ەكولوگيا • 27 قاراشا، 2021

قىزىلوردا وبلىسىندا 2 سۋ قويماسىن سالۋعا قارجى بولىنەدى

325 رەت كورسەتىلدى

قىزىلوردا وبلىسىندا قاراوزەك جانە كۇمىسكەتكەن سۋ قويمالارىن سالۋعا قوماقتى قارجى بولىنەدى. بۇل تۋرالى سەنات دەپۋتاتتارىنىڭ ساۋالىنا قر پرەمەر-ءمينيسترى اسقار ءماميننىڭ جاۋابىندا ايتىلعان، دەپ حابارلايدى Egemen.kz.

«قىزىلوردا وبلىسىنىڭ سۋ شارۋاشىلىعى وبەكتىلەرىنە 2022 جىلى رەسپۋبليكالىق بيۋدجەتتەن قارجى ءبولۋ جونىندەگى دەپۋتاتتىق ساۋالدارىڭىزدى قاراپ، مىنانى حابارلايمىن. قاراوزەك جانە كۇمىسكەتكەن سۋ قويمالارىن سالۋعا «2022-2024 جىلدارعا ارنالعان رەسپۋبليكالىق بيۋدجەت تۋرالى» قازاقستان رەسپۋبليكاسى زاڭىنىڭ جوباسى اياسىندا 3،86 ملرد تەڭگە، ونىڭ ىشىندە 2023 جىلعا 1 ملرد تەڭگە جانە 2024 جىلعا 2،86 ملرد تەڭگە كوزدەلگەن. 2022 جىلى كۇمىسكەتكەن سۋ قويماسىنىڭ جوبالاۋ-سمەتالىق قۇجاتتاماسىن ازىرلەۋدى اياقتاۋ ءۇشىن 56 ملن تەڭگە جانە قاراوزەك سۋ قويماسىنىڭ قۇرىلىس جۇمىستارىن باستاۋ ءۇشىن 500 ملن تەڭگە ءبولۋ ماسەلەلەرى 2022 جىلعا ارنالعان رەسپۋبليكالىق بيۋدجەتتى ناقتىلاۋ شەڭبەرىندە قاراستىرىلاتىن بولادى»، دەدى ۇكىمەت باسشىسى ءوز جاۋابىندا.

پرەمەر-ءمينيستردىڭ اتاپ وتۋىنشە، جاڭاقورعان اۋدانىنىڭ 30 مىڭ گەكتار سۋارمالى ەگىستىك جەرلەرىن سۋمەن قامتاماسىز ەتۋ ماقساتىندا ەكولوگيا، گەولوگيا جانە تابيعي رەسۋرستار مينيسترلىگى سۋ رەسۋرستارى كوميتەتىنىڭ باعىنىسىنداعى جوبالاۋ ۇيىمى («قازسۋشار» رەسپۋبليكالىق مەملەكەتتىك كاسىپورنىنىڭ قىزىلوردا فيليالى) سىرداريا وزەنىندە سۋ توسپاسىنىڭ قۇرىلىسىن بىرنەشە كونسترۋكتيۆتى جوبالىق شەشىمدەرىمەن سالۋ ماسەلەسىن جان-جاقتى قاراستىرىپ، ءتيىستى جوبالاۋ-ىزدەستىرۋ جۇمىستارىن جۇرگىزدى.

«الدىن الا ەسەپتەۋلەر بويىنشا سىرداريا وزەنىندە سۋ توسپا قۇرىلىسىنىڭ قۇنى 12-35 ملرد تەڭگە ارالىعىندا قۇرايتىن بولادى. ەكونوميكالىق ءتيىمدى نۇسقا رەتىندە ۇرلەمەلى سۋ توسپاسىن سالۋ قاراستىرىلۋدا، