تۇساۋكەسەردىڭ اشىلۋ سالتاناتىندا ۋنيۆەرسيتەتتىڭ ءبىرىنشى پرورەكتورى, «تۇران» ءبىلىم بەرۋ كورپوراتسياسىنىڭ ۆيتسە-پەرزيدەنتى, پروفەسسور, قازاقستان ماركەتينگ قاۋىمداستىعىنىڭ پرەزيدەنتى, ەنتسيكلوپەديانىڭ باس رەداكتورى قۋانىش تازابەكوۆ ءسوز سويلەپ, ەل تاۋەلسىزدىگىنىڭ 30 جىلدىعىنا وراي جارىققا شىعىپ وتىرعان قازاقستان رەكوردتار كىتابىنا ەنگەن كەيىپكەرلەر ءومىرىنىڭ توسىن دا قىزىقتى وقيعالارعا تولى ەكەنىن جەتكىزدى. ەنتسيكلوپەديانىڭ العاشقى باسىلىمى 1999 جىلى جۇقا كىتاپشا تۇرىندە جارىققا شىققان بولسا, ون ەكىنشى رەداكتسياسىندا اقپاراتتىق-ەنتسيكلوپەديالىق انىقتامالىعى دەڭگەيىنە جەتىپ وتىر. مىڭنان استام دەرەكتەر قامتىلعان باسىلىم ءتۇرلى-ءتۇستى فوتو-يلليۋستراتسيالارمەن بەزەندىرىلگەن. ەنتسيكلوپەديادا تاۋەلسىز قازاقستاننىڭ گەوگرافياسىنان باستاپ, ەل دامۋىنا ۇلەس قوسقان تۇلعالاردىڭ ءومىرى, ەكونوميكا, ساياساتتا جەتكەن جەتىستىكتەرى, تاريحى مەن مادەنيەتى, سپورت سالاسىنا قاتىستى قىزىقتى دەرەكتەر بار.
باسىلىمدا جەكە ادامداردىڭ ءومىر جولىنا قاتىستى قىزىقتى جايتتار نازار اۋدارتادى. FIAP حالىقارالىق فوتوگرافيا ونەرى فەدەراتسياسىنىڭ «پلاتينالى ەكسەللەنس» تيتۋلىنىڭ پوستكەڭەستىك كەڭىستىكتەگى جالعىز يەگەرى ۆالەري كورەنچۋكتىڭ شىعارماشىلىق مۇراعاتىندا مىڭداعان فوتوسۋرەتتەر بار. فوتوگراف بەدەلدى شەتەلدىك بايقاۋلاردىڭ 300-گە جۋىق جۇلدەسىن جەڭىپ العان. 2020 جىلى ۆ.كورەنچۋكتىڭ جۇمىستارى 22 كورمەگە قويىلىپ, 44 ماراپاتقا يە بولدى. ال وتكەن جىلى «پورترەت س تەنيۋ» اتتى جۇمىسى ءۇشىن FIAP التىن مەدالىنە جانە تاعى دا 18 ماراپاتقا يە بولدى.
2020 جىلى يتاليانىڭ پەزارو قالاسىندا ونلاين-رەجىمدە وتكەن روسسيني (CIMP) اتىنداعى XVII حالىقارالىق مۋزىكالىق بايقاۋدا «كامەرالىق مۋزىكا» نوميناتسياسى بويىنشا جەڭىمپاز اتانعان جامبىل اتىنداعى قازاق مەملەكەتتىك فيلارمونياسىنىڭ مەملەكەتتىك قاراعايلى ۇرمەلى اسپاپتار كۆينتەتىنىڭ رەپەرتۋارى وتە باي. وتكەن جىلى جانات ەرمانوۆتىڭ جەتەكشىلىگىندەگى كۆينتەت ۇلىبريتانياداعى ميۋزيك بوكس حالىقارالىق بايقاۋىنىڭ ءبىرىنشى سىيلىعىنىڭ لاۋرەاتى بولدى.
قازاقستان رەكوردتار كىتابىنا 100 جىلدىق تاريحى بار, ەلىمىزدەگى ەڭ كونە گازەتتەردىڭ ءبىرى «ەگەمەن قازاقستان» ەنىپ وتىر. «قازاق» گازەتىنىڭ جالعاسى رەتىندە 1919 جىلى «ۇشقىن» اتاۋىمەن ورىنبوردا باسىلىپ شىققان گازەت ءار جىلدار ىشىندە كوپ تارالىمدى گازەتكە اينالدى. «ەڭبەك تۋى» (1920), «ەڭبەكشى قازاق» (1921), «سوتسيالدى قازاقستان» (1921-1932), «سوتسياليستىك قازاقستان» (1932-1991), «ەگەمەندى قازاقستان» (1991-1993), بۇگىندە «Egemen Qazaqstan» بولىپ اتالاتىن گازەت قوعامنىڭ ۇنجارعىسىنا اينالعان.
