– ۇنەمى جىميىپ جۇرەتىن جىلى ءجۇزدى مەيىرحاننىڭ تاباندى, قايسار مىنەزى اسكەري ادامعا ءتان ەدى. «اپاي, مەن مەكتەپ بىتىرگەن سوڭ قالايدا اسكەري قىزمەتكەر بولۋدى قالايمىن» دەيتىن ەدى. تاباندى بوزبالا سوزىندە تۇرىپ اتتەستاتىن قولىنا العان سوڭ وقۋ گرانتىمەن ءوزى قالاعان وقۋ ورنىنا وقۋعا ءتۇستى, –دەيدى №11 مامانداندىرىلعان فيزيكا-ماتەماتيكا گيمنازياسىنىڭ ديرەكتورى ز.قورازوۆا.
مەيىرحاننىڭ 7-سىنىپتا تانىسقان دوسى ازامات سۇلتانوۆتىڭ ايتۋىنشا, ەكەۋى مەكتەپ قابىرعاسىندا جۇرگەندە الماتىداعى ۇلتتىق قاۋىپسىزدىك كوميتەتى شەكارا اكادەمياسىندا وقۋدى جوسپارلايدى. مەكتەپتى ازاماتتان ءبىر جىل بۇرىن بىتىرگەن مەيىرحان سوزىندە تۇرىپ, 2020 جىلى اتالعان اكادەميانىڭ كۋرسانتى اتانادى, ال ازامات ءبىر جىلدان سوڭ بارىپ كۋرسانتتار قاتارىن تولىقتىرادى.
الماتىدا اياق استىنان دۇربەلەڭ باستالعان ساتتە ارنايى بۇيرىقپەن قولىنا قارۋىن الىپ وتان قورعاۋعا ۇمتىلعان جاس سارباز ەرلىكپەن قازا تاپتى. «تاۋەلسىز ەلىمە ەڭبەك ەتەمىن!» دەيتىن ەلىن سۇيگەن پاتريوت مەيىرحان ەرجان ۇلى وفيتسەر بولىپ ەلىنە قىزمەت ەتىپ شەكارا شەبىندە جۇرۋگە ۇلگەرگەن جوق, بىراق نەبارى 19 جاسىندا ەلدى, جەردى ءسۇيۋدىڭ, وتاندى قورعاۋدىڭ قانداي بولاتىنىن ءوز ەرلىگىمەن دالەلدەپ كەتتى. ول قازا تاپقان سوڭ, مارقۇم بولعان ءوز قارۋلاستارىمەن بىرگە 2022 جىلى 9 قاڭتاردا مەملەكەت باسشىسى ق.توقاەۆتىڭ جارلىعىمەن اسكەري جانە قىزمەتتىك بورىشىن اتقارۋ ۇستىندە كورسەتكەن باتىلدىعى مەن جانقيارلىعى, سونداي-اق مەملەكەت مۇددەسىن قورعاۋ كەزىندە جاساعان ەرلىگى ءۇشىن
III دارەجەلى «ايبىن» وردەنىمەن ماراپاتتالدى.
اقتاۋ قالاسىنا جەتكىزىلگەن مەيىرحاننىڭ دەنەسىن ماڭعىستاۋ وبلىسىنىڭ اكىمى ن.نوعاەۆ باستاعان ەل ازاماتتارى, مارقۇمنىڭ اكەسى ەرجان, تۋىستارى مەن دوستارى قارسى الدى. مارقۇمدى تۋعان شاڭىراعىنا ءبىر تۇنەتىپ, 10 قاڭتار كۇنى جانازا نامازى وقىلدى. «دوستىق» ءۇيىنىڭ اۋلاسىنا مەيىرحاندى شىعارىپ سالۋعا جينالعان ادام وتە كوپ بولدى.
– مەيىرحان بالامىز ناعىز ەرلەرشە كوز جۇمدى. ازامات ءۇشىن ەڭ باستى مىندەت – وتاندى قورعاۋ! مەملەكەتىمىزدى قورعاۋ جولىندا جانىن قۇربان ەتكەن مەيىرحان ەرجان ۇلىنىڭ ەرلىگى كوپكە ۇلگى, ەسىمى ەل ەسىندە. ەلىمىز امان بولسىن, ەندىگى جەردە حالىقتىڭ باسىنا قيىندىق تۇسپەسىن, جاستاردىڭ باسىنا جاماندىق جولىقپاسىن. مەن ءبىتىم اعا باستاعان كەزباەۆتار اۋلەتىنە قايعىرا كوڭىل ايتا تۇرىپ, باتىر ۇل تاربيەلەگەن وتباسىعا العىس ايتامىن, – دەدى ايماق باسشىسى.
مەيىرحان تۋىپ-وسكەن اۋلەت ماڭعىستاۋ وڭىرىنە بەلگىلى, سىيلى, تەكتى اۋلەت. تەك جاعىنان 27 جاسىندا ەل-جەر قورعاۋ ءۇشىن قان مايداندا شەيىت بولعان ادايداعى بەلگىلى ەسەنياز باتىردىڭ تۇقىمى بولىپ كەلەتىن مەيىرحاننىڭ اتاسى ءبىتىم اقساقال – مۇناي ءوندىرىسى سالاسىندا سەرۆيستىك قىزمەت كورسەتىپ, مىڭنان استام ادامدى جۇمىسپەن قامتىپ, ەل ەكونوميكاسىنىڭ دامۋىنا زور ۇلەس قوسىپ كەلە جاتقان «كەزبي» جشس قۇرىلتايشىسى. ال مەيىرحان – وتباسىنىڭ تۇڭعىشى, اكەسى ەرجان – جەكە كاسىپكەر.
ءوزى «التىن بالام» دەپ اتايتىن نەمەرەسىنىڭ جانازاسىندا ءبىتىم اعاي, تۋىسى تاجماعانبەت اقساقال, ۇستازدارى مەن دوستارى ءسوز الىپ, كەشە عانا ارادا جۇرگەن سۇيكىمدى جاس جىگىتكە قيماستىقپەن قينالا تۇرىپ قوشتاسۋ ءسوز ارنادى.
ماڭعىستاۋ وبلىسى بويىنشا شەكارا قىزمەتى دەپارتامەنتىنىڭ باستىعى الىبەك كويۋپوۆ ءسوز الىپ, «مەيىرحان ارىپتەسىمىز ەندى انا الەمنەن شەكارا شەبىن قورعاۋعا كەتتى. ەرلىكپەن قازا تاپقان مارقۇمنىڭ توپىراعى تورقا بولسىن!» دەپ كوڭىل بىلدىرسە, جاۋىنگەرلەر ءۇش مارتە وق اتتى.
اسكەري وركەستر قازاقستان رەسپۋبليكاسىنىڭ مەملەكەتتىك ءانۇرانىن ورىنداعان ساتتە كوك تۋدى جامىلىپ جاتقان جاس باتىردىڭ قۇلاعىندا قالاتىن سوڭعى ساز, جەردىڭ ءۇستى – جارىق دۇنيەدەن ەستيتىن سوڭعى ءانى ءوزى سۇيگەن, ءوزى جانىن قۇربان ەتكەن تۋعان ەلىنىڭ ءانۇرانى بولدى.
قوش بول, ەرەن ەرلىكتىڭ ۇلگىسى – جاس باتىر!
ماڭعىستاۋ وبلىسى
