ماقالانىڭ ەڭ ءبىر تارتىمدىلىعى – وتكەنگە بارلاۋ جاساعانى. عاسىرلار قويناۋىنان باستاۋ العان ازاتتىق جولىنداعى كۇرەستىڭ سوڭعى 30 جىلى بايسالدى, دەرەك-دايەكپەن سارالانعان. سۇيسىنەسىڭ, سەبەبى كوز كورىپ, جۇرەك سەندى, قۇلاق ەستىپ, كوڭىل سەندى.
«تاۋەلسىزدىك تە باقىت سياقتى, باعالاعان ادامنىڭ, ايالاعان قوعامنىڭ قولىنا تۇراقتايدى» دەيدى ەلباسى. ماعىناسى زور ءسوز. ويتكەنى كەيدە ارامىزدا تاۋەلسىزدىگىمىزدىڭ بايىبىنا بارماي, قيسىنسىز بايبالامعا سالاتىن زارجاقتار تابىلىپ قالاتىنى جاسىرىن ەمەس. قوعامداعى كەز كەلگەن قايشىلىقتاردىڭ استارىنا شي جۇگىرتىپ, بۇيرەكتەن سيراق شىعارۋعا اۋەستەنەتىندەر بار. ولار ءۇشىن ەلدىڭ بەرەكەسى مەن بىرلىگى تىم جەڭىل دۇنيە سەكىلدى. قازاق مۇندايدا «بىلگەنگە – توعىز, بىلمەگەنگە – توقسان توعىز» نەمەسە ء«بىلىمسىزدىڭ بىلمەگەنىن كەشىرمەسەڭ, بىلگەنىڭ قايسى» نە بولماسا «قادىرىڭدى بىلمەگەنگە, قادىرىڭدى كەتىرمە» دەيدى. ەڭسەسى بيىك ەلىمىزدىڭ بوساعاسى دا مىعىم. مىعىم بولاتىنى – جامپوزى مەن وعىلانى كوپ الاش بالاسى بار.
ەگەر بايىپپەن وقىسا, ەلباسىنىڭ بۇل ماقالاسى تاۋەلسىزدىكتىڭ شىنايى تاعىلىمىن ۇعىندىرىپ بەرەدى. توم-توم كىتاپتىڭ سىعىندىسى ىسپەتتى, ەلدىڭ ءۇش ون جىلدىعىنىڭ سىرلى شەجىرەسى بولىپ شىققان. بۇل – ءبىر. ەكىنشىدەن, بۇگىنگى ەل جاعدايى, ازات ۇرپاقتىڭ بولمىس-بىتىمىنە باعا بەرىلگەن. «تاۋەلسىز ەلىمىزدىڭ باستى بايلىعى – ادام» دەگەن ەلباسى, سونداي-اق: «ەڭ باستىسى – ەلىمىز امان, ۇرپاعىمىز ازات. ءبىز الاقانعا سالىپ وسىرگەن سول ازات ۇرپاق ەندىگى جەردە «مەن قازاقستانىما نە بەرەمىن؟» دەگەندى ويلاۋى كەرەك».تۇڭعىش پرەزيدەنتىمىزدىڭ وسى ءسوزى كەز-كەلگەن ەل پەرزەنتىن ويلانتىپ قانا قويماي, مەنىڭشە تولعانتۋ كەرەك.
تولعانتاتىنى, قازىرگىدەي تەحنوگەندىك زاماندا وتانىمىزدىڭ ەكونوميكالىق قۋاتىن ارتتىرۋ ءبىر مىندەت بولسا, الاش جۇرتىنىڭ رۋحانياتىن جۇدەتپەي, بايىتۋ زور مىندەت. وسى رۋحاني سالانىڭ وكىلى بولعاندىقتان ءبىز ەلباسىنىڭ تۋعان ءتىل, ءدىل, سالت-ءداستۇر تۋرالى ايتقاندارىن جۇرەكپەن قابىلدايمىز. ايتسە دە, ءتىلىمىز كەمەلىنە كەلىپ, ءورىسىن كەڭ جايا قويعان جوق. مۇندايدا تاعى دا ەلباسىمىز وسى ماقالادا: «كەيدە ويلايمىن: قازاق دەگەن نە دەگەن ءتوزىمدى حالىق؟! كونبەسكە كونىپ, شىداماسقا شىداعان. بولاشاعى بۇلدىر بولعان كۇننىڭ وزىندە ساعىن سىندىرماي, كەلەشەكتەن ءۇمىتىن ۇزبەگەن. قيىندىق اتاۋلىعا قاسقايا قارسى تۇرىپ, ۇزدىكسىز العا جىلجىعان». العا جىلجي دا بەرەمىز. سەبەبى تاۋەلسىزدىك دىڭگەگىن مىقتاپ, تۇعىرىن شەگەندەي تۇسەتىن ءورشىل حالىقپىز. ماقالانى تۇششىنا وقىعان كىسىگە وسىنداي جىگەر بەرەدى.
جانۇزاق ايازبەكوۆ,
وبلىستىق «قوستاناي تاڭى» گازەتىنىڭ ديرەكتور –
باس رەداكتورى, حالىقارالىق «الاش» سىيلىعىنىڭ لاۋرەاتى
