تەمىردەن ءتۇيىن تۇيگەن اينا كەنەسارينا تۋرالى از-كەم اڭگىمە
قازىرگى تاڭدا قىز-كەلىنشەكتەر ارالاسپايتىن سالا جوققا ءتان. ءتىپتى, جانى نازىك ارۋلاردىڭ ەر-ازاماتتاردىڭ عانا قولىنان كەلەدى دەگەن كاسىپتىڭ ءوزىن ادەمى يگەرىپ العانىن كورىپ ءتانتى بولاسىڭ. سولاردىڭ قاتارىندا «قازحروم تۇك» اق فيليالى – اقتوبە فەرروقورىتپا زاۋىتى مەحانيكالىق جوندەۋ تسەحىنىڭ توكارى اينا كەنەسارينانى اتاۋعا ابدەن بولادى.
ول ەرلەردىڭ ءوزى تاۋەكەل ەتە بەرمەيتىن توكارلىق ماماندىققا توسەلىپ العانى سونشالىق, ستانوكتىڭ قۇلاعىندا وينايدى دەسە دە بولعانداي. ونىڭ وسى سالادا ەڭبەك ەتىپ جۇرگەنىنە سەگىز جىلدىڭ ءجۇزى بولىپتى.
بالا كۇنگى ارمانىن جۇزەگە اسىرۋ ماقساتىندا حرومتاۋ قالاسىنداعى كاسىپتىك- تەحنيكالىق ليتسەيدىڭ توكارلار دايارلايتىن بولىمىنە قۇجاتتارىن تاپسىرعاندا وتباسىنداعىلاردىڭ نارازىلىق بىلدىرگەنى دە راس. «ەڭ بولماسا, تىگىنشىلەر دايارلايتىن بولىمىنە تاپسىرساڭ قايتەدى. توكارلىق تەك ەر-ازاماتتارعا ءتان ماماندىق قوي. قىز بالا ءۇشىن اۋىر كاسىپ ەمەس پە؟» دەۋشىلەر دە تابىلدى. بىراق, العان بەتىنەن قايتپايتىن قايسار قىز وسى قارسىلىقتارعا قاراماستان ليتسەيدى ويداعىداي اياقتادى. وقۋ كەزىندە ءدوڭ كەن بايىتۋ كومبيناتىندا تاجىريبەدەن ءوتتى. ءوندىرىس جاعدايىنا كوندىكتى, توكارلىق كاسىپتىڭ قىر-سىرىنا قانىقتى. تاجىريبەدەن ءوتۋ بارىسىندا-اق ءوزىن جاقسى قىرىنان كورسەتە بىلگەن اينانى كومبينات ماماندارى وزدەرىنە جۇمىسقا شاقىردى. ول بۇل شاقىرۋدى قۋانا قارسى الدى. 2006 جىلدان باستاپ 2012 جىلعا دەيىن ءدوڭ كەن بايىتۋ كومبيناتىنىڭ مەحانيكالىق جوندەۋ تسەحىندا توكار بولىپ ابىرويلى ەڭبەك ەتتى. 2013 جىلدان بەرى اقتوبە فەرروقورىتپا زاۋىتىندا مەحانيكالىق جوندەۋ تسەحىنىڭ مەحانيكالىق جوندەۋ ۋچاسكەسىندە وندىرىستىك ەڭبەك جولىن جالعاستىرىپ كەلەدى.
