وسىعان وراي, تاۋەلسىزدىكتىڭ 30 جىلدىق مەرەيتويى قارساڭىندا وتانىمىزدىڭ وركەندەۋىنە قوسقان ەلەۋلى ۇلەسى ەسكەرىلگەن 2 مىڭعا جۋىق ازاماتقا «حالىق العىسى» مەدالى تابىس ەتىلدى.
ايتا كەتۋ كەرەك, ۆولونتەر جىلىندا ەلىمىزدىڭ ۆولونتەرلىك قىزمەتىنە قاتىسۋشىلار سانى ءۇش ەسەگە ءوسىپ, قايىرىمدىلىقتىڭ قارقىنى ارتا ءتۇستى. سوندىقتان بۇل جولى قوعامدىق بەلسەندىلىك تانىتىپ, اسىرەسە قايىرىمدىلىق جانە ۆولونتەرلىك قىزمەتتە ەڭبەكتەنگەن ازاماتتارعا باسىمدىق بەرىلدى.
ماسەلەن, شىعىس قازاقستان وبلىسىنىڭ تۋماسى ميحايل فەدوروۆ كوپتەگەن يگى ىستەردىڭ باسىنان تابىلعان. بۇگىندە ول ءۇش گەكتار اۋماقتى كوگالداندىرۋمەن اينالىسىپ كەلەدى. اۋىل تۇرعىندارى كورشىسىن «ورمان ساقشىسى» دەپ اتاپ كەتكەن ەكەن.
تاعى ءبىر ۇلگىلى ءىس رەتىندە قۋاڭشىلىقپەن كۇرەسۋ ءۇشىن قازاقستاندىقتارعا ۇندەۋ تاستاپ, جاز بويى ءشوپ شاۋىپ, جاپپاي مال قىرىلعان وڭىرلەرگە جەمشوپ جىبەرگەن ەرىكتى قۇرمەت بولاتحاننىڭ ەڭبەگىن اتاپ وتۋگە بولادى.
جەكە باستامالارمەن قاتار شاعىن جانە ورتا كاسىپكەرلىك وكىلدەرى تاراپىنان قايىرىمدىلىق جاساۋ جولىنداعى بەلسەندىلىك جىلدان جىلعا ارتىپ كەلەدى. اسحات سولتانوۆ, ۆاسيلي پالاەۆ, قاسىمحان ءشارىپوۆ, ءاليا تۇسىپبەكوۆا جانە ناريمان شاقاباەۆ سياقتى كاسىپكەرلەردىڭ مەتسەناتتىق قىزمەتى قايىرىمدىلىقتىڭ جارقىن ۇلگىسى دەسەك بولادى. ولار ەل ەكونوميكاسىنىڭ وسۋىنە ۇلەس قوسىپ قانا قويماي, ەلدىڭ ءال-اۋقاتىن ارتتىرۋ بويىنشا جۇيەلى جۇمىستار جۇرگىزۋدە.
ەرىكتىلىك پەن قايىرىمدىلىق مىسالدارىنان بولەك, بۇل جولى دەنساۋلىق ساقتاۋ, ءبىلىم بەرۋ جانە پاندەميامەن كۇرەستە ءالى دە الدىڭعى قاتاردا جۇرگەن ادامداردىڭ ءومىرى ءۇشىن ماڭىزدى باسقا دا ماماندىق وكىلدەرىنىڭ ەڭبەگى نازاردان تىس قالمادى.
ولاردىڭ بارلىعى مەملەكەتتىك مەرەكە قارساڭىندا «حالىق العىسى» مەدالىمەن ماراپاتتالدى.
ەستەرىڭىزگە سالا كەتەيىك, 2020 جىلى «حالىق العىسى» مەدالىمەن 5 مىڭعا جۋىق ازامات: ونىڭ ىشىندە دارىگەرلەر, ەرىكتىلەر, مەتسەناتتار, مۇعالىمدەر, پوليتسەيلەر, تج قىزمەتكەرلەرى, جۋرناليستەر جانە ت. ب. ماراپاتتالعان بولاتىن.
