كوروناۆيرۋس • 12 قاڭتار، 2022

الماتىدا ىندەت قايتا ءورشىدى

73 رەت كورسەتىلدى

سەيسەنبى كۇنى الماتى بيلىگى قالانىڭ تىنىس-تىرشىلىگىن قالپىنا كەلتىرۋ ءىسى بويىنشا اپپاراتتىق كەڭەس وتكىزگەن كەزدە، مەگاپوليستە كوروناۆيرۋس دەرتىنىڭ ەكى ەسە وسكەنى تۋرالى جانە «وميكرون» شتامىنىڭ جىلدام تارالۋى ابدەن مۇمكىن ەكەندىگىن مالىمدەدى. سوندىقتان قالالىق قوعامدىق دەنساۋلىق ساقتاۋ باسقارماسىنا اۋرۋحانالارداعى توسەك-ورىنداردىڭ سانىن كوبەيتۋدە قامسىز وتىرماۋعا تاپسىرما بەرىلدى.

تاريحي تراگەديادان ەسىن جيا الماي وتىرعان قالا تۇرعىندارى وزدەرىن ساقتاپ، كوروناۆيرۋس ىندەتىن اۋىزدىقتاۋ ءۇشىن – ۆاكتسينالاۋ مەن بۋستەرلىك ەكپە الۋعا بارلىق مۇمكىندىك بار ما؟ ناقتى دەرەكتەرگە سايكەس الماتىداعى ەپيدەميالىق جاعداي ناشارلاي تۇسكەن. قالا اكىمىنىڭ ورىنباسارى ەرجان باباقۇماروۆ حابارلاعانداي، شاھار «سارى ايماققا» اۋىستى. حالىقتىڭ اپتا ىشىندە ىندەتكە قايتا دۋشار بولۋى 2 ەسەگە ارتتى. بولجام بويىن­شا، مەگاپوليستە ىندەتتىڭ تاعى ءبىر تولقىنى باستالىپ، جالعاسىپ جاتىر دەسەك تە بولادى. سونىمەن قاتار قالا اكىمىنىڭ ورىنباسارى جا­ڭا­جىلدىق مەرەكەلەر مەن ناق­تى وقيعالارعا بايلانىس­تى تۇرعىندار كوروناۆيرۋسقا تەستىلەۋدەن 8-10 ەسە از وتكەنىن اتاپ ءوتتى. ونىڭ پايىمداۋىنشا، تەستىلەۋ كولەمى ۇلعايعان كەزدە ىندەت جۇقتىرعاندار سانى دا ارتىپ، بۇل ەپيدەميالىق احۋالدىڭ ناشارلاۋى مەن قالانىڭ «قىزىل ايماققا» كوشۋىنە اكەلەدى.

ە.باباقۇماروۆ الماتىدا كوروناۆيرۋس دەرتى بىلتىر جەل­توقسان ايىنىڭ سوڭىندا وسە باستاعانىن ەسكە سالدى. سول كەزدىڭ وزىندە ەپيدەميولوگتار مۇنى «وميكرون» شتامىنىڭ تارا­لۋىنىڭ باستالۋىمەن بايلا­نىستىرعان بولاتىن.

اپپاراتتىق كەڭەس بارى­سىندا اتاپ وتىلگەندەي، 6 قاڭ­تاردا تولىق گەنومدىق سەكۆەنير­لەۋ ناتيجەلەرى الىنىپ، دەن­ساۋلىق ساقتاۋ مينيسترلىگىنە جىبە­رىلگەن 96 ۇلگىنىڭ 8 سىناما­سىنان «وميكرون» شتاممى تابىلدى، ونىڭ ىشىندە 7 سىناما الماتىدان جەتكىزىلدى.

كوروناۆيرۋستىڭ «دەلتا» شتامى ءالى دە بەلسەندى اينالىمدا. ول سىنامالاردىڭ 71%-دا، دەلتا-پليۋس – 16%-دا، باسقا شتامداردا 4،7%-دا انىقتالدى.