وتىز جىلدان استام ۋاقىتىن عارىش كەڭىستىگىن زەرتتەۋگە ارناعان الماتىلىق انۋاربەك بالاحمەتوۆ, وتكەن جىلى لوندوندا وتكەن 22-ءشى Rainbow Film Festival حالىقارالىق كينوفەستيۆالىندە «ماريام» تولىقمەتراجدى ءفيلمى ءۇشىن ۇزدىك رەجيسسەر ايەل اتانعان شاريپا ورازباەۆا, قىرىق جىلدان استام ۇستالىق ونەردى جانداندىرىپ, اتا كاسىپتىڭ كورىگىن قىزدىرىپ جۇرگەن اعايىندى تۇرسىنجان, ماحمۇت, ايتبەرگەن قۇلمەنوۆتاردىڭ ەڭبەگى دە قازاقستان رەكوردتار كىتابىندا ايشىقتالىپ تۇر.
ەنتسيكلوپەديالىق انىقتامالىقتىڭ دەنساۋلىق بولىمىندە 2019 جىلى العاش رەت گيپوپلازيا اۋىر پاتولوگياسى بار توعىز كۇندىك ءسابيدىڭ جۇرەگىنە بىرەگەي وتا جاساعان الماتىلىق حيرۋرگتاردىڭ دا ەڭبەگى رەكوردتىق كورسەتكىش رەتىندە باعالانىپ وتىر. وتا كوزگە مۇلدە كورىنبەيتىن, سەزىنۋ ارقىلى عانا ۇستاۋعا بولاتىن ءجىپتىڭ كومەگىمەن جاسالادى. سەرتيفيكات پەريناتولوگيا جانە بالالار كارديوحيرۋرگياسى ورتالىعىنىڭ بالالار كارديوحيرۋرگياسى ءبولىمىنىڭ مەڭگەرۋشىسى گەننادي نيگايعا تابىس ەتىلدى. ال ءدال سول جىلى Magmaris ماگني قورىتپالارىنان جاسالعان ەريتىن تىرەۋىشتى قولدانۋ ارقىلى العاش رەت جاسالعان بىرەگەي وتا ءۇشىن رەكوردتار سەرتيفيكاتى كارديولوگيا جانە ىشكى اۋرۋلار عزي-نىڭ رەنتگەنەندوۆاسكۋليارلىق حيرۋرگيا ءبولىمىنىڭ مەڭگەرۋشىسى اسەم امانتاەۆا تاپسىرىلدى.
دەنەسىنە ءبىر مەزەتتە 8 كيلوعا دەيىن مەتالل بۇيىمداردى تارتا الاتىن «ماگنيت ايەل» اتانعان قارلىعاش نىعمەتوۆا 2019 جىلى سالماعى 6 كەلى بولاتىن 4 ۇتىكتى دەنەسىندە ۇستاپ تۇرىپ, ءبىر ۋاقىتتا تەمىر شەڭبەردى اينالدىرۋدان رەكوردىن جاڭارتقان. ال الماتىلىق الەكساندر گابچەنكو مەن الەكساندر سيپەتىي بيىل ۆەلوسيپەدتىڭ اۆتونومدى رەجىمىمەن ىلە الاتاۋىنىڭ قىراتتارىمەن 127 شاقىرىمدى 60 ساعاتتا ءجۇرىپ وتكەن. رەكدورشىلاردىڭ سوڭعى ءۇش جىلداعى ەكسپەديتسيالارى رەسپۋبليكانىڭ 14 وڭىرىندە ويلى-قىرلى ايماقتار سەرياسىمەن جالعاسىن تاپقان.
«قازاق جولبارىسى» لاقاپ اتىمەن تانىلعان قازاقستاندىق پالۋان, 26 جاستاعى الماتىلىق المات دجۇمانوۆ 100 توننا كومىر تيەلگەن ۆاگوندى, سالماعى 300 كگ ەكى جاسار ءتىرى تۇيەنى يىعىنا سالىپ, 13 مەترگە دەيىن كوتەرە الاتىن الىپ كۇشكە يە. سالماعى 4800 كيلو ەكى دجيپ كولىگىن سۇيرەۋ دە رەكوردشى ءۇشىن اسا قيىنعا سوعا قويماعان.
الماتىلىق اندرەي تالالاەۆ سيۋررون ەلەكترلى ۆەلوسيپەدىمەن 3 ساعاتتا الماتى وبلىسى ىلە الاتاۋىنداعى 4068 مەتر بيىكتىكتەگى ب. مومىش ۇلى شىڭىن جانە دە 4 مىڭدىق شىڭدى ەكى دوڭگەلەكتى موتورلى كولىكپەن باعىندىرعان. ال 32 جاستاعى الماتىلىق الەكساندر دانچەۆتىڭ ەكسترەمالدى ۆوركاۋت بويىنشا رەكوردتى تىپتەن قىزىقتى. الەكساندر 15 مينۋت بويى تىسىمەن ارقاندا تارتىلىپ تۇرا الاتىن قابىلەتكە يە. الىپ كۇش يەسى 26 توننالىق كولىكتى 2,5 مەتر قاشىقتىققا تىستەپ سۇيرەۋ ارقىلى رەكوردىن جاڭارتقان. ومىرلىك تاجىريبەسىنە سۇيەنە وتىرىپ, پسيحولوگيا جانە موتيۆاتسيا تۋرالى ء«ومىر مەنىڭ كوزقاراسىممەن» كىتابىن جازعان الماتىلىق 17 جاسار يلياس يۋسۋپجانوۆ ەڭ جاس اۆتور رەتىندە قازاقستان رەكوردتار كىتابىنا ەنىپ وتىر.
الماتى
