«اش-شاباب» قارۋلى توبى موگاديشونى ءدۇر سىلكىندىرگەن كولىك جارىلىسىنا قاتىستى جاۋاپكەرشىلىكتى ءوز موينىنا الدى. كۋاگەرلەردىڭ ايتۋىنشا, وقيعا ورنىندا وق اتىلعان.
سومالي پوليتسياسىنىڭ وكىلى ابديفات ادەن حاسسان جۋرناليستەرگە ازىرگە 8 ادامنىڭ قازا تاپقانى انىقتالعانىن حابارلادى. ونىڭ ايتۋىنشا, جاراقاتتانعاندار مەن قازا تاپقانداردىڭ سانى ارتۋى مۇمكىن. سونىمەن قاتار ول جارىلعىش زاتتارمەن تولتىرىلعان جول تالعامايتىن كولىكتەگى تەررورشىنىڭ بۇۇ قاۋىپسىزدىك كونۆويىن نىساناعا العانىن مالىمدەدى.
جەدەل جاردەم قىزمەتى جارىلىس سالدارىنان زارداپ شەككەن 23 ادامدى ەۆاكۋاتسيالادى. باق-تىڭ حابارلاۋىنشا, حالىقارالىق ۇيىم كولىگى مەكتەپ جانىنان ءوتىپ بارا جاتقان. كولىكتە بۇۇ-نىڭ قىزمەتكەرى بولعانى نە بولماعانى ازىرگە بەلگىسىز.
بۇۇ شەنەۋنىكتەرى تۇسىنىكتەمە بەرۋ تۋرالى سۇراۋلارعا بىردەن جاۋاپ بەرگەن جوق.
«اش-شاباب» توبىنىڭ اسكەري وپەراتسيالار جونىندەگى وكىلى ابدياسيس ءابۋ مۋساب شابۋىلدى وسى توپتىڭ سودىرلارى جاساعانىن راستادى.
موگاديشو ورتالىعىندا ورىن العان جارىلىستىڭ قاتتى بولعانى سونشا, جاقىن ماڭداعى مەكتەپتىڭ قابىرعالارى قۇلاپ قالعان. كوشەدەگى ونداعان كولىككە زاقىم كەلگەن. كەلەسى كوشەدەگى اۋرۋحانا دا كۇل-تالقان بولعان. مەكەمە قىزمەتكەرى مۇحاممەد حۋسەين ءوزىن قۇتقارۋشىلاردىڭ قۇلاعان شاتىردىڭ استىنان الىپ شىققانىن ايتادى.
ء«بىزدىڭ اۋرۋحانا جەرمەن جەكسەن بولدى. مەكەمە جانىنداعى مەكتەپتىڭ دە قابىرعاسى تۇگەلدەي قۇلادى. مۇنداي وقيعادا 8 عانا ادامنىڭ ءولۋى مۇمكىن ەمەس. جاپا شەككەندەر سانى كوپ دەپ ويلايمىن. الدىمەن جارىلىس بولدى دا, كەيىن وق اتىلدى», دەدى كۋاگەر.
«اش-شاباب» – ۇزاق جىلدار بويى ءسوماليدىڭ ورتالىق ۇكىمەتىمەن كۇرەسىپ كەلە جاتقان توپ. قارۋلى توپ يسلام ءدىنىنىڭ زاڭدارىن ۇكىمەت جۇيەسىنە ەنگىزۋدى كوزدەيدى. مۇنداي تەرروريستىك شابۋىلدار اتالعان توپتىڭ العاشقى ارەكەتى ەمەس.
