كوروناۆيرۋس • 07 جەلتوقسان، 2021

الەكسەي تسوي اقىلى ۆاكتسيناتسيا قاشان باستالاتىنىن ايتتى

109 رەت كورسەتىلدى

قر دەنساۋلىق ساقتاۋ ءمينيسترى الەكسەي تسوي Pfizer ۆاكتسيناسىن اقىلى نەگىزدە قاشان سالۋعا بولاتىنى تۋرالى پىكىر ءبىلدىردى، دەپ جازادى Egemen.kz.

«Pfizer ۆاكتسيناسىنىڭ قۇنى بويىنشا ايتساق، ءبىز Pfizer كومپانياسىمەن اقىلى ۆاكتسيناتسيا مۇمكىندىگى تۋرالى كەلىسىپ جاتىرمىز. قاجەتتىلىكتى انىقتاۋ ءۇشىن تىزىمدەر جينالۋدا. قازىر الماتىداعى ەمحانالار حالىقتىڭ سۇرانىسىن زەرتتەپ جاتىر. ۆاكتسينانىڭ جارامدىلىق مەرزىمى بار ەكەنىن ءتۇسىنۋ كەرەك. بۇل ۆاكتسينانى قانشا ازامات العىسى كەلەتىنىن انىقتاپ الۋ ماڭىزدى. نۇر-سۇلتان قالاسىندا دا وسىنداي جۇمىس ءجۇرىپ جاتىر. قازىر بارلىق جەردە، وڭىرلەردىڭ بارىندە وسى ءىس جولعا قويىلعان. ناقتى قانشا دوزا قاجەت، قانشا ازامات اقىلى نەگىزدە ۆاكتسينا العىسى كەلەدى؟ وسىنى انىقتاعاننان كەيىن عانا ناقتى قانشا ۆاكتسينا جەتكىزۋ كەرەكتىگى انىق بولادى»،  دەدى الەكسەي تسوي.

دەنساۋلىق ساقتاۋ ءمينيسترى Pfizer ۆاكتسيناسىن سالۋ ناۋقانى بىرقالىپتى، داۋ-دامايسىز ءوتىپ جاتقانىن دا اتاپ ءوتتى.

«ۆاكتسيناتسيا ناۋقانى تىنىش ءوتىپ جاتىر دەسە دە بولادى. جۇكتى جانە بالا ەمىزەتىن ايەلدەر تاراپىنان ۆاكتسينا سۇراۋشىلار كوپ ەدى. سولاردىڭ دەگەنى بولدى. 12 جاستان اسقان بالالار دا وتە بەلسەندى ۆاكتسينا الىپ جاتىر. مەن Pfizer ۆاكتسيناسى اقىلى سەگمەنتكە قاشان شىعاتىنىن ءالى ناقتى ايتا المايمىن، بىراق جاقىن ارادا دەۋگە نەگىز بار. بۇل ماسەلەنى ءبىز تۇراقتى تۇردە تالقىلاپ جاتىرمىز، ماسەلە پىسىقتالۋدا»، دەدى مينيستر.

سوڭعى جاڭالىقتار

مۇناي باعاسى ارزاندادى

ەكونوميكا • بۇگىن، 13:23

ۇقساس جاڭالىقتار