وتكەن اپتادا تاۋەلسىزدىكتىڭ 30 جىلدىعىنا ارنالعان «دالا ديدارى» ونەر فەستيۆالىندە ۇلان جانە گلۋبوكوە اۋداندارىنىڭ كورمەسى اشىلدى. ءار اۋداننىڭ ونەرى وزىنشە ەرەكشە. ءبىرى وزىپ, ءبىرى كەم ءتۇسىپ جاتىر دەۋدەن اۋلاقپىز. بايقاۋ بولعان سوڭ ونى ارنايى قۇرىلعان ادىلقازى مۇشەلەرى جىل سوڭىنا قاراي انىقتايدى.
بۇل جولعى فەستيۆالدا ادەتتەگىدەي اۋدان تۋرالى بەينەبايان ۇسىنىلدى, انشىلەر اۋەلەتە ءان شىرقادى. ساحناعا ۇلان اۋدانىنىڭ «بەسكول», گلۋبوكوە اۋدانىنىڭ «سارىن» فولكلورلىق انسامبلدەرى شىعىپ, ونەر كورسەتتى. جەكە داۋىستاعى انشىلەرى دە قۇيقىلجىتا ءان شىرقاپ, كۇمبىرلەتە كۇي توكتى.
شارانىڭ ەكىنشى بولىمىندە ۆەرنيساج قوناقتارى مۋزەيدىڭ ۇلكەن جانە باعانالى زالدارىنداعى ەكى اۋداننىڭ كورمەسىن تاماشالادى. كورەرمەندەر كورمەنى تاماشالاپ قانا قويعان جوق, امانگەلدى سماعۇلوۆ, نۇرجان ەسحوجين سىندى قولونەر شەبەرلەرىنىڭ دومبىرا, استاۋ جاساۋ ساتتەرىن كوردى, قىزىقتىرعان سۇراقتارىن قويدى. كوپشىلىكتىڭ نازارى جۇننەن تۇسكيىز باسىپ, گوبەلەن, ياعني كىلەم-سۋرەت توقىپ وتىرعان گاۋحار قاليەۆانىڭ شاكىرتتەرىنە اۋدى. ۇلان اۋدانى ماماي باتىر اۋىلىنان كەلگەن اسەم ارىنقۇل قۇرعاق جۇننەن تۇسكيىزدى جاڭاشا تۇرلەندىرسە, ىڭكار باۋىرجانقىزى كەرگىشتە كەستە توقىپ, تاڭداي قاقتىردى ەلدى. ال ماماي باتىر اۋىلىنىڭ وقۋشىسى ءاليحان ءادىلحانوۆ وزىنە كوميكس جانرى ۇنايتىنىن ايتتى. ايتا كەتسەك, ەلىمىزدە كوميكسپەن اينالىساتىن سۋرەتشىلەر ىلەۋدە بىرەۋ. جاس تا بولسا, كۇردەلى جانردى قولعا العان ءا.ءادىلحانوۆتىڭ جۇمىسىنا كاسىبي سۋرەتشىلەر وڭ باعاسىن بەرىپ جاتتى.
شىعىس قازاقستان وبلىسى