ءبىز ون اعايىندىمىز. مەن وتباسىندا بەسىنشى بالامىن. اعالارىم نۇرلان ءدوڭ كەن بايىتۋ كومبيناتىندا بۇرعىلاۋشى, باۋىرجان «بەلاز» تەحنيكاسىنىڭ جۇرگىزۋشىسى بولىپ جۇمىس ىستەيدى. سوندىقتان شىعار مەنىڭ وندىرىسكە جاقىن بولعاندىعىم. مەن بالا كەزىمنەن شاحتيور بولۋدى ارماندايتىنمىن. مەكتەپتە بىرگە وقىعان قۇربى-قۇرداستارىمنىڭ ءبىرى دارىگەر, ءبىرى مۇعالىم بولسام دەسە مەن ەش ويلانباستان توكار بولامىن دەپ ليتسەيگە قۇجاتتارىمدى تاپسىردىم. نەگە ەكەنى بەلگىسىز, ەر-ازاماتتاردىڭ ىستەيتىن جۇمىستارى مەنى قاتتى قىزىقتىراتىن. وسى ماماندىقتى يگەرگەنىمە ەش وكىنبەيمىن, كەرىسىنشە ماقتان تۇتامىن. ارينە, توكاردىڭ جۇمىسى وتە جاۋاپتى, كۇردەلى بولىپ كەلەدى. بەرىلگەن تاپسىرمالاردى سىزبالار ارقىلى دالمە-ءدال ەتىپ جاساپ شىعارۋ, ءۇزىلىسسىز جۇمىس ىستەپ تۇرعان ستانوكتىڭ شۋىلى, سەگىز ساعات بويى اياقپەن تۇرۋ سياقتى وزىندىك قيىندىقتارى دا جەتەرلىك. بىراق, كۇندەلىكتى وندىرىسكە قاجەتتى بۇيىم جاساپ شىعارىپ, كوپشىلىكتىڭ كوڭىلىنەن شىعىپ جاتقاندا بار قيىندىقتى ۇمىتىپ ءوز كاسىبىڭنەن ءلاززات الاسىڭ. العاش اقتوبە فەرروقورىتپا زاۋىتىنا كەلىپ جۇمىسىمدى جالعاستىرعاندا مەحانيكالىق جوندەۋ ۋچاسكەسىندە توكار بولىپ ىستەيتىن بىردە-ءبىر ايەل ادام جوق ەكەن. ەرلەردىڭ ورتاسىندا جالعىز ءوزىم جۇرگەندە ىڭعايسىزدانعانىم دا راس. قازىر ۇيرەنىپ كەتتىم. ۇجىمداعى اعا بۋىن وكىلدەرى ءوز قىزدارى سياقتى قۇرمەت كورسەتىپ, قامقور بولىپ وندىرىستەگى ءىس-تاجىريبەلەرىمەن ءبولىسىپ, اقىل-كەڭەس بەرىپ وتىرادى, دەيدى اينا كەنەسارينا.
اينانىڭ ەڭبەكسۇيگىشتىگى, جاۋاپكەرشىلىگى, ۇستامدىلىعى, توزىمدىلىك سياقتى قاسيەتتەرى اناسىنان دارىسا كەرەك. اناسى گۇلسارا اۋىل شارۋاشىلىعىندا ەڭبەك ەتە ءجۇرىپ, ون بالانى دۇنيەگە اكەلگەن باتىر انا. بالالارى بۇگىندە ەرجەتىپ ءبىر-ءبىر ماماندىقتى يگەرىپ, تابىستى ەڭبەك ەتۋدە.
جاس تا بولسا ءوز كاسىبىنىڭ جەمىسىن كورىپ, وزىنە جۇكتەلگەن مىندەتتەردى بۇلجىتپاي ورىندايتىن, ەرلەرمەن تەڭ يىق تىرەستىرىپ كەز كەلگەن وندىرىستىك ءىستى دوڭگەلەتىپ الىپ كەتەتىن اينا بوس ۋاقىتىندا سالاماتتى ءومىر سالتىن ۇستانادى, ەرتەلى-كەش جۇگىرۋمەن اينالىسادى. ونەردەن دە قۇرالاقان ەمەس, زاۋىت كولەمىندە وتەتىن تسەحارالىق كوركەمونەرپازدار بايقاۋى, كوڭىلدىلەر مەن تاپقىرلار كلۋبىنىڭ سايىستارى دا ونسىز ءوتىپ كورگەن ەمەس.
ساتىبالدى ءساۋىرباي,
«ەگەمەن قازاقستان».
اقتوبە وبلىسى.
