ءىس-شاراعا كەڭەس مۇشەلەرى, ونىڭ ىشىندە پالاتانىڭ ءار كەزەڭدەگى توراعاسى قىزمەتىن اتقارعان – ومىربەك بايگەلدى, ورالباي ابدىكارىموۆ, كورنەكتى مەملەكەت قايراتكەرلەرى قۋانىش سۇلتانوۆ, زينايدا فەدوتوۆا, «حالىق قاھارمانى» مۇحتار التىنباەۆ جانە باسقالار قاتىستى.
وتىرىستىڭ اشىلۋىندا ماۋلەن اشىمباەۆ كەڭەس مۇشەلەرىنە ەل تاۋەلسىزدىگىن نىعايتۋعا جانە قازاقستاندىق پارلامەنتاريزمدى دامىتۋعا قوسقان ۇلەسى ءۇشىن العىسىن ءبىلدىردى.
پالاتا توراعاسى قازاقستاندىق جاڭا مەملەكەتتىلىكتى قالىپتاستىرۋداعى ەلباسىنىڭ تاريحي رولىنە توقتالىپ, كاسىبي پارلامەنت ەلىمىزدىڭ تۇڭعىش پرەزيدەنتىنىڭ باستامالارىنا ءاردايىم قولداۋ كورسەتكەنىن قوسا ايتتى.
«تۇڭعىش پرەزيدەنتىمىز – ەلباسى نۇرسۇلتان ءابىش ۇلى نازارباەۆتىڭ ساليقالى ساياساتىنىڭ ارقاسىندا قازاقستان 30 جىلدا وردالى ەلگە اينالدى. مەملەكەتتىك ينستيتۋتتاردى قالىپتاستىرىپ, ولاردىڭ ۇزدىكسىز ءارى قۇزىرەتتى جۇمىسىن قامتاماسىز ەتتىك. وسى رەتتە قوس پالاتالى كاسىبي پارلامەنتتىڭ ورنى ەرەكشە بولعانىن ايتا كەتكەن ءجون. زاڭ شىعارۋشى ورگان ەل دامۋىنا نەگىز بولاتىن زاڭنامالىق بازا جاساقتاي الدى», دەدى ماۋلەن اشىمباەۆ ءوز سوزىندە.
ماۋلەن اشىمباەۆ قازاقستاندا بيلىكتىڭ ساباقتاستىعى ساقتالا وتىرىپ, زور جەتىستىكتەردى ارتتىرۋعا مۇمكىندىك العانىن اتاپ ءوتتى. وعان مەملەكەت باسشىسى قاسىم-جومارت توقاەۆتىڭ باستاماسى بويىنشا بارلىق سالاداعى جۇيەلى وزگەرىستەر مىسال بولا الادى.
«ماڭىزدى ساياسي, ەكونوميكالىق جانە الەۋمەتتىك رەفورمالار جۇزەگە اسۋدا. ەلدىڭ ساياسي جۇيەسى جاڭعىرتىلۋدا, ساياسي پارتيالار دامۋ ۇستىندە. پارتيالاردى تىركەۋ جانە بەيبىت جينالىستاردى وتكىزۋ راسىمدەرى جەڭىلدەتىلدى. «حالىق ۇنىنە قۇلاق اساتىن مەملەكەت» تۇجىرىمداماسى نەگىزىندە مەملەكەتتىك باسقارۋ جۇيەسى دايەكتى تۇردە رەفورمالانىپ كەلەدى. جەرگىلىكتى ءوزىن-ءوزى باسقارۋدى كۇشەيتۋ جانە جەرگىلىكتى دەڭگەيدەگى اكىمدەردى سايلاۋعا ماڭىزدى قادامدار جاسالدى», دەپ اتاپ ءوتتى پالاتا توراعاسى.
ماۋلەن اشىمباەۆ كەڭەس مۇشەلەرىنە مەملەكەت باسشىسىنىڭ جاڭعىرتۋ جونىندەگى باعدارىن زاڭنامالىق قامتاماسىز ەتۋگە باعىتتالعان سەناتتىڭ اعىمداعى جۇمىسى تۋرالى ايتىپ بەردى. ول سونداي-اق پالاتانىڭ قوسىمشا باسىمدىقتارى – وڭىرلەردى دامىتۋ, شاعىن جانە ورتا بيزنەستى قولداۋ, سونداي-اق ۇلتتىق قۇندىلىقتاردى ىلگەرىلەتۋ ماسەلەلەرىنە توقتالدى.
ماۋلەن اشىمباەۆ ءوز سوزىندە سەناتورلار زاڭ شىعارۋ باستاماسى قۇقىعىن بەلسەندى پايدالاناتىنىن جانە بۇل ماسەلەدە تاجىريبەلى ەكس-سەناتورلاردى قولداۋ وتە ماڭىزدى ەكەنىن اتاپ ءوتتى.
«قازىرگى تاڭدا ءبىز سەنات دەپۋتاتتارى دايىنداعان 18 زاڭ جوباسى بويىنشا جۇمىس جۇرگىزۋدەمىز. ونىڭ ىشىندە زاڭناماعا جايىلىمدىق جەرلەردى پايدالانۋ جانە ورگانيكالىق ونىمدەر بويىنشا تۇزەتۋ ەنگىزۋ تۋرالى زاڭ جوبالارى بار. سەناتورلار مۇمكىندىگى شەكتەۋلى ازاماتتاردىڭ ءومىر ءسۇرۋ ساپاسىن جاقسارتۋعا ارنالعان زاڭ جوباسىن, عىلىم جانە باسقا دا باعىتتار بويىنشا ماڭىزدى زاڭدارعا تۇزەتۋلەر ازىرلەۋ ۇستىندە. ءبىز وسى زاڭ جوبالارىن دايىنداۋ جانە تالقىلاۋ اياسىندا سىندارلى ۇسىنىستار مەن يدەيالار ءۇشىن ارقاشان اشىقپىز. سەناتورلار كەڭەسىمەن بەلسەندى بىرلەسكەن جۇمىسقا دا دايىنبىز», دەپ قوستى پالاتا توراعاسى.
ماۋلەن اشىمباەۆ بۇرىنعى سەناتورلاردى قوس پالاتالى پارلامەنتتىڭ قۇرىلۋىنىڭ 25 جىلدىعىمەن قۇتتىقتادى.
كەزدەسۋ بارىسىندا كەڭەس مۇشەلەرى سەنات جانىنداعى سەناتورلار كەڭەسىنىڭ جۇمىسىن ۇيىمداستىرۋ تۋرالى ۇسىنىستارى مەن تىلەكتەرىن ءبىلدىردى. ماۋلەن اشىمباەۆ ەلىمىز پرەزيدەنتى اتىنان مەملەكەتتىلىكتىڭ قالىپتاسۋىنا, تاۋەلسىزدىكتىڭ نىعايۋىنا جانە ەلدىڭ الەۋمەتتىك-ەكونوميكالىق دامۋىنا قوسقان ەلەۋلى ۇلەسى ءۇشىن سەناتورلار كەڭەسىنىڭ مۇشەلەرىن «قازاقستان رەسپۋبليكاسىنىڭ تاۋەلسىزدىگىنە 30 جىل» مەرەيتويلىق مەدالىمەن, سونداي-اق سەنات توراعاسىنىڭ العىس حاتىمەن ماراپاتتادى.
