تاريحي شاھاردىڭ بۇگىنگى كەلبەتىن كوپشىلىككە تانىتۋ ماقساتىندا تاۋەلسىزدىكتىڭ 30 جىلدىعىنا وراي, قالا اكىمدىگىنىڭ قولداۋىمەن «تۇرلەنگەن تاراز» رەسپۋبليكالىق فوتو-بەينە, موبيليوگرافيا شەبەرلەرىنىڭ بايقاۋى ۇيىمداستىرىلعان بولاتىن. شاھاردىڭ بارلىق بولمىسىن ءبىر عانا نىساناعا سىيدىرعان شەبەرلەر بايقاۋعا «ۇزدىك موبيليوگراف», «ۇزدىك درون ءتۇسىرۋشى», «ۇزدىك فوتوگراف», «ۇزدىك سيلۋەت», «ۇشپالى سۋرەت» سياقتى 15 اتالىم بويىنشا قاتىسقان.
وبلىستىق تاريحي-ولكەتانۋ مۋزەيىندە اتالعان بايقاۋدىڭ جەڭىمپازدارىن ماراپاتتاۋ ءراسىمى ءوتتى. جالپى, بايقاۋعا قاتىسقان 46 ادامنىڭ ىشىنەن 15 ۇمىتكەر وزا شاۋىپ, اتالعان ءار اتالىم بويىنشا جەڭىمپاز اتاندى. قاتىسۋشىلاردىڭ ارقايسىسى كۇن ساناپ كوركەيىپ كەلە جاتقان تاراز قالاسىنىڭ بۇگىنگى كەسكىن-كەلبەتىن جان-جاقتى دۇنيەلەرى ارقىلى بارىنشا اسەرلى ەتىپ كورسەتە بىلگەن. نىساناعا, اسىرەسە, كونە شاھاردىڭ تاريحي-مادەني ورىندارى كوپ ىلىنگەن. سونىمەن قاتار كەيىنگى كەزدەرى مەملەكەت قولداۋىنىڭ ناتيجەسىندە بوي كوتەرگەن نىساندار دا نازاردان تىس قالماپتى. بايقاۋدى ۇيىمداستىرۋشىلاردىڭ ايتۋىنشا, بارلىق قاتىسۋشى ۇمىتكەر وزىندىك قولتاڭباسىمەن, ويلاۋ ەرەكشەلىگىمەن جانە كورە ءبىلۋ قابىلەتىمەن تاريحي شاھاردى تانىتۋعا اتسالىسقان. جەڭىمپازدار مەن جۇلدەگەرلەردى قالا اكىمى ەرجان جىلقىباەۆ ماراپاتتاپ, ولارعا شىعارماشىلىق تابىس تىلەدى.
جامبىل وبلىسى
