26 جاستاعى قوستانايلىق 20 جەلتوقساندا «قوستاناي-پلازا» ساۋدا ورتالىعىنىڭ ءبىرىنشى قاباتىنداعى اشىق دالىزدە شەگەنىڭ ۇستىندە 4 ساعات بويى جالاڭاياق تۇردى. اتالعان ءىس-شاراعا الماتى قالاسىنان ارنايى كەلگەن داريا يۆشينا دا قاتىستى. ەكەۋى شەگەنىڭ ۇستىنە ساعات 10-نان 42 مينۋت كەتكەندە شىقتى.
داۆيد وسىدان 3 جىل بۇرىن چەليابىدە ءبىر ايلىق كىشى مەديتسينا مامانى كۋرسىندا وقىپ ءجۇرىپ, سادحۋ تاقتايىن جاسايتىن كاسىپورىنعا ۋاقىتشا جۇمىسقا كىرىپتى.
– شەگە قاعىلعان تاقتايدىڭ ۇستىنە ەڭ العاش سول جەردە تۇرىپ كوردىم. كەيىن قوستانايعا ورالعان سوڭ ءارى قاراي دامىتا باستادىم. 2019 جىلى تۇڭعىش رەت ساۋدا ورىندارىنىڭ بىرىنە بارىپ كوپشىلىكتىڭ الدىنا شىعىپ, ءبىر ساعات جەكە رەكوردىما قول جەتكىزدىم. بۇل جولى 7 ساعاتتان كەم تۇرماۋعا بەكىنىپ كەلدىم, – دەدى داۆيد.
د.اسانوۆتىڭ سوزىنە قاراعاندا, شەگەنىڭ ۇستىندە جالاڭاياق تۇرۋ مەديتاتسيا, پسيحولوگيامەن تىعىز بايلانىستى ونەر ەكەن. مۇنى فيتنەس باعىتتارىنىڭ ءبىرى – بۇلشىق ەتتى سوزىپ, ادامدى يكەمدى بولۋعا بەيىمدەيتىن سترەتچينگ جاتتىقتىرۋشىسى بولىپ جۇمىس ىستەپ جۇرگەن داريا يۆشينا دا راستايدى.
– شەگەدە تۇرۋعا ۇيرەتەتىن ارنايى مەكتەپتەر بار. جالپى, ادامنىڭ جەتى دەنەسى بار, ونىڭ التاۋى وتە جۇقا بولادى, قالىڭى جەتىنشىسى – فيزيكالىق دەنە. شەگەنىڭ ۇستىنە شىققان ادامنىڭ مەنتالدى, ەموتسيونالدى جانە فيزيكالىق دەپ اتالاتىن ءۇش دەنەسى شىنىعادى. مەنتالدى دەنە دەگەنىمىز ءبىزدىڭ باسىمىزدا توقتاۋسىز ءجۇرىپ جاتاتىن وي-قيالىمىز. وسىلاردىڭ ناتيجەسىندە ەموتسيونالدى نەمەسە ەفيرلى دەنە پايدا بولادى. ياعني ادامنىڭ ىشكى كۇيزەلىس-قۋانىشىنان تۇراتىن جاعىمدى نەمەسە جاعىمسىز ەموتسيا قالىپتاسادى. ەموتسيا بولىپ بەكىگەن وي دەنەگە تۇراقتايدى. ءتان مۇنىڭ ءبارىن جازىپ الادى. وسى جازىلىپ قالعان نارسەنى ۋاقتىلى سىرتقا شىعارىپ وتىرماساق, مۇنىڭ سوڭى اۋرۋعا, جۇيكە دەرتىنە, كۇيزەلىسكە اكەپ سوقتىرۋى مۇمكىن. ادام وسىلايشا, وزىمەن ءوزى تانىسۋدى, ءوزىنىڭ ىشكى الەمىن تانۋدى ۇيرەنەدى. ءبىزدىڭ بەتپەردەمىز باسقا دا, ىشكى مەنىمىز مۇلدە باسقا بولىپ شىعۋى مۇمكىن. قولدان كەلگەنشە, وسى ەكەۋىن ۇيلەستىرە ءبىلۋ كەرەك, – دەدى داريا.
د.يۆشينا 2 ساعات 22 مينۋتتان كەيىن شەگەدەن ءتۇستى. ال داۆيد 4 ساعاتقا دەيىن شىداپ تۇردى. الايدا قازاقستان رەكوردتار كىتابىنىڭ وكىلى باقىتجان تاستۇلەكوۆكە حابارلاسىپ كورىپ ەدىك, ول كىسى قوستانايلىق ۇمىتكەردىڭ بۇل ەڭبەگى رەسمي رەكورد رەتىندە تىركەلمەيتىنىن ايتتى.
– قازاقستان رەكوردتار كىتابىنىڭ ەرەجەسى بويىنشا ادامنىڭ دەنساۋلىعىنا زاقىم كەلتىرەتىن رەكورد بولسا, ءبىز ونى تىركەمەيمىز. ماسەلەن, ۇشكىر شەگەنىڭ ۇستىندە تۇرىپ تابانى جاراقاتتانسا, ادامنىڭ دەنەسىنە دە زاقىم كەلگەنى عوي. ءبىز ادامنىڭ رۋحىن كوتەرەتىن, بيىك جەڭىستەرگە جەتەلەيتىن رەكوردتاردى عانا تىركەيمىز. كىتاپتىڭ 20 شاقتى ادامنان قۇرالعان رەداكتسيالىق القاسى بار. ولار ءوز ءسوزىن ايتادى. داۆيد اسانوۆ ماعان ءوزىنىڭ رەكوردىن WhatsApp ارقىلى جىبەرگەننەن كەيىن, مەن ونى رەداكتسيا القاسىنىڭ چاتىنا سالىپ جىبەرگەم. بىراق ولار ماقۇلداي قويمادى. ويتكەنى ءبىز بۇعان دەيىن وسىعان ۇقساس دەنساۋلىققا قاۋىپتى ءبىر-ەكى رەكوردتى تىركەگەنبىز. وسىدان كەيىن جۇرتتار ءارتۇرلى رەكوردتاردى ويلاپ تاۋىپ, نە بولسا, سونى ۇسىنىپ جاتىر. ولارعا قوي دەمەسەك, بۇل جاقسى ءۇردىس ەمەس. سوندىقتان ءبىز بۇل رەكوردتى تىركەگەن جوقپىز, – دەدى باقىتجان تاستۇلەكوۆ.
ال د.اسانوۆ الداعى جىلدىڭ كۇزىنە دەيىن دايىندىعىن ءپىسىرىپ الىپ, قىركۇيەك ايىندا تاعى ءبىر باق سىناپ كورمەك.
