كىتاپحانا قورىندا قۇندى كىتاپتار ىشىنەن سيرەك كەزدەسەتىن, كوللەكتسيالىق جانە كونە باسىلىمدار – اتاقتى «اتلانتيكا كودەكسىنىڭ» لەوناردو دا ۆينچي مانۋسكريپتىنىڭ كوشىرمەسى ساقتاۋلى تۇر. فوليانت ايگىلى ونەرتاپقىشتىڭ اەروديناميكا, قارۋ, مۋزىكالىق قۇرالدار, ماتەماتيكا, بوتانيكا جانە باسقا سەكىلدى تاقىرىپتارعا سالعان سىزبالارى مەن جازبالارىنان تۇرادى. XVI عاسىردىڭ اياعىندا ءمۇسىنشى پومپەو لەوني قۇراستىرعان «اتلانتيكا كودەكسىنىڭ» تۇپنۇسقاسى قازىرگى كەزدە ميلانداعى امبروزيان كىتاپحاناسىندا ساقتاۋلى. 2009 جىلى قىركۇيەكتە لەوناردو دا ءۆينچيدىڭ سىزبالارى مەن قولجازبالارىنىڭ جيناعى الەم جۇرتشىلىعىنا تانىستىرىلىپ, 2014 جىلى مانۋسكريپت كوشىرمەسى قازاقستان پرەزيدەنتى نۇرسۇلتان نازارباەۆقا تارتۋ ەتىلدى.
سونداي-اق ەلباسىنا قازاقستاندىق عارىشكەر تالعات مۇساباەۆ بەرگەن عارىشتا بولعان قۇران, 1838 جىلعى ەنتسيكلوپەديالىق لەكسيكون دا كىتاپحانا قازىناسىن بايىتىپ تۇر. ونداعى ەڭ ەجەلگى كىتاپ – 1667 جىلى باسىلعان «شاريعات نورمالارى – اياتتار مەن سۇرەلەرگە نەگىزدەلگەن قولجازبا».
تۇڭعىش پرەزيدەنتكە دۇنيەجۇزى مەملەكەتتەرىنىڭ پرەزيدەنتتەرى, ونەر, مادەنيەت قايراتكەرلەرى سىيلاعان قولتاڭباسى بار كوللەكتسياعا سينگاپۋردىڭ نەگىزىن قالاۋشى اكە لي كۋان يۋ-ءدىڭ سىيعا تارتقان كىتابى, ۇلىبريتانيانىڭ بۇرىنعى پرەمەر-ءمينيسترى مارگارەت تەتچەردىڭ «بيلىككە جول», ۇلكەن دجوردج بۋشتىڭ, بيلل كلينتوننىڭ «مەنىڭ ءومىرىم» كىتابى قويىلدى. سونداي-اق امەريكانىڭ 44-پرەزيدەنتى باراك وبامانىڭ «امەريكانىڭ ەڭ وزىق يدەيالارى», قحدر توراعاسى سي ءتسزينپيننىڭ «مەملەكەتتىك باسقارۋ تۋرالى» كىتابى دا بار.
رەسەي فەدەراتسياسىنىڭ تۇڭعىش پرەزيدەنتى بوريس ەلتسين ءوزىنىڭ «زاپيسكي پرەزيدەنتا» كىتابىنا «نۇرسۇلتان ءابىش ۇلىنا اۆتوردان قۇرمەتپەن!» دەپ قولجازبا قالدىرعان. ال «پۋت ك ۆلاستي» اتتى ومىرباياندىق كىتابىندا ۇلىبريتانيانىڭ بۇرىنعى پرەمەر-ءمينيسترى مارگارەت تەتچەر ەلباسىعا جىلى لەبىزىن جەتكىزەدى.
