار.

ۆارشاۆاداعى باسەكەدە ءبيبى­سارا التىنمەن عانا شەكتەلمەي، راپيد باسەكەسىندە كۇمىس جۇلدەنى قاناعات تۇتتى. 17 جاسار سپورتشى شە­شۋشى سىندا گرۋزيالىق گروسسمەيستەر نانا دزاگنيدزەنى قاپى­دا قالدىردى. سونداي-اق جەرلەسى­مىز اسەل سەرىكبايدى ۇتتى. ءدال وسى سىندا توپ جارعان رەسەيلىك الەك­ساندرا كوستەنيۋكپەن تەڭ وينادى.

2021 جىل ءبيبىسارا ءۇشىن جەمىستى بولدى. ول الەم چەمپيوناتىنداعى جەتىستىكتەرىنەن بولەك، ونلاين فورماتتا ۇيىمداستىرىلعان ازيا بىرىنشىلىگىندە جەڭىسكە جەتتى. وتانداسىمىز ۇلتتىق قۇرامامەن بىرگە الەمدەگى ۇزدىك 8 كوماندانىڭ قاتارىنا قوسىلدى.

– چەمپيونات وتە تارتىستى ءورىلدى. ەرەسەكتەر اراسىنداعى الەم چەمپيوناتىندا التىن جانە كۇمىس جۇلدەگە قول جەتكىزگەنىم ءۇشىن قۋانىشتىمىن. وينالعان پار­تيانىڭ ءبارى وڭايعا ءتۇستى دەپ ايتا المايمىن. ونىڭ ۇستىنە ەرەسەكتەر اراسىنداعى جارىس بولعاندىق­تان قارسىلاستاردىڭ دەڭگەيى وتە جوعا­رى. وسى ورايدا جاتتىقتىرۋشىم سەرگەي دولماتوۆقا العىسىمدى بىلدى­رەمىن. ونىڭ جەتەكشىلىگىمەن دو­داعا تىنعىلىقتى دايىندالدىق. ەرەسەكتەر اراسىندا الەم چەمپيو­نى بولۋ ارمانىم ەدى. سول ارمانىم ورىندالدى، – دەيدى ءبيبىسارا اساۋباەۆا.

ەسكە سالا كەتەيىك، شاحماتتىڭ راپيد جانە بليتس تۇرلەرىنەن وتە­تىن الەم چەمپيوناتى جانكۇيەر قاۋىمنىڭ ەرەكشە تاعاتسىزدانا كۇتەتىن دودالارىنىڭ ءبىرى. بيىل بۇل جارىسقا 50 مەملەكەتتەن 200-دەن استام سپورتشى قاتىستى. چەمپيوناتتىڭ جالپى جۇلدە قورى 1 ملن اقش دوللارىن قۇرادى.

جاس كۇنىنەن جۇرتشىلىق نازارىندا جۇرگەن ءبيبىسارا اساۋباەۆا ايەلدەر اراسىنداعى گروسسمەيس­تەر (2019) ەكەنىن اتاپ وتكەن ءجون. سونىمەن قاتار ول ەرلەر ارا­سىنداعى حالىقارالىق سپورت شە­بەرى اتانعان (2020). ول 2004 جى­لى 26 اقپاندا تاراز قالاسىندا دۇ­نيە­گە كەلگەن.

سوڭعى جاڭالىقتار

ۇقساس جاڭالىقتار