شارا قازاقستان تاۋەلسىزدىگىنىڭ 30 جىلدىعىنا ارنالدى.
ۇلت قايراتكەرلەرى احمەت بايتۇرسىن ۇلى, جۇمابەك تاشەنەۆ, قانىش ساتباەۆ, مۇقاعالي ماقاتاەۆ, جاڭگىر حان مەن دومالاق انانىڭ ومىرىنە ارنالعان تاريحي تۋىندىلار «Qazaqstan» ارناسىنىڭ ەفيرىنەن تاۋەلسىزدىك مەرەكەسى قارساڭىندا كورسەتىلە باستادى.
ال اتى اڭىزعا اينالعان كسرو حالىق ءارتىسى جانە حالىق قاھارمانى روزا باعلانوۆانىڭ ونەگەلى ءومىرىنىڭ جارقىن ساتتەرى مەن قيىن كەزەڭدەرىن باياندايتىن «بۇلبۇل» تەلەحيكاياسىن كورەرمەندەر «حابار» ارناسىنىڭ ەفيرىنەن كورە الادى. سونداي-اق «Almaty TV» تەلەارناسى ءومىرىنىڭ سوڭىنا دەيىن ەلىم-جەرىم دەپ ەزىلگەن وجەت كۇرەسكەر تۇرار رىسقۇلوۆتىڭ ءومىر جولىن باياندايتىن «قىزىل جەبە» تەلەسەريالىن تۇسىرسە, «31 تەلەارنا» ۇلى اقىن جامبىل جاباەۆ پەن جاس رەپەر جامبونىڭ تاعدىرىنا ارنالعان «جۇرەك جىرى» تەلەسەريالىن كورەرمەنگە ۇسىنىپ وتىر.
«كينو – ۇرپاق ساناسىن قالىپتاستىراتىن يدەولوگيالىق قۇرال. جاھاندانۋ داۋىرىندە ءومىر ءسۇرىپ, الەمدىك مادەنيەتتىڭ مىڭ سان بوياۋى ءبىر ارنادا ارالاسىپ كەتكەن زاماندا ەسىك-تەرەزەمىزدى قىمتاپ, وركەنيەتتەن بولەكتەنىپ ءومىر سۇرە الماسىمىز انىق. وسى رەتتە ۇلتتىق يدەولوگيامىزدى ناسيحاتتاۋدا, ۇرپاققا ۇلاعاتتى تاربيە بەرۋدە, ۇلتتىق سيپاتىمىزدى تانىتۋدا كينو ونەرىنىڭ الار ورنى ەرەكشە. سوندىقتان مەملەكەت باسشىسى قاسىم-جومارت كەمەل ۇلى توقاەۆ «تاۋەلسىزدىك بارىنەن قىمبات!» ماقالاسىندا اتالعان سالاعا ايرىقشا باسىمدىق بەردى. پرەزيدەنت ماقالاسىندا «مەن قۇزىرلى ورگاندار مەن وتاندىق تەلەارنالارعا مەملەكەتتىك تاپسىرىستىڭ بەلگىلى ءبىر بولىگىن مىندەتتى تۇردە تاريحي تاقىرىپتارعا باعىتتاۋدى تاپسىرامىن» دەگەن بولاتىن», دەدى شارانىڭ اشىلۋىندا قر مەملەكەتتiك حاتشىسى قىرىمبەك كوشەرباەۆ.
شاراعا قاتىستى ۇيىمداستىرىلعان دوڭگەلەك ۇستەل بارىسىندا قاتىسۋشىلار وتاندىق سەريال نارىعىنىڭ بۇگىنى مەن ەرتەڭى جايلى ءسوز قوزعاپ, وزەكتى مالەسەلەردى تالقىلادى. قر اقپارات جانە قوعامدىق دامۋ ءمينيسترى ايدا بالاەۆا قازاقستاندىق تەلەسەريالداردى ءتۇسىرۋ باعىتىندا انىقتالعان پروبلەمالاردى اتاپ ءوتىپ, ونىڭ شەشۋ جولدارىن ۇسىندى.
«وتاندىق تەلەسەريالدار ءتۇسىرۋ جوباسىنا مادەنيەت جانە سپورت مينيسترلىگى جانىنان قۇرىلعان ۇلتتىق كينونى قولداۋ مەملەكەتتىك ورتالىعىنىڭ الەۋەتىن پايدالانۋ. بۇل ءبىرىنشى كەزەكتە قارجى جەتىسپەۋشىلىگىنە بايلانىستى ماسەلەنى شەشۋگە بىردەن ءبىر سەپتىگىن تيگىزەر ەدى. ەكىنشىدەن, مەملەكەتتىك اقپارات تاپسىرىسى شەڭبەرىندە بولىنەتىن قارجىنى ءۇش جىلدىق بيۋدجەت فورماتىنا اۋىستىرۋ. بۇل تاريحي تۋىندىلاردى تۇسىرۋگە جەتكىلىكتى ۋاقىت بەرىپ, ءتۇسىرىلىم بارىسىندا تۋىنداعان ماسەلەلەردى ساپالى شەشۋگە وڭ ىقپال ەتەر ەدى. تاعى ءبىر اتاپ وتەتىن ماسەلە تاريحي تۋىندىلار تۇسىرۋگە قاجەتتى رەكۆيزيتتەردىڭ جەتىسپەۋشىلىگى ءجيى ورىن الادى. بۇل رەتتە, «قازاقفيلمنىڭ» بالانسىنداعى كوستيۋمدەر مەن دەكوراتسيالاردى جەڭىلدىكپەن نەمەسە تەگىن پايدالانۋ مۇمكىندىگى قاراستىرىلسا. بۇگىندە ولاردى سەريالدارعا قولدانۋ ءۇشىن قوماقتى تولەماقى تالاپ ەتىلەدى. بۇل دا ءوز كەزەگىندە بولىنگەن قارجىعا ايتارلىقتاي سالماق سالادى», دەدى مينيستر ءوز سوزىندە.
