ەلوردا • 03 جەلتوقسان، 2021

LRT قۇرىلىسىن اياقتاۋ ءۇشىن قانشا قارجى قاجەت؟

15797 رەت كورسەتىلدى

ەلورداداعى LRT قۇرىلىسىن اياقتاۋعا قاجەت قارجىنى 3،25 پايىزدىق نەسيە ارقىلى جابۋ كوزدەلىپ وتىر. بۇل تۋرالى نۇر-سۇلتان قالاسىنىڭ اكىمى التاي كولگىنوۆ ورتالىق كوممۋنيكاتسيالار قىزمەتىندە وتكەن بريفينگىدە ءمالىم ەتتى، دەپ حابارلايدى Egemen.kz.

«LRT جوباسى وتە كۇردەلى ەكەنىن، ۇلكەن كاپيتالدى قاجەت ەتەتىنىن بىلەسىزدەر. بىراق باستالعان ءىستى اياقتاۋىمىز كەرەك. 2016 جىلى كونتسورتسيۋممەن جانە بانكتەرمەن كەلىسىشارت بەكىتىلگەن. كەلىسىمشارت قا قول قويىلعانىمەن، كەيبىر بانكتەرگە پروبلەماعا بايلانىستى جوبا ۋاقىتشا توقتاتىلعان بولاتىن. قازىر بانكتەر ارقىلى ينۆەستيتسيا تارتۋ بويىنشا جۇمىس جالعاسىپ جاتىر. جوبانى اياقتاۋىمىز كەرەك. تولىق اقپارات بەرەيىن. جوبانىڭ قۇنى 1،8 ملرد دوللار تۇرادى، ونىڭ ىشىندە 347 ملن دوللار قازىردىڭ وزىندە يگەرىلىپ قويعان. و باستا نەسيە 4،9 پايىزبەن قىتاي دامۋ بانكىنەن الىنعانىن بىلەسىزدەر. كەيىن ءبىز ۇنەمدەۋ تۋرالى شەشىم قابىلدادىق»، دەدى اكىم.

سونداي-اق ول جوبانى قايتا قاراۋ كەزىندە قانشى قاراجات ۇنەمدەلگەنىن اتادى.

ء«وز ەلىمىزدەگى ەكىنشى دەڭگەيلى بانكتەردەن 3،25 پايىزبەن وبليگاتسيالىق قارىز الۋ بويىنشا جۇمىس ىستەپ جاتىرمىز. ياعني بۇل 4،9 پايىزدان الدەقايدا از. ونىڭ ۇستىنە قارىزعا قىزمەت كورسەتۋ بويىنشا 800 ملن دوللار ۇنەمدەيتىن ەدىك. ودان بولەك EPC كەلىسىمشارتى بويىنشا 200 ملن دوللار جانە ۇنەمدەدىك. ستانتسيالار مەن ۆاگونداردىڭ سانىن قىسقارتۋ ارقىلى 150 ملن دوللار ۇنەمدەلدى»، دەدى التاي كولگىنوۆ.

قالا باسشىسى جوبانى اياقتاۋ ءۇشىن 1 ملرد دوللار كولەمىندە قارجى تارتۋ كەرەك ەكەنى تاعى ءبىر ەسكە سالدى.

«LRT-نىڭ قازىرگى كۇيى قالانىڭ ساۋلەتىنە ءسان كىرگىزىپ تۇر دەۋ قيىن. بۇعان دەيىن قانشاما قارجى سالىندى؟! كەلەشەكتە قالانىڭ قوعامدىق كولىگىن دامىتۋ ءۇشىن، ەكولوگيالىق تازا كولىكپەن قامتۋ ءۇشىن بۇل قاجەت. تۇرعىنداردىڭ سانى ءوسىپ كەلە جاتقانىن دا ەسكەرۋ قاجەت. قازىر قالادا 1 ملن 200 مىڭ ادام بار. الداعى 10 جىلدا 2 ملن ادامعا جەتۋى مۇمكىن. ءدال وسى LRT وتەتىن سول جاعالاۋدا قۇرىلىستىڭ تىعىزدىعى ارتىپ كەلەدى. بىلتىرعى پاندەميا جىلىنىڭ وزىندە ەسىل اۋدانىنىڭ حالقىنا 40 مىڭ ادام قوسىلدى. مەن وڭىردە جۇمىس ىستەگەنمى. وڭىرلەر ولشەمىمەن الساق، بۇل ەكى اۋداننىڭ حالقى دەگەن ءسوز. حالىق ءوسىمى ءالى جالعاسىپ جاتىر»، دەگەن اكىم كەلىسسوزدەر جۇرگىزىپ جاتقان باكنتەردىڭ اتىن اتاۋدان باس تارتتى.

«جوبانى ءتۇبى اياقتايمىز. قازىر بانكتەرمەن جۇمىس ىستەپ جاتىرمىز. سولاردىڭ ءوتىنىشى بويىنشا ناقتى قانداي بانك ەكەنىن ايتا المايمىز. كەلىسىمشارتقا قول قويىلعان كەزدە عانا اقپاراتىن بەرەمىز. ناقتى ايتساق، بانكتەر كونتسورتسيۋمىمەن جۇمىس ىستەپ جاتىرمىز. سولاردىڭ ءوتىنىشى بويىنشا جاريالامايمىز. كەلىسىم مىناداي مازمۇندا ءجۇرىپ جاتىر. بۇعان دەيىن ءبىر قارىزدان باس تارتتىق قوي. ونىڭ مولشەرلەمەسى 4،9 پايىز بولسا، بۇل جولى 3،25 پايىز بولادى»، دەدى ەلوردا باسشىسى.

سوڭعى جاڭالىقتار

ۇقساس جاڭالىقتار