كوروناۆيرۋس • 02 جەلتوقسان، 2021

«وميكرون» شتامى وقشاۋلايدى

187 رەت كورسەتىلدى

الماتى قالاسى سوڭعى اپتالاردا «جاسىل ايماققا» ءوتىپ، كوۆيد جۇقتىرعاندار سانى ازايعانى وسى ەدى، «وميكرون» شتامىنىڭ اتى ەستىلدى. وسىعان وراي قالالىق سانيتارلىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا جاڭا شتامم دەرتتىڭ قايتا ورشۋىنە اكەلۋى مۇمكىندىگىنە بايلانىستى توي-تومالاق، كوپشىلىك ورىندارعا بارۋدى تىيا تۇرۋدى ەسكەرتتى.

ول مەگاپوليستىڭ «جاسىل اي­ماقتا» ورنالاسقانىنا قارا­ماس­تان، سوڭعى اپتادا كوروناۆيرۋس ينفەكتسياسىنىڭ 641 جاع­دا­يى تىركەلگەنىن مالىمدەدى. الەم­دە ەپيدەميالىق جاعداي نا­شار­­لاپ، قاتاڭ كارانتين رەجىمى قايتا ەنگىزىلگەنىن، وڭتۇستىك افري­كادا قاۋىپتى «وميكرون» مۋتاتسيا­سى­نىڭ پايدا بولعانى تۋرالى ددۇ مالىمەتتەرىن العا تارتتى. «وميكرون» – پاتوگەندى، جۇق­پا­لى­لىعى «دەلتا» نۇسقاسىنان اسىپ تۇ­سەدى جانە اعزاداعى انتي­دە­نە­لەر­دى اينالىپ وتۋگە قابى­لەت­تى.

– سوندىقتان حالىقتى، اسىرەسە قارتتاردى، سوزىلمالى اۋرۋلا­رى بارلاردى، جاسوسپىرىمدەر مەن جۇكتى ايەلدەردى ۆاكتسينالاۋ­دى جە­دەلدەتۋ قاجەت. الماتى تۇر­عىن­دا­رى ەلدە «وميكرون» شتا­مى­نىڭ ­پايدا بولۋىنا جانە تارالۋىنا جول بەرمەۋ ءۇشىن، اسىرەسە دەمالىس جانە مەرەكە كۇندەرى ادامدار كوپ جينالاتىن ورىنداردان اۋلاق بولۋ­عا تىرىسقاندارى ءجون، – دەدى ءا.قالىقوۆا.

مامان «وميكروندى» جۇق­تىر­عان وقيعالاردىڭ افريكانىڭ 8 ەلىندە (وار، بوتسۆانا، لەسوتو، نامي­بيا، زيمبابۆە، موزامبيك، ەسۆاتيني، تانزانيا)، سونداي-اق بەلگيادا، يزرايلدە، گونكونگتا، گەرمانيادا، چەحيادا جانە ۇلى­بري­تا­نيادا تىركەلگەنىن اتادى.

«وميكرون» الدىڭعى نۇسقا­لار­دان كوپتەگەن جاڭا مۋتاتسيا­لار­مەن ەرەكشەلەنەدى. ونىڭ قا­زاق­ستانعا كىرۋىنە جول بەرمەۋ ماقساتىندا مەكەمەارالىق كو­ميسسيا 3 جەلتوقساننان باس­تاپ بوتسۆانا، وار، لەسوتو، ناميبيا، زيمبابۆە، موزامبيك، مالاۆي، ماداگاسكار، ەسۆيتيني، تانزانيا جانە گونكونگتان شەتەل ازاماتتارىنىڭ قازاقستانعا كىرۋىن شەكتەۋ تۋرالى شەشىم قابىلداپ وتىر. «وميكرونعا» قاتىستى كۆي جاعدايلارى انىقتالعان ەلدەردەن كەلگەن ادامدار پتر نا­تيجەسىنە قاراماستان 7 كۇنگە وق­شاۋلانۋعا ءتيىس. مىسىرمەن اۋە قاتىناسىن توقتاتا تۇرۋ تۋرالى شەشىم قابىلداندى.

الماتى قالاسى اكىمىنىڭ ورىنباسارى ماقسات قيقىموۆ اپتا سايىن قالالىق ستاتسيونارلاردىڭ، ەمحانالار مەن ءدارىحانالاردىڭ دارىلىك زاتتارمەن، مەديتسينالىق ماقساتتاعى بۇيىمدارمەن (ممب) جانە جەكە قورعانۋ قۇرالدارىمەن قامتاماسىز ەتىلۋىنە مونيتورينگ جۇرگىزەتىندىلىگىن مالىمدەدى.

بۇگىنگى تاڭدا ستاتسيونارلاردا 2 209 مىڭ ءدارى-دارمەك بار. بۇدان باسقا، 736 مىڭ دارىلىك زاتتار جەتكىزىلەدى. قالا ەمحانالارىندا 299 مىڭ دارىلىك زاتتار بار، قوسىمشا 199 مىڭ دارىلىك زات­تار ءتۇسۋى كەرەك. ازىرگە كورو­نا­­ۆيرۋس ينفەكتسياسىن ەمدەۋدە سۇرانىسقا يە ءدارى-دارمەكتەر بارلىق ءدارىحانادان تابىلادى. قام­تاماسىز ەتۋ قورى 85-90%-دى قۇرايدى، قويمالاردا 1،3 ملن سۇرانىسقا يە پرەپارات بار.

