بقو پوليتسيا دەپارتامەنتىنىڭ ءباسپاسوز قىزمەتى ءمالىم ەتكەنىندەي, وقيعا 28 قاراشا كۇنى كەشكىسىن بايتەرەك اۋدانىندا بولدى. شامامەن ساعات 18.50-دە 29 جاستاعى ايەل جۇرگىزۋشى «ۆاز-2114» اۆتوكولىگىمەن ترەكين اۋىلىنان ورالعا قاراي كەلە جاتىپ, ورال-كيرسانوۆ جولىنىڭ 3-شاقىرىمىندا جول اپاتىنا ۇشىرادى.
ول جول قوزعالىسى قاۋىپسىزدىگىن قامتاماسىز ەتپەي, كولىگىمەن 1955 جىلعى ايەلدى قاعىپ كەتتى. سونىڭ سالدارىنان جاراقات العان جاياۋ جۇرگىنشى اۋرۋحاناعا جەتكىزىلدى. قازىرگى كەزدە قر قك 345-بابىنا سايكەس سوتقا دەيىنگى تەرگەۋ امالدارى جۇرگىزىلۋدە.
باتىس قازاقستاندا كەشە جاڭبىر جاۋىپ, ودان كەيىن قاتىرىپ, جولدار كوكتايعاققا اينالدى. ورال قالاسىندا ادامداردىڭ جاياۋ ءجۇرۋى دە قيىنداپ تۇر. بۇگىن تاڭنان باستاپ قۇلاپ, ءتۇرلى جاراقات الىپ, دارىگەرگە جۇگىنگەندەر كوبەيگەن.
