ايماقتار • 16 قاڭتار، 2022

الماتى قالاسى اكىمدىگىنىڭ عيماراتىن تازالاۋعا 150-دەن استام ۆولونتەر قاتىستى

95 رەت كورسەتىلدى

جاقىندا الماتى قالالىق اكىمدىگىنىڭ ورتەنگەن عيماراتىندا تازارتۋ جۇمىستارى باستالدى. عيماراتتى تازالاۋعا قۇرىلىس كومپانيالارىنىڭ، مەردىگەرلىك جانە ۆولونتەرلىك ۇيىمداردىڭ وكىلدەرى، الماتى تۇرعىندارى قاتىستى، دەپ جازادى Egemen.kz.

ازاماتتىق باستامالاردى قولداۋ ورتالىعىنىڭ باسقارما ءتورايىمى ليما دياستىڭ ايتۋىنشا، قالالىق اكىمدىكتەگى تازالاۋ شارالارىن جۇرگىزۋگە جەرگىلىكتى ەرىكتىلەر عيماراتتاعى تازارتۋ شارالارى اياقتالعانعا دەيىن كومەك كورسەتەتىن بولادى.

«ەلدىڭ جەكەلەگەن ايماقتارىندا توتەنشە جاعداي رەجيمى جاريالانعان سوڭ، ازاماتتىق باستامالاردى قولداۋ ورتالىعى، رەسپۋبليكالىق ۆirgemiz ەرىكتىلەر فرونت-ءوفيسى جانە ۇلتتىق ەرىكتىلەر جەلىسى بىرىڭعاي ەرىكتىلەردى ۇيلەستىرۋ ورتالىعىن قۇردى. مۇندا ءبىز ەرىكتىلەرگە قازاقستاندىقتارعا كومەك كورسەتۋدە اقپاراتتىق جانە ۇيىمداستىرۋشىلىق قولداۋ كورسەتەمىز. قازىر ءار وڭىردە ۆولونتەرلەر شتابى جۇمىس ىستەيدى. وڭىرلىك شتابتاردا تج رەجيمىنىڭ العاشقى كۇندەرىنەن باستاپ ءبىز تارتىپسىزدىكتەردىڭ سالدارىن جويۋعا باعىتتالعان جۇمىسقا كومەكتەسۋگە دايىن ۆولونتەرلەر ءتىزىمىن قۇرا باستادىق. بۇگىن ەلدەگى جاعداي ءبىرشاما تۇراقتانعاندىقتان، الماتى قالاسىنداعى شتابتىڭ ۆولونتەرلەرى ورتەنگەن قالالىق اكىمدىكتىڭ عيماراتىن تازارتۋ جۇمىسىنا قاتىسۋ ءۇشىن سەنبىلىككە شىقتى. ءبىز بۇل جۇمىسقا ۆولونتەرلىك ۇيىمداردى بارىنشا تارتۋعا تىرىستىق. سەنبىلىككە كاسكادەرلار كلۋبى، جانسايا ابدىمالىك ششاحمات كلۋبى، ۆولونتەرلەر ليگاسى، ۇلتتىق ەرىكتىلەر جەلىسى، مۇگەدەكتەر قوعامى، ليدەر كز، ناركوستوپ، قىزىل كرەست، Top.kz، «جاس وتان» جاستار قاناتى، «HAQ» قبف سياقتى ۇيىمداردىڭ 150-دەن استام ۆولونتەرلەرى قاتىستى. قالا اكىمدىگىنىڭ اۋماعىن تازارتۋ جۇمىستارى ءبىر كۇندە اياقتالمايتىنى انىق. ءبىزدىڭ ۆولونتەرلەر بارلىق سەنبىلىكتەرگە شىعاتىن بولادى»، دەدى ليما دياس.

سونىمەن قاتار، الماتىلىق ەرىكتىلەر بۇگىنگى تاڭدا كومەككە مۇقتاج تۇرعىندارعا ازىق-ت ۇلىك سەبەتتەرىن تاراتىپ، قان تاپسىرۋ اكتسيالارىنا، تارتىپسىزدىك كەزىندە جوعالىپ كەتكەن ادامداردى ىزدەۋگە قاتىسىپ جاتىر. سونداي-اق، پسيحولوگيالىق كومەك كورسەتۋگە ارنالعان 1414 جەدەل جەلى جۇمىسىنا قوسىلعان.

ەسكە سالايىق، جاپپاي تارتىپسىزدىكتەر ورىن العان كەزدە الماتى اكىمدىگىنىڭ عيماراتى تولىقتاي جانىپ كەتكەن بولاتىن. كەشەن 1980 جىلى سالىنعان. 1991-1994 جىلدارى مۇندا پرەزيدەنتتىڭ رەزيدەنتسياسى، كەيىن قازاقستان رەسپۋبليكاسىنىڭ ۇكىمەتى ورنالاستى. 1999 جىلدان باستاپ عيماراتتا قالا اكىمدىگى ورنالاسقان.

سوڭعى جاڭالىقتار

ۇقساس جاڭالىقتار