ەكولوگيا • 13 جەلتوقسان، 2021

قازاقستاندا «ەلىم-اي» ەكولوگيالىق تۋريزم اسسوتسياتسياسى قۇرىلدى

357 رەت كورسەتىلدى

بيىلعى  9 ايدا ۇلتتىق پاركتەرگە كەلۋشىلەر سانى 1 ميلليونعا جەتكەن. بۇل ءوز كەزەگىندە تۇمسا تابيعاتتى توزدىرماۋعا قاتىستى تالاي ماسەلەنءى رەتتەۋدى قاجەت ەتەدى. وسىعان وراي الماتىدا ەكى كۇن قاتارىنان «تابيعي تۋريزم: جاھاندىق سىن-قاتەرلەر جانە قازاقستاننىڭ كەلەشەگى»تاقىرىبىندا كونفەرەنتسيا ءوتتى.

«ەلىم-اي» ۇلتتىق ەكولوگيالىق تۋريزم قاۋىمداستىعى مەن كونراد ادەناۋەر قورى ۇيىمداستىرعان شارادا قازاقستاندا ەكولوگيالىق ءتۋريزمدى دامىتۋ مۇمكىندىكتەرى، ۇلتتىق پاركتەردەگى ينفراقۇرىلىمدى جەتىلدىرۋ، تابيعي تۋريزم ارقىلى وڭىرلەردىڭ ەكونوميكالىق الەۋەتىن ءوسىرۋ جانە تابيعي الۋانتۇرلىلىكتى بارىنشا ساقتاپ قالۋ ماسەلەلەرى ورتاعا سالىندى.

ءىس-شاراعا  cالالىق مينيسترلىكتەر وكىلدەرى، ەلىمىزدەگى بارلىق ۇلتتىق پاركتەر مەن تابيعي قورىقتاردىڭ باسشىلارى، حالىقارالىق قورلار، تۋريستىك بيزنەس، جوعارى وقۋ ورىندارى، زەرتتەۋ ينستيتۋتتارى، ەكولوگيالىق جانە قوعامدىق ۇيىمدار، قوعام قايراتكەرلەرى قاتىستى.

قر مادەنيەت جانە سپورت ءمينيسترىنىڭ ورىنباسارى ەرجان ەركىنباەۆتىڭ ايتۋىنشا، وسى جىلدىڭ سوڭعى 9 ايىندا ەلىمىزدەگى ۇلتتىق پاركتەرگە كەلۋشىلەر سانى 1 ميلليون ادامعا جۋىقتاپ، وتكەن جىلعى كورسەتكىشكە جەتىپ ۇلگەرگەن.

«ىشكى ءتۋريزمنىڭ باسقا دا كورسەتكىشتەرى جاقساردى. سوڭعى 9 ايدا ىشكى تۋريستەر سانى 5،2 ملن ادامدى قۇراپ، 2019 جىلعى ستاتيستيكادان اسىپ كەتتى. سول سەبەپتى ەلىمىزدەگى ۇلتتىق پاركتەردەگى رەكرەاتسيالىق جۇكتەمەنى ەسكەرۋ ماسەلەسىنە ەرەكشە نازار اۋدارعىم كەلەدى. قولدا بار ادىستەمەلەر ۇلتتىق پاركتەردەگى ينفراقۇرىلىمدى دامىتۋعا نەگىزدەلمەگەن. ال ينفراقۇرىلىمدى جەتىلدىرۋ تۋريستەردى كوبىرەك قابىلداۋعا سەپتىگىن تيگىزەدى. مىسالى، ەگەر جول جوندەلسە، اۋماق  تۋريستەردىڭ جۇرۋىنە ىڭعايلانسا قوسىمشا 2000 ادامدى قابىلداۋعا بولادى، تۋريستىك سوقپاق جاسالسا، 1000 ادام تاعى قوسىلادى.  الايدا ءبىز مۇنىڭ ەكولوگيالىق جاعىن ۇمىتپاۋىمىز كەرەك. رەكرەاتسيالىق جۇكتەمەنىڭ ليميتىنەن اسۋعا بولمايدى. ءبىز وسىنداي كونتسەپتسيامەن عانا تابيعاتتى دا ساقتاپ، زاماناۋي ءتۋريزمدى دە دامىتا الامىز»، - دەيدى ە.ەركىنباەۆ.

كونراد ادەناۋەر قورىنىڭ قازاقستانداعى باسشىسى يوحاننەس د. راي جاستار اراسىندا ەكولوگيالىق اعارتۋ جۇمىسىنىڭ ماڭىزدىلىعىنا توقتالدى.

«ورماندا 20 شاقىرىم جۇرسەڭىز، ارنايى قوقىس الاڭدارىنان دا كوپ قوقىس كەزدەستىرۋگە بولادى. سول سەبەپتى ازاماتتار ەكوساياساتتىڭ، ەكولوگيانىڭ ءمانىن دۇرىس ءتۇسىنۋى كەرەك. تابيعاتتى قورعاي وتىرىپ قارجى جاراتىپ قانا قويماي، تابىس تا تابۋعا بولادى. ەكوتۋريزم يدەياسىنىڭ ۇتىمدىلىعى سوندا. بۇل سالادا جەرگىلىكتى تۇرعىندار جۇمىس ورىندارىن قۇرىپ، كاسىپتى دامىتا الادى. مۇنىمەن شەكتەلىپ قانا قويماي، ءبىلىم بەرۋ مەكەمەلەرىنە بارىپ تابيعاتتى قورعاۋ تۋرالى ءجيى ءتۇسىندىرۋىمىز قاجەت. جاستارمەن كوبىرەك جۇمىس ىستەگەندە عانا يننوۆاتسيا بولادى»، - دەيدى يوحاننەس د. راي.

قر ەگترم ورمان شارۋاشىلىعى جانە جانۋارلار الەمى كوميتەتى توراعاسىنىڭ ورىنباسارى دانيار تۇرعامباەۆ ۇلتتىق پاركتەردەگى ينفراقۇرىلىمدى دامىتۋ جوبالارى وسى باعىتتا قابىلدانعان تۇجىرىمدامالار نەگىزىندە جۇزەگە اساتىنىن، بۇل تۇرعىدا «ەلىم-اي» ەكوتۋريزم قاۋىمداستىعىمەن بىرگە جۇمىس ىستەۋ جوسپارلانىپ وتىرعانىن اتاپ ءوتتى. سول سەبەپتەن دە بىرقاتار مەملەكەتتىك ۇلتتىق تابيعي پاركتەر مەن اسسوتسياتسيا اراسىندا ارىپتەستىك تۋرالى مەموراندۋمدارعا قول قويىلدى.

اسسوتسياتسيانىڭ باسقارما ءتورايىمى سامال يبراەۆا باسقا دا بارلىق مۇددەلى تاراپتاردى بىرگە جۇمىس ىستەۋگە شاقىردى.

«قازىردىڭ وزىندە ءبىزدىڭ اسسوتسياتسيامىز مەملەكەتتىك جانە كاسىپكەرلىك سالا وكىلدەرىن، تابيعات قورعاۋ ۇيىمدارىن، تۋريستىك كاسىپكەرلىكتى، قوعامدىق ۇيىمداردى، قوعامدىق پىكىر كوشباسشىلارىن، حالىقارالىق ۇيىمدار باسشىلارىن بىرىكتىرىپ ۇلگەردى. كۇش بىرىكتىرۋ ارقىلى بىرىڭعاي ۇستانىمعا كەلەمىز دەگەن سەنىمدەمىن. قايتالانباس كوركى بار تابيعي نىساندارىمىزدىڭ احۋالىنا، ۇلتتىق پاركتەردىڭ جاعدايىنا بەي-جاي قارامايتىن، جالپى تابيعاتىمىزعا جاناشىر ازاماتتاردىڭ جانە ۇيىمداردىڭ بارلىعىن اسسوتسياتسياعا قوسىلۋعا شاقىرامىن»، - دەدى ول.

ال ەكولوگيا جانە تۇراقتى دامۋ ينستيتۋتىنىڭ ديرەكتورى قۇرالاي كارىباەۆا ۇلتتىق پاركتەر اۋماعىنداعى بيوالۋانتۇرلىلىكتى، جەر رەسۋرستارىن ساقتاۋدىڭ ماڭىزىنا توقتالدى.

«ۇلتتىق پاركتەر دە، ەكولوگيالىق تۋريزم ۇيىمدارى ءوز مىندەتتەرىن دۇرىس اتقارسا، تابيعاتىمىز بايلىعىمىزدى كەلەر ۇرپاققا بەرە الامىز. ء بىز قازىر كەلەشەككە تيەسىلى رەسۋرستاردى قولدانىپ وتىرمىز. رەسۋرستارىمىزدى راتسيونالدى پايدالانىپ، جاقسى باعدارلامالار ارقىلى وسى يدەيانى ءار ازاماتتىڭ ساناسىنا ءسىڭىرۋىمىز كەرەك. ەكولوگيا، ەكونوميكا جانە الەۋمەتتىك ماسەلەلەر اراسىنداعى بالانستى ۇشتاعان ەتىپ، تەڭ ۇستاۋ وتە ماڭىزدى»، دەدى اكادەميك.

بۇدان بولەك، كونفەرەنتسيا اياسىندا ەرەكشە قورعالاتىن تابيعي اۋماقتار باسشىلارىنا ىلە-الاتاۋ پاركىنىڭ ايۋساي شاتقالىندا تانىمدىق ەكسكۋرسيا ۇيىمداستىرىلىپ، ۆيزيت-ورتالىق تانىستىرىلدى.

سوڭعى جاڭالىقتار

تاعى 1650 قازاقستاندىق ىندەت جۇقتىردى

كوروناۆيرۋس • بۇگىن، 09:00

ۇقساس جاڭالىقتار