تۇراقتاندىرۋ قورىنىڭ قا­را­­جاتى ەسەبىنەن 2020 جىل­عى شىلدە مەن 2021 جىلعى قىركۇيەك ارالىعىندا الماتىعا جوس­پار­لان­عان 40 ملن دارىلىك زاتتار مەن ممب-دان 58،8 ملن اكەلىندى، 43،6 ملن ىسكە اسىرىلدى. بۇل رەتتە 8 ملن مولشەرىندە تومەندەتىلمەيتىن قال­دىق ساقتالدى. ايتا كەتۋ كەرەك، قالانىڭ مەديتسينالىق ۇيىمدارى، ءدارى-دارمەكتەر مەن مەديتسينالىق ماقساتتاعى بۇيىمداردىڭ ءىرى كوتەرمە جەتكىزۋشىلەرى، سونداي-اق قالانىڭ بولشەك ساۋدا جەلىلەرى 2020 جىلعى تاجىريبەنى ەسكەرە وتىرىپ، سۇرانىستىڭ ىقتيمال وسۋى­نە الدىن الا دايىندالىپ، قوي­مالارىندا قور جاساقتاپ جات­قان جايى بار.

دارىلىك زاتتار جانە ممب تۇراقتاندىرۋ قورى جۇمىسىنىڭ وڭ تاجىريبەسىن، تۇرعىنداردى ۆاكتسينالاۋ دەڭگەيىن جانە قالانىڭ فارماتسەۆتيكالىق كومپانيالارىندا دارىلىك زاتتار جانە ممب قورلارىنىڭ بولۋىن ەسكەرە وتىرىپ، الماتى اكىمدىگى اينالىم كەستەسى بويىنشا 3،75 ملن بىرلىك مولشەرىندە تومەندەتىلمەيتىن قوردى ساقتاي وتىرىپ، كەمىندە 9،2 ملن بىرلىك دارىلىك زاتتار جانە ممب جەتكىزۋ ءۇشىن 2،77 ملرد تەڭگە ءبولدى. وسىلايشا، قالادا ەكى ايلىق بەرىكتىك قورى ساقتالادى، بۇل دسم تالاپتارىنا سايكەس كەلەدى.

ءوز كەزەگىندە ءا.قالىقوۆا ۇجىم­­دىق يممۋنيتەتتى قالىپ­تاس­­تىرۋ ءۇشىن بۇگىنگى 56،5%-دىق كور­­سەتكىش جەتكىلىكسىز دەپ ەسەپ­تەي­دى، سوندىقتان ۆاكتسينالاۋ وتە ما­ڭىزدى.

– بۇگىندە ءبىز ۇجىمدىق يممۋ­ني­تەت دەڭگەيىنىڭ 56،5%-ىنا جەت­تىك، ول ۆاكتسينالانعانداردىڭ 48،4%-ىنان جانە اۋىرىپ جازىل­عان ادامداردىڭ 8،1%-ىنان تۇرا­دى. بۇل رەتتە ۆاكتسينالاۋدان كەيىن سىرقاتتانعانداردىڭ ۇلەس سال­ماعى ەگۋ ناۋقانى باس­تال­عان­نان بەرى نەبارى 0،3%-دى –
3 151 ادامدى قۇرادى. ال ىندەتتىڭ قايتا باس كوتەرۋىنە جول بەرمەۋ ءۇشىن ۆاكتسينالاۋ ارقىلى، ونىڭ ىشىندە 9 اي نەمەسە 6 اي بۇرىن ەكپە العاندارعا ەكپە قايتالانۋى مۇمكىن، – دەيدى ءا.قالىقوۆا.

ۆيرۋس جۇقتىرعانداردىڭ ىشىندە جۇمىسى بار جانە جۇمىس ىس­تەمەيتىن ازاماتتاردىڭ ۇلەس سال­ماعى – 26،1%، زەينەتكەرلەر – 21،2%، ۇيىمدار، جشس، جك قىزمەتكەرلەرى – 20،3%، وقۋشىلار – 13،1%. ازىرگە الماتىدا Pfizer كومپانياسىنىڭ Comirnaty پرەپاراتىمەن 13 248 ادام ۆاكتسينالاندى، ونىڭ ىشىندە جۇكتى ايەلدەر – 795، بالا ەمىزەتىن ايەلدەر – 2 803، بالالار مەن جاسوسپىرىمدەر – 9 650.

 

الماتى

 

سوڭعى جاڭالىقتار

مۇناي باعاسى كوتەرىلە مە؟

ەكونوميكا • بۇگىن، 23:15

بيلىك جانە ۇلت مەنتاليتەتى

قازاقستان • بۇگىن، 22:54

استاناداعى العاشقى مەشىت

رۋحانيات • بۇگىن، 22:42

الاشوردا وفيتسەرى

قازاقستان • بۇگىن، 22:32

471 مىڭ دوللارعا ساتىلدى

ادەبيەت • بۇگىن، 22:19

شابىت پەن شاراپ

ادەبيەت • بۇگىن، 22:13

ديلەتانتتان داۋىرگە دەيىن

ادەبيەت • بۇگىن، 21:57

ەرتەڭ اۋا رايى قانداي بولادى؟

قازاقستان • بۇگىن، 16:20

ۇقساس جاڭالىقتار