ءبىلىم • 03 جەلتوقسان، 2021

پەداگوگتەردىڭ ورتاشا جالاقىسى قانشا؟

105 رەت كورسەتىلدى

قر ءبىلىم جانە عىلىم ءمينيسترى اسحات ايماعامبەتوۆ مۇعالىمدەردىڭ ورتاشا جالاقىسىن ايتتى، دەپ حابارلايدى Egemen.kz.

«وتاندىق ءبىلىم بەرۋدى دامىتۋدىڭ ماڭىزدى كەزەڭدەرىنىڭ ءبىرى پەداگوگتەردىڭ مارتەبەسى تۋرالى زاڭنىڭ قابىلدانۋى بولدى. وزدەرىڭىزدە بىلەسىزدەر، مەملەكەت باسشىسى زاڭ قابىلداۋ جانە پەداگوگتەردىڭ جالاقىسىن كەمىندە 2 ەسە ۇلعايتۋ تۋرالى مىندەت جۇكتەدى. بۇل جۇمىس جۇرگىزىلىپ جاتىر، وزەكتى مىندەت»، دەدى مينيستر قر پرەزيدەنتى جانىنداعى ادام قۇقىقتارى جونىندەگى كوميسسيا وتىرىسىندا.

ءمينيستردىڭ ايتۋىنشا، 2019 جىلعا دەيىن پەداگوگيكا ماماندىعىنا ءتۇسۋدىڭ ورتاشا بالى وتە تومەن، 55-60 بالدى عانا قۇراپ كەلدى. ال زاڭ قابىلدانعاننان كەيىن 2019 جىلدان باستاپ ناقتى ءىس-شارالار قابىلدانىپ، اتالعان ماماندىقتارعا ءتۇسۋ شەكتى بالى 75-كە جەتتى.

«بيىلعى ۇبت قورىتىندىسىندا پەداگوگيكا ماماندىعىنا تۇسۋشىلەردىڭ ورتاشا بالى 96 بالدى قۇرادى. قۇزىرەتتى، باسەكەگە قابىلەتتى مىقتى تۇلەكتەر وسى ماماندىقتى تاڭداپ جاتقانىن بىلدىرەدى. سوعان وراي ەرتەڭ مەكتەپتەرىمىزدى مىقتى پەداگوگتەر كەلەدى. قازىردىڭ وزىندە زاڭ جۇمىس ىستەپ تۇر دەۋگە بولادى»، دەدى ول.

ۆەدومستۆو باسشىسى پەداگوگتەردىڭ جالاقىسى دا ايتارلىقتاي وسكەنىن اتاپ ءوتتى.

«پەداگوگتەردىڭ ەڭبەك جاعدايلارى جاقساردى. جالاقى كوتەرىلدى. ەگەر زاڭ جوباسى قابىلدانعانعا دەيىن ورتاشا جالاقى شامامەن 109 تەڭگە بولسا، بۇگىندە 200 مىڭ تەڭگەدەن اسىپ ءتۇستى. بۇل ەلىمىزدەگى پەداگوگتەردىڭ ورتاشا جالاقىسى»، دەدى اسحات ايماعامبەتوۆ.

سوڭعى جاڭالىقتار

ۇقساس جاڭالىقتار