مەملەكەت باسشىسى قاسىم-جومارت توقاەۆ ۇلتتىق قوعامدىق سەنىم كەڭەسىنىڭ ءتورتىنشى وتىرىسىندا «وقيتىن ۇلتتى» قالىپتاستىرۋ ءۇشىن جاس قازاقستاندىقتار اراسىندا وقۋ مادەنيەتىن دامىتۋعا جانە ىلگەرىلەتۋگە ەرەكشە نازار اۋدارعانى بەلگىلى. وسىعان بايلانىستى, «رۋحاني جاڭعىرۋ» باعدارلاماسىن ۇلتتىق جاڭعىرۋ كەزەڭىنە كوشىرۋ جونىندەگى جول كارتاسىنا سايكەس بالالار وقۋىنىڭ رەسپۋبليكالىق كونكۋرسى وتكىزىلدى. بايقاۋدىڭ باستى ماقساتى – كىتاپ وقۋعا دەگەن قىزىعۋشىلىقتى قالىپتاستىرۋ, وسكەلەڭ ۇرپاققا ءوز ەلى ءۇشىن ماقتانىش سەزىمىن تاربيەلەۋ جانە «رۋحاني جاڭعىرۋ» باعدارلاماسىنىڭ يدەيالارىن تەرەڭ ءتۇسىنۋ. بايقاۋعا قازاقستاننىڭ بارلىق وڭىرلەرىندەگى 3 600-دەن استام, جالپى ءبىلىم بەرەتىن مەكتەپتەردەن 37 مىڭنان استام ورتا بۋىن وقۋشىلارى قاتىستى. بايقاۋ پروتسەسى وڭىرلەر اكىمدىكتەرىنىڭ, وبلىستىق, قالالىق, اۋداندىق ءبىلىم بولىمدەرىنىڭ كومەگىمەن ۇيىمداستىرىلدى.
قورىتىندى رەسپۋبليكالىق كەزەڭگە قازاقستاننىڭ بەس وڭىرىنەن 25 بالا قاتىستى. بايقاۋ بارىسىندا قاتىسۋشىلار تۋعان ولكەنىڭ تاريحى, مادەنيەتى, سونداي-اق «رۋحاني جاڭعىرۋ» باعدارلاماسىنىڭ پرينتسيپتەرى بويىنشا سۇراقتارعا جاۋاپ بەرىپ, كۆەستكە قاتىستى. نۇر-سۇلتاندا «رۋحاني جاڭعىرۋ» قازاقستاندىق قوعامدىق دامۋ ينستيتۋتىنىڭ كەڭسەسىندە رەسپۋبليكالىق كونكۋرستىڭ جەڭىمپازدارىن ماراپاتتاۋ ءراسىمى ءوتتى. ءىس-شاراعا اقپارات جانە قوعامدىق دامۋ ۆيتسە-ءمينيسترى بولات تىلەپوۆ, «رۋحاني جاڭعىرۋ» كەاق باسقارما توراعاسى اسىلبەك ەسەنباەۆ, وبلىس اكىمدەرىنىڭ ورىنباسارلارى, جەڭىمپاز وڭىرلەردىڭ ءبىلىم باسقارمالارىنىڭ باسشىلارى جانە تىكەلەي بايقاۋعا قاتىسۋشىلار قاتىستى.
بايقاۋعا قاتىسۋشىلاردى قۇتتىقتاي وتىرىپ, ب.تىلەپوۆ: «اتالعان بايقاۋدىڭ وقۋ-تانىمدىق بازاسى بولىپ تابىلاتىن كىتاپتار قازاقستاننىڭ مەملەكەتتىك رامىزدەرى, مادەنيەتى, سالت-داستۇرلەرى, تاريحي ەسكەرتكىشتەرى, كيەلى ورىندارى تۋرالى باياندايدى. عاسىرلار دانالىعى, حالىق ماقالدارى, ماتەلدەر, جۇمباقتار تۇرىندە, سونداي-اق تاۋلار مەن دالانىڭ اڭىزدارى وقۋشىلاردىڭ وي-ءورىسىن كەڭەيتىپ, ۇلتتىق كودتىڭ ساقتالۋىنا ىقپال ەتەدى», دەدى.
بايقاۋ كوميسسياسىنىڭ شەشىمىنە سايكەس, بەسىنشى ورىندى جەزقازعان قالاسىنىڭ «وركەن» مامانداندىرىلعان مەكتەپ-ينتەرناتىنىڭ وقۋشىسى نازىم جولتاي يەلەندى. ءتورتىنشى ورىندى اقتوبە وبلىسى شالقار اۋدانى وبلىستىق مامانداندىرىلعان فيزيكا-ماتەماتيكا مەكتەپ-ينتەرناتىنىڭ وقۋشىسى فاتيما مۋاپىكوۆا الدى. ءۇشىنشى ورىنعا ەلوردالىق №86 مەكتەپ-گيمنازياسىنىڭ وقۋشىسى ەرالى قوزى يە بولدى. ەكىنشى ورىندى بايقوڭىر قالاسىنداعى №273 ورتا مەكتەپتىڭ وقۋشىسى ۇلداي قاراتاەۆا جەڭىپ الدى.
«سەن تۋعان قازاقستانىڭدى بىلەسىڭ بە؟» دەگەن تاقىرىپتا شىعىس قازاقستان وبلىسى اياگوز اۋدانى №5 ورتا مەكتەبىنىڭ وقۋشىسى جانەل توقانوۆا بايانداما جاسادى. جەڭىمپازدار ارنايى گراموتالارمەن جانە باعالى سىيلىقتارمەن ماراپاتتالدى.
ءىس-شارا سوڭىندا اقپارات جانە قوعامدىق دامۋ ۆيتسە-ءمينيسترى ب.تىلەپوۆ اۋداندار مەن قالالاردىڭ مەكتەپ كىتاپحانالارىنىڭ جەڭىمپاز وقۋشىلارىنا كىتاپ وقۋعا دەگەن قىزىعۋشىلىعىن ودان ءارى ارتتىرۋ ءۇشىن بىرقاتار كوركەم كىتاپ تۇرىندە سىيلىقتار جىبەرىلگەنىن اتاپ ءوتتى.
