وسىنداي ءدۇبىرلى دودادا بوي كورسەتۋ ءار سپورتشى ءۇشىن ۇلكەن ابىروي ءارى زور مارتەبە ەكەنى بەلگىلى. ءبىر جاعىنان الەمدىك رەيتينگتە جوعارىلاۋعا تاماشا مۇمكىندىك تۋىندايدى, ەكىنشى جاعىنان ماتەريالدىق جاعداي دا كۇرت جاقسارادى. الايدا بىرقاتار ايگىلى تەننيسشىلەر مەلبۋرنگە بارۋدان باس تارتىپ وتىر. ارقايسىسىنىڭ ءوز ۋاجدەرى بار. ماسەلەن, نوۆاك دجوكوۆيچ كوروناۆيرۋسكە قارسى ۆاكتسينا الۋدى قالامايدى. باسقا دا ءبىراز تەننيسشى ءدال سونداي ۇستانىمدا. ال ۇيىمداستىرۋشىلار ونسىز جارىسقا قاتىسۋعا تىيىم سالىپ وتىر.
ساراپشىلار مەن ماماندار جاسىل قۇرلىققا الەمدىك تەننيستىڭ جارقىن جۇلدىزدارىنىڭ كەلمەۋى جارىستىڭ دەڭگەيىن كۇرت تومەندەتەدى دەپ ەسەپتەيدى. سول سەبەپتى دە ولار دجوكوۆيچ باستاعان ساڭلاقتارعا اۋستراليانىڭ اشىق بىرىنشىلىگىنە ۆاكتسيناسىز-اق قاتىسۋىنا رۇقسات بەرۋى جايىندا ءوتىنىش بىلدىرۋدە.
