جاڭا كىتاپتىڭ تانىستىرىلىمىنا قر پارلامەنتى ءماجىلىسىنىڭ دەپۋتاتتارى, تاريحشىلار مەن قوعام قايراتكەرلەرى قاتىستى.
«اينالايىن ازاتتىققا قول جەتكەن شاقتا ءبىزدىڭ بۋىن جىگىت جاسىنا كەلگەن بولاتىن. ال جەلتوقسان جاڭعىرىعى ەستىلگەن شاقتا بار بولعانى بوزبالا ەدىك. نامىسى الماس قىلىشتىڭ جۇزىندەي وتكىر ازاماتتاردىڭ قايسارلىعى ءبىزدىڭ جىگەرىمىزدى جانىدى. ولاردىڭ مىنەزى, قايسارلىعى قاي كەزدە دە بىزگە ۇلگى. ازاتتىق جولىندا قۇربان بولعان ازاماتتارعا دەگەن تاعزىم مەن قۇرمەت تولاستاماۋى ءتيىس.
تاۋەلسىزدىك جولىندا جانىن قيۋعا ءازىر بولعان ازاماتتارعا ءبىز باعاسىن لايىقتى بەرە الماي وتىرمىز. تاۋەلسىزدىك داۋىرىندە ەڭ ءبىرىنشى قۇرمەت سول ازاماتتارعا كورسەتىلسە دەيمىز. تەرەڭ زەردەلەۋدى قاجەت ەتەتىن بۇل تاقىرىپتىڭ ازىرگە تۇبىنە جەتپەدى. ماماندار زەرتتەپ تالايلى تاعدىر يەلەرىنىڭ ەرلىكتەرىن دالەلدەي تۇسسە دەگەن تىلەك كوكەيدە اتوي سالىپ تۇر», دەيدى بەرىك ابدىعالي ۇلى.
ارحيۆ قۇجاتتارى نەگىزىندە قۇرالعان, جىلنامالىق تاريحتىڭ كوزىندەي بولعان جيناقتىڭ جارىق كورۋىنە «التىن قىران» قوعامدىق قورى دەمەۋشىلىك كورسەتكەن. 1000 دانامەن شىققان كىتاپ ەل تاراپىنان قىزىعۋشىلىق تۋدىرىپ جاتسا, تيراجى ارتا تۇسپەك.
كىتاپتىڭ تانىستىرىلىمى بارىسىندا جينالعان مارتەبەلى مەيماندار قۇندى كىتاپتىڭ تاريحتى تانىتۋدا زور ماڭىزعا يە ەكەنىن اتاپ ءوتتى. سونداي-اق ولار جەلتوقسان وقيعاسىنا ۋاقىتىندا الماتىدان وزگە قالالاردى قوسا ەسەپتەگەندە 100 مىڭعا جەتەقابىل ادام ءۇن قاتقانىن, سولاردىڭ باسىم كوپشىلىگىنىڭ ەرلىگى ۇمىت قالعانىن تىلدەرىنە تيەك ەتتى. مەرەيلى داتا كەزىندە قايرات رىسقۇلبەكوۆتەن وزگە ەربول سىپاتاەۆ, ءلاززات اسانوۆا, ءسابيرا مۇحامەدجانوۆالاردىڭ دا ەسىمى ەرەكشە اتالۋى كەرەكتىگىن ەسكە سالدى.
ءىس-شارا بارىسىندا قر پارلامەنتى ءماجىلىسىنىڭ دەپۋتاتتارى قازىبەك يسا, جاناربەك ءاشىمجان, باقىتبەك سماعۇل باستاعان وزگە دە مارتەبەلى مەيماندار ىزگى تىلەكتەرىن جاۋدىردى.
«اللاجار ءفيلمى وسىدان جيىرما جىل بۇرىن شىققاندا ءبىرىنشى بولىپ بارىپ كورگەن ەدىك. كەيىن ول كينونىڭ ءۇزىلىپ-قيىلىپ كورسەتىلگەنىن بايقادىق. مىنا جيناقتاعى QR-كود ارقىلى كورۋگە مۇمكىندىك تۋاتىنى قۋانتىپ وتىر», دەدى جاناربەك ءاشىمجان ءوز سوزىندە.
كۇللى ماڭىزدى قۇجاتتار توپتاستىرىلعان جاڭا جيناق – وقىرمان ولجاسى.
