وتىرىستا ايماقتاعى ساياسي قۋعىن-سۇرگىنگە ۇشىراعان ازاماتتار جەرلەنگەن اۋماقتاردى انىقتاۋ, جازىقسىز سوتتالعانداردى اقتاۋ ماسەلەسىن عىلىمي تۇرعىدا زەردەلەۋ جۇمىستارى تۋرالى وبلىستىق ءماسليحات حاتشىسى, رەسپۋبليكالىق كوميسسيا مۇشەسى ناۋرىزباي بايقاداموۆ بايانداما جاسادى. وڭىرلىك كوميسسيا جۇمىسىن ۇيلەستىرۋ بويىنشا اتقارىلعان جۇمىستار مەن الداعى جوسپارلار جايلى وبلىستىق ىشكى ساياسات باسقارماسىنىڭ باسشىسى, وڭىرلىك كوميسسيا حاتشىسى ميرا قازبەكوۆا ايتىپ ءوتتى.
وبلىس اكىمى ساياسي قۋعىن-سۇرگىن قۇرباندارىن اقتاۋ باعىتىنداعى جۇمىستارعا باعا بەرىپ, الداعى مىندەتتەردى ايقىندادى.
– قولدا بار مالىمەتتەرگە قاراعاندا, وبلىس بويىنشا 4 038 وتباسى قۋعىنعا ۇشىراپ, 1 153 ادام اتىلىپ كەتكەن. جالالى بولىپ جان قيعان وسى ازاماتتاردى اقتاۋ باعىتىندا ءبىرشاما جۇمىستار جۇرگىزىلدى, ول الداعى ۋاقىتتا دا جالعاسىن تابۋى قاجەت, – دەدى گ.ابدىقالىقوۆا.
ناۋرىزباي بايقاداموۆتىڭ ايتۋىنشا, ساياسي قۋعىن-سۇرگىن قۇرباندارىن تولىق اقتاۋ جونىندەگى وڭىرلىك كوميسسيانىڭ جۇمىس توبى بۇگىندە قۇپيا قورلارمەن جۇمىس ىستەپ, كوپتەگەن ماتەريالعا قول جەتكىزگەن. وبلىستىق پوليتسيا دەپارتامەنتى مۇراعاتىنداعى 3 قوردا 4 669 تۇلعاعا قاتىستى, 3 016 قىلمىستىق ءىس ساقتالىپ تۇر.
كوميسسيا جۇمىسى بارىسىندا وتكەن عاسىرداعى ءتۇرلى قوزعالىسقا قاتىسقانداردىڭ, ساياسي قۋعىن-سۇرگىن قۇرباندارىنىڭ, كۇشتەپ كوشىرىلگەندەر مەن ارنايى قونىستانۋشىلاردىڭ قۇجاتتارى انىقتالدى. سوعىس جىلدارى كەڭەستىك اسكەري تۇتقىندار قاتارىنان قۇرىلعان تۇركىستان لەگيونى ساربازدارىنىڭ ىستەرى نەگىزىندە ازاماتتاردى اقتاۋعا ۇسىنىستار ازىرلەنۋ ۇستىندە.
وبلىستىق ىشكى ساياسات باسقارماسىنىڭ باسشىسى ميرا قازبەكوۆا بۇگىنگە دەيىن وڭىرلىك كوميسسيا جانە جۇمىسشى توپتىڭ 4 وتىرىسى وتكىزىلگەنىن ايتىپ ءوتتى. كوميسسيا جانە جۇمىسشى توپ قۇرامىنا ەنگىزىلگەن عالىمدار بەكىتىلگەن كەستەگە سايكەس مەملەكەتتىك مەكەمەلەر مەن وبلىستىق ارحيۆ مۇراعاتىنداعى قۇپيا قۇجاتتاردى زەرتتەۋدە. ولار ءۇشىن قورقىت اتا اتىنداعى قىزىلوردا ۋنيۆەرسيتەتىنىڭ بازاسىنداعى «مۇستافا شوقاي» عىلىمي-زەرتتەۋ ورتالىعى جانىنان جانە وبلىس ورتالىعىنداعى مۇراعاتتاردا, ءا.تاجىباەۆ اتىنداعى وبلىستىق امبەباپ كىتاپحانادا ارنايى جۇمىس بولمەلەرى جاساقتالعان.
ساياسي قۋعىن-سۇرگىن قۇرباندارىن تولىق اقتاۋ جونىندەگى وڭىرلىك كوميسسيانىڭ جۇمىسىن ۇيلەستىرۋگە وبلىستىق بيۋدجەتتەن قارجى قارالىپ, «ساياسي قۋعىن-سۇرگىن قۇرباندارىن اقتاۋ ماسەلەلەرى جونىندەگى وڭىرلىك ەكسپەديتسيا جۇمىسىن ۇيلەستىرۋ» الەۋمەتتىك جوباسى جۇزەگە اسىرىلۋدا.
جيىندى قورىتىندىلاعان وبلىس اكىمى وڭىرلىك كوميسسيانىڭ جۇمىسىن جانداندىرۋ ماقساتىندا ىشكى ساياسات باسقارماسىنا بىرقاتار تاپسىرما جۇكتەدى.
– رەسپۋبليكالىق كوميسسيا تاراپىنان ەنگىزىلگەن ۇسىنىستار حاتتامالىق تاپسىرماعا ەنگىزىلىپ, وبلىستىق جۇمىسشى توپ مۇشەلەرىنىڭ زەرتتەگەن ماتەريالدارى مەن تىڭ جازبالارىنان جيناق شىعارۋعا قاجەتتى قاراجات جايلى ۇسىنىس ازىرلەنۋى كەرەك. كەلەر جىلى جۇمىسشى توپ قۇرامىنا مادەنيەت, ارحيۆ جانە مۋزەي سالاسىنىڭ ماماندارىن قوسقان ءجون. جۇمىسشى توپ جۇمىسىن اقپاراتتاندىرۋعا ارنالعان كەشەندى مەديا-جوسپار ازىرلەپ, بەكىتۋگە ۇسىنىڭىزدار, – دەدى گۇلشارا ناۋشاقىزى.
وبلىستىق مادەنيەت, ارحيۆتەر جانە قۇجاتتاما باسقارماسىنا ايماق ارحيۆتەرىندەگى ساياسي قۋعىن-سۇرگىن قۇرباندارى تۋرالى قۇجاتتارعا قوسىمشا زەردەلەۋ جۇمىستارىن جۇرگىزىپ, ونى وبلىستىق جۇمىسشى توپپەن بىرلەسىپ تالداۋ تاپسىرىلدى. جازىقسىز جالالى بولعاندار جەرلەنگەن اۋماقتارعا بەلگى قويۋ, زۇلمات جىلدار زاردابى تيگەن قايراتكەرلەر تۋرالى ارنايى اقپاراتتىق كىتاپشالار ازىرلەۋ مىندەتتەلدى. وبلىستىق پروكۋراتۋرا, ۇلتتىق قاۋىپسىزدىك كوميتەتى, ىشكى ىستەر دەپارتامەنتى ساياسي قۋعىن-سۇرگىن قۇرباندارى تۋرالى جابىق ارحيۆ قورلارىنداعى قۇجاتتاردى جان-جاقتى زەردەلەۋ جانە ولاردى كەزەڭ-كەزەڭىمەن قۇپياسىزداندىرۋ جونىندە ءتيىستى جۇمىستاردىڭ جۇرگىزىلۋىنە ىقپال جاساۋى قاجەت.
قىزىلوردا
