ءىس-شاراعا «ەلباسى مەدالىنىڭ» يەگەرلەرى, ەلىمىزدىڭ بەلگىلى مەملەكەت جانە قوعام قايراتكەرلەرى, مەملەكەتتىك ورگانداردىڭ وكىلدەرى, عالىمدار مەن بەلسەندى جاستار قاتىستى.
«ەلباسى مەدالى» – جاستاردى كەشەندى دامىتۋعا باعىتتالعان ۇلتتىق دەڭگەيدەگى باعدارلاما. قاتىسۋشىلار «التىن», «كۇمىس» نەمەسە «قولا» دەڭگەيلەرىن تاڭداپ, جەتى باعىت بويىنشا داعدىلاردى دامىتادى: سپورت, تالانتتار مەن داعدىلار, كىتاپ وقۋ, ۇلتتىق مۇرا, ۆولونتەرلىك, تۋريستىك جورىقتار, ەڭبەك تاجىريبەسى. قاتىسۋشىلار ءتۇرلى كەزەڭنەن ءوتۋى ءتيىس. فيناليستەر «ەلباسى مەدالىن» يەلەندى. باعدارلاماعا 14-29 جاس ارالىعىنداعى جاس قازاقستاندىقتار قاتىستى.
ءىس-شارا ۇيىمداستىرۋشىلارىنىڭ ايتۋىنشا, بۇل وسكەلەڭ ۇرپاق ءۇشىن وتە ءتيىمدى جوبا. سەبەبى الدىنا قويعان ماقساتتارىنا جەتۋ ءۇشىن ۇلكەن ىنتالاندىرۋ ىسپەتتەس. «بۇگىندە جاستارعا ۇلكەن كوڭىل بولىنۋدە. جاستاردىڭ جەكە تۇلعا بولىپ قالىپتاسۋى ءۇشىن بارلىق مۇمكىندىك جاسالۋدا. «ەلباسى مەدالى» باعدارلاماسى – بۇل ءبىلىمدى جەتىلدىرۋگە جانە تۇلعالىق وسۋگە باعىتتالعان بىرەگەي جوبا. جوبا قاتىسۋشىلاردىڭ تالانتتارىن اشۋعا كومەكتەسەدى, ولار بىلىمگە ۇمتىلادى, قوعام ومىرىنە بەلسەندى قاتىسادى, بولاشاقتا ومىردە پايدالى بولاتىن تاجىريبە جينايدى. جاستار – ەلىمىزدىڭ بولاشاعى. سوندىقتان بۇگىنگى جاستار ءبىلىمدى, تالانتتى, تابىستى, ينتەللەكتۋالدى جانە بەلسەندى بولۋى كەرەك. بۇل ءۇشىن بارلىق جاعداي جاسالۋدا», دەدى قازاقستان جاستار كونگرەسىنىڭ اتقارۋشى ديرەكتورى توقتار بولىسوۆ.
2021 جىلعى 15 جەلتوقساندا نۇر-سۇلتان قالاسىندا «ەلباسى مەدالى» باعدارلاماسىنا قاتىسۋشىلاردى ماراپاتتاۋ جونىندەگى كوميسسيانىڭ وتىرىسى ءوتتى. كوميسسيا باعدارلامانى ىسكە اسىرۋ ناتيجەلەرىن قاراپ, باعدارلامانى تابىستى اياقتاعان 2 259 ادامدى ماراپاتتاۋعا ۇسىندى. ولاردىڭ 2 216-سى قولا, 40-ى كۇمىس جانە 3-ەۋى التىن مەدال يەلەندى. سونداي-اق 344 قاتىسۋشى باعدارلامانى اياقتاپ, سەرتيفيكات الادى.
قازىرگى ۋاقىتتا «ەلباسى مەدالى» باعدارلاماسىنا 20 000-نان استام ادام قاتىسۋدا. ونىڭ 83%-ى – مەكتەپ وقۋشىلارى, 11%-ى – ستۋدەنتتەر, 6%-ى –جۇمىس ىستەيتىن جاستار, 24%-ى – اۋىلدىق جەرلەردەن كەلگەن قاتىسۋشىلار. 2019 جىلدان باستاپ جالپى العاندا مەدالداردى 6 186 قازاقستاندىق الدى, مەملەكەتتىك ءبىلىم بەرۋ گرانتتارى «ەلباسى مەدالىنىڭ» 605 يەگەرىنە بەرىلدى, ولاردىڭ 30%-دان استامى – اۋىل مەكتەپتەرىنىڭ تۇلەكتەرى.