الماتىدا ىندەتتىڭ «وميكرون» ءتۇرىن 20-39 جاس­قا دەيىنگىلەر اراسىندا جۇقتىر­عان­داردىڭ ۇلەس سالماعى 16،4%-عا (27،7%-دان 44،1%-عا دەيىن)، سونداي-اق 15-19 جاستاعىلار اراسىندا 1،1%-عا (4،2%-دان 5،3%-عا دەيىن) كۇرت وسكەنىن كور­­سەتەتىن جاس قۇرا­مىنا جۇر­گىزىلگەن تالداۋ راستايدى. قال­عان كونتينگەنتتەر بو­يىن­شا، ناقتى ايتقاندا 60 جانە ودان جوعارى جاستاعى ادامدار اراسىندا – 8،6%-عا، 40-تان 59 جاسقا دەيىنگى ادامدار اراسىندا – 2،5%-عا، 14 جاسقا دەيىنگى بالالار اراسىندا – 4،7%-عا جانە 1 جاسقا دەيىنگى بالالار اراسىندا 0،3%-عا تومەندەگەنى انىقتالعان.

سونىمەن قاتار سيمپتومسىز فورمالاردىڭ وتكەن جىلدىڭ جەل­توقسان ايىندا 6%-دان 16%-عا دەيىن وسكەنى بايقالدى، بۇل «ومي­كرونعا» دا ءتان جانە ناۋقاس­تاردى ۋاقتىلى انىقتاۋ مەن وقشاۋلاۋدى قيىنداتۋى مۇمكىن.

ە.باباقۇماروۆتىڭ ايتۋىنشا، «وميكرون» شتامى وتە تەز جۇعادى، سونداي-اق جاس ۇرپاق ءۇشىن قاۋىپ-قاتەر توندىرەدى. ول ۆاكتسينالاۋ كوروناۆيرۋستان قورعاۋدىڭ ەڭ سەنىمدى ءادىسى بولىپ قالا بەرەتىنىن ەسكە سالدى. قالا اكىمىنىڭ ورىنباسارى الماتىلىقتاردى «ومي­كروننىڭ» تارالۋىن تومەندەتۋدى جانە ۆاكتسي­نالاۋعا كومەكتەسۋگە شا­قىر­دى جانە قالادا حالىقتى كوروناۆيرۋسقا قارسى يممۋنداۋ جالعاسىپ جاتقانىن ايتتى. بۇگىنگى تاڭدا ءبىرىنشى كومپونەنتپەن 1 077 896 ادام، ەكى كومپونەنتپەن – 1 028 180 قالا تۇرعىنى ەگىلدى. رەۆاكتسينالاۋ 69 018 ادامعا جۇرگىزىلدى.

الەمنىڭ جەتەكشى عالىمدارى مەن ساراپشىلارىنىڭ دەرەكتەرى بويىنشا، قولدانىستاعى ۆاكتسينالارمەن رەۆاكتسينالاۋ «ومي­كرون» شتامىمەن جۇق­تىرۋ كەزىندە اسقىنعان جانە ءولىم جاعدايلارىن ەمدەۋگە جاتقىزۋدان 70%-عا قور­عاي­دى. الماتىدا ۇجىمدىق يم­مۋ­نيتەتتىڭ دەڭگەيى ءالى دە تو­مەن، يممۋندىق قابات بار بول­عانى 59،4%-دى قۇرايدى (ۆاك­تسي­نالانعاندار – 49،4%، اۋىرىپ جازىلعان ادامدار – 10%).

 

الماتى

سوڭعى جاڭالىقتار

وتكەن تاۋلىكتە 8 ادام كۆي جۇقتىردى

كوروناۆيرۋس • بۇگىن، 10:35

ۇقساس جاڭالىقتار