ۇكىمەت • 08 جەلتوقسان، 2021

ەرجان قازىحان بەرلينگە جۇمىس ساپارىمەن باردى

21 رەت كورسەتىلدى

پرەزيدەنتتىڭ حالىقارالىق ىنتىماقتاستىق جونىندەگى ارناۋلى وكىلى ەرجان قازىحان بەرلينگە جۇمىس ساپارىمەن باردى، دەپ حابارلايدى Egemen.kz اقورداعا سىلتەمە جاساپ.

ساپار اياسىندا ارناۋلى وكىل فەدەرالدى پرەزيدەنت اكىمشىلىگىنىڭ، سىرتقى ىستەر مينيسترلىگىنىڭ رەسمي وكىلدەرىمەن جانە بۋندەستاگ دەپۋتاتتارىمەن كەلىسسوزدەر جۇرگىزدى. كەلىسسوزدەر بارىسىندا تاراپتار ەكىجاقتى جانە كوپجاقتى ىنتىماقتاستىقتىڭ وزەكتى ماسەلەلەرىن تالقىلادى.

نۇر-سۇلتان مەن بەرلين اراسىنداعى ەكونوميكالىق قاتىناستاردىڭ اۋقىمىن كەڭەيتۋ، ونىڭ ىشىندە تومەن كومىرتەكتى دامۋ جانە كليماتتىڭ وزگەرۋى ماسەلەلەرى بويىنشا ءوزارا ءىس-قيمىلدى ودان ءارى جانداندىرۋ جونىندە ۋاعدالاستىققا قول جەتكىزىلدى.

مەملەكەت باسشىسىنىڭ ارناۋلى وكىلى بۋندەستاگ دەپۋتاتتارىمەن وتكەن دوڭگەلەك ۇستەلگە قاتىستى. ەرجان قازىحان ءوز سوزىندە نەمىس پارلامەنتاريلەرىنە تاۋەلسىزدىكتىڭ 30 جىلى ىشىندە ەلىمىزدىڭ قول جەتكىزگەن جەتىستىكتەرى تۋرالى مالىمەت بەرىپ، پرەزيدەنت قاسىم-جومارت توقاەۆتىڭ باستاماسىمەن قازاقستاندا جۇرگىزىلىپ جاتقان ساياسي رەفورمالار جونىندە ەگجەي-تەگجەيلى ايتىپ بەردى.

سونداي-اق ەرجان قازىحان «قازاقستان دەموكراتيانى كۇشەيتۋگە، زاڭ ۇستەمدىگىن قامتاماسىز ەتۋگە جانە مەملەكەتتىك باسقارۋ جۇيەسىن جەتىلدىرۋگە باعىتتالعان كەشەندى ينستيتۋتسيونالدىق رەفورمالاردى ىسكە اسىرۋدا» – دەپ اتاپ ءوتتى. ءوز كەزەگىندە، «گەرمانيا – ورتالىق ازيا» پارلامەنتتىك دوستىق توبىنىڭ توراعاسى مانفرەد گرۋند قازاقستان مەن گەرمانيا اراسىنداعى ىنتىماقتاستىقتىڭ قارقىندى دامىپ كەلە جاتقانىنا كوڭىلى تولاتىنىن ايتىپ، جاڭادان سايلانعان نەمىس دەپۋتاتتارىنىڭ ەكىجاقتى بايلانىستاردى كەڭەيتۋ ءۇشىن ءارى قاراي كۇش سالۋعا دايىن ەكەنىن جەتكىزدى.

ساپار اياسىندا ەرجان قازىحان بەرلين ەۋرازيالىق كلۋبىنىڭ «قازاقستان تاۋەلسىزدىگىنىڭ 30 جىلدىعى – جەتىستىكتەر، ماقساتتار مەن سىن-قاتەرلەر» اتتى تاقىرىپتا وتكىزگەن 33-وتىرىسىندا ءسوز سويلەدى. جيىنعا قازاقستان مەن گەرمانيانىڭ ۇكىمەتتىك جانە ىسكەرلىك ورتالارىنىڭ، سالالىق جانە وڭىرلىك بيزنەس-قاۋىمداستىقتاردىڭ وكىلدەرى، جەتەكشى گەرمان كومپانيالارىنىڭ باسشىلارى قاتىستى. بەرلين ەۋرازيالىق كلۋبىنىڭ وتىرىسى كوروناۆيرۋس پاندەمياسىنىڭ ەكونوميكانىڭ دامۋىنا كەرى اسەرىن ازايتۋ جانە بيزنەستى قولداۋ، سونداي-اق ساۋدا-ەكونوميكالىق ىقپالداستىقتىڭ جاڭا باعىتتارىن ازىرلەۋ جونىندەگى ەكى ەلدىڭ كۇش-جىگەرىن جۇمىلدىرۋعا ارنالدى.

ءىس-شاراعا قاتىسۋشىلار قولايلى ينۆەستيتسيالىق احۋال قالىپتاستىرۋعا، ينفراقۇرىلىمدى دامىتۋعا، مەملەكەت پەن ينۆەستورلار اراسىنداعى اشىق ديالوگ پەن ءوزارا ءىس-قيمىلدى قامتاماسىز ەتۋگە باعىتتالعان شەتەلدىك ينۆەستيتسيالاردى تارتۋ جانە قازاقستاندىق ەكسپورتتى قولداۋ ءۇشىن قازاقستاندا جۇرگىزىلىپ جاتقان مەملەكەتتىك ساياسات تۋرالى ەگجەي-تەگجەيلى حاباردار بولدى. ءوز كەزەگىندە، نەمىس ۇكىمەتىنىڭ وكىلدەرى قازاقستاننىڭ گەرمانيا ءۇشىن ورتالىق ازياداعى باستى سەرىكتەس رەتىندەگى ەرەكشە رولىنە نازار اۋداردى.

ءىس-شارا اياسىندا ەرجان قازىحان نەمىس كومپانيالارىنىڭ باسشىلارىمەن بىرقاتار ەكىجاقتى كەزدەسۋلەر وتكىزدى. بۇل كەزدەسۋلەر شەڭبەرىندە ارىپتەستىكتى دامىتۋ جانە ەنەرگەتيكا، جەك-ءتى پايدالانۋ، ونەركاسىپتى تسيفرلاندىرۋ جانە اۆتوماتتاندىرۋ سالاسىنداعى جاڭا ينۆەستيتسيالىق جوبالاردى ىسكە اسىرۋدىڭ پەرسپەكتيۆالارى تالقىلاندى.

ساپار قورىتىندىسى بويىنشا ەل تاۋەلسىزدىگىنىڭ 30 جىلدىعىنا وراي قازاقستاننىڭ گەرمانياداعى ەلشىلىگى ۇيىمداستىرعان سالتاناتتى قابىلداۋ ءوتتى.

سوڭعى جاڭالىقتار

شابىت پەن شاراپ

ادەبيەت • بۇگىن، 22:13

ديلەتانتتان داۋىرگە دەيىن

ادەبيەت • بۇگىن، 21:57

ەرتەڭ اۋا رايى قانداي بولادى؟

قازاقستان • بۇگىن، 16:20

اندرادەنى مۋنگيا الماستىرۋى مۇمكىن

كاسىپقوي بوكس • بۇگىن، 14:25

ۇقساس جاڭالىقتار