نۇرسەرىك ءشارىپوۆتىڭ كانديداتۋراسىن قازاقستان رەسپۋبليكاسى جوعارعى سوتىنىڭ سۋدياسى قىزمەتىنە كونكۋرستان تىس تارتىپپەن سايلاۋ ءۇشىن سەناتتىڭ قاراۋىنا پرەزيدەنت قاسىم-جومارت توقاەۆ ەنگىزدى.
قر جوعارى سوت كەڭەسىنىڭ توراعاسى دەنيس شيپپ نۇرسەرىك ءشارىپوۆتىڭ 25 جىلدان استام سۋديالىق جۇمىس تاجىريبەسى بار ەكەنىن حابارلادى. سوت قىزمەتىن الماتى قالاسىنداعى اۋداندىق سوتىنىڭ سۋدياسى بولىپ باستادى, ەكى اۋداندىق سوتتى - الماتى مامانداندىرىلعان اۋدانارالىق اكىمشىلىك سوتىن جانە ماڭعىستاۋ وبلىسىنىڭ مامانداندىرىلعان اۋدانارالىق ەكونوميكالىق سوتىن باسقاردى. ودان ءارى ماڭعىستاۋ وبلىستىق سوتىنىڭ اپەللياتسيالىق سوت القاسىن باسقارىپ, وڭتۇستىك قازاقستان وبلىستىق سوتىنىڭ توراعاسى, قر جوعارعى سوتى اپپاراتىنىڭ باسشىسى بولدى. 2018 جىلدىڭ جەلتوقسان ايىنان باستاپ قاراعاندى وبلىستىق سوتىنىڭ توراعاسى قىزمەتىن اتقاردى.
«سۋديالىق قوعامداستىقتا بەدەلگە يە, قر جوعارعى سوتى سۋدياسىنىڭ جاۋاپتى جۇمىسىنا دايىن», دەدى قر جوعارى سوت كەڭەسىنىڭ توراعاسى دەنيس شيپپ.
دەپۋتاتتار بۇل ۇسىنىستى قولدادى.
«قازاقستان رەسپۋبليكاسى پرەزيدەنتىنىڭ 2021 جىلعى 27 جەلتوقسانداعى ۇسىنىسى نەگىزىندە جانە قازاقستان رەسپۋبليكاسى كونستيتۋتسياسىنىڭ 55-بابىنىڭ 1) تارماقشاسىنا, 82-بابىنىڭ 1-تارماعىنا جانە «قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» قازاقستان رەسپۋبليكاسى كونستيتۋتسيالىق زاڭىنىڭ 31-بابىنىڭ 1-تارماعىنا سايكەس قازاقستان رەسپۋبليكاسى پارلامەنتىنىڭ سەناتىنا نۇرسەريك كارىم ۇلى ءشارىپوۆتى قازاقستان رەسپۋبليكاسى جوعارعى سوتىنىڭ سۋدياسى قىزمەتىن كونكۋرستان تىس تارتىپپەن سايلاۋ ۇسىنىلسىن», دەپ وقىدى سەناتور ۆلاديمير ۆولكوۆ.
ءوز كەزەگىندە نۇرسەرىك ءشارىپوۆ ءوز مىندەتتەرىن ادال اتقارۋعا, سوت تورەلىگىن قر كونستيتۋتسياسى مەن زاڭدارىنا عانا باعىنا وتىرىپ جۇزەگە اسىرۋعا انت بەردى.
