ءماجىلىس سپيكەرى اتاپ وتكەندەي, وسى سەسسيا باستالعاننان بەرى ءماجىلىس جۇمىسىندا 80 زاڭ جوباسى بولدى, ونىڭ 39-ى ماقۇلدانىپ, سەناتقا جىبەرىلدى, 25 زاڭعا ەل پرەزيدەنتى قول قويدى.
«ەلباسى نۇرسۇلتان ءابىش ۇلى نازارباەۆتىڭ ستراتەگياسىن جانە ەل پرەزيدەنتى قاسىم-جومارت كەمەل ۇلى توقاەۆتىڭ اۋقىمدى رەفورمالارىن زاڭنامالىق قولداۋ ءۇشىن ءماجىلىس دەپۋتاتتارى وسى سەسسيانىڭ باسىنان باستاپ بىرقاتار جاڭا زاڭ جوبالارىن ازىرلەدى. ولار, ەڭ الدىمەن, ەكونوميكانى قالپىنا كەلتىرۋگە, ەلدىڭ ونەركاسىپتىك الەۋەتىن نىعايتۋعا, بيولوگيالىق قاۋىپسىزدىكتى قامتاماسىز ەتۋگە, ازاماتتىق قوعامدى دامىتۋعا جانە, ارينە, قازاقستاندىقتاردىڭ ءال-اۋقاتىن ارتتىرۋعا باعىتتالعان. وسى ماسەلەلەردىڭ بارلىعى وزەكتى كۇن ءتارتىبىن قالىپتاستىرادى جانە ەلىمىزدىڭ ودان ءارى الەۋمەتتىك-ەكونوميكالىق دامۋىنا ىقپال ەتەتىن بولادى», دەدى نۇرلان نىعماتۋلين.
وسى سەسسيادا ءماجىلىس دەپۋتاتتارى ماقۇلداعان زاڭ جوبالارىنىڭ ىشىندە - ادام قۇقىقتارى جونىندەگى ۋاكىل تۋرالى, سوت جۇيەسى مەن سۋديالاردىڭ مارتەبەسى تۋرالى, قۇقىق قورعاۋ ورگاندارى, پروكۋراتۋرا مەن سوت اراسىنداعى وكىلەتتىكتەردىڭ اراجىگىن اجىراتاتىن ءۇش بۋىندى مودەلدى ەنگىزۋ ماسەلەلەرى بويىنشا زاڭ جوبالارى بار.
مەملەكەتتىڭ ەكونوميكالىق ساياساتىن زاڭنامالىق قامتاماسىز ەتۋ ودان ءارى جەتىلدىرىلدى. ماقۇلدانعان زاڭ جوبالارىنىڭ قاتارىندا ونەركاسىپتىك ساياسات تۋرالى, باسەكەلەستىكتى دامىتۋ ماسەلەلەرى بويىنشا, مەملەكەتتىك ساتىپ الۋعا, جەر قويناۋىن پايدالانۋشىلار مەن تابيعي مونوپوليالار سۋبەكتىلەرىنىڭ ساتىپ الۋىنا قاتىستى زاڭ جوبالارى بار.
سونىمەن قاتار, ءماجىلىس دەپۋتاتتارى تاۋەلسىزدىكتىڭ 30 جىلدىعىنا بايلانىستى راقىمشىلىق جاساۋدى, مەملەكەتتىك باسقارۋ دەڭگەيلەرى اراسىندا وكىلەتتىكتەردى قايتا ءبولۋدى, كاسىپكەرلىك قىزمەت سالاسىندا جاڭا رەتتەۋ ساياساتىن ەنگىزۋدى, بيرجالىق ساۋدانى دامىتۋ مەن جاساۋدى كوزدەيتىن زاڭ جوبالارىن ماقۇلدادى.
«جالپى, ءماجىلىستىڭ دەپۋتاتتىق كورپۋسىنىڭ جۇمىسى سەسسيانىڭ العاشقى كۇندەرىنەن باستاپ ايتارلىقتاي قارقىندى جانە مازمۇندى بولدى», دەپ اتاپ ءوتتى ءماجىلىس سپيكەرى.
ول وسى سەسسيانىڭ باسىنان باستاپ 5 ۇكىمەت ساعاتى, ءماجىلىس كوميتەتتەرىنىڭ 4 كوشپەلى وتىرىسى, 1 حالىقارالىق كونفەرەنتسيا مەن 9 «دوڭگەلەك ۇستەل» وتكىزىلگەنىن اتاپ ءوتتى.
پارلامەنتشىلەر قىزمەتىنىڭ حالىقارالىق باعىتى تۋرالى ايتا كەلە, نۇرلان نىعماتۋلين قىركۇيەكتە تۇركىستاندا وتكەن تۇركىتىلدەس مەملەكەتتەر پارلامەنتتىك اسسامبلەياسىنىڭ (تۇركپا) ح پلەنارلىق وتىرىسىن ەسكە سالدى. ونىڭ جۇمىسىنا ازەربايجان, قازاقستان, قىرعىزستان, تۇركيا, سونداي-اق وزبەكستان مەن ۆەنگريادان پارلامەنتتىك دەلەگاتسيالار قاتىستى. سونىمەن قاتار, ءماجىلىس سپيكەرى وتىرىستا العاش رەت مودەلدىك زاڭدار قابىلدانعانىن, بۇل تۇركپا قىزمەتىنىڭ زاڭ شىعارۋشىلىق باعىتىنىڭ كۇشەيۋىن ايعاقتايتىنىن اتاپ ءوتتى.
«كەلەسى, 2022 جىلى ءبىزدى ودان دا كوپ جۇمىس كۇتىپ تۇر. بارلىق فراكتسيالاردىڭ, بارلىق دەپۋتاتتاردىڭ بىرلەسكەن جۇمىسىنىڭ ارقاسىندا پارلامەنت ءماجىلىسى ەل باسشىلىعىنىڭ ساياساتىن ساپالى ءارى ءتيىمدى زاڭنامالىق قولداۋدى قامتاماسىز ەتەتىنىنە سەنىمدىمىن», دەپ قورىتىندىلادى نۇرلان نىعماتۋلين.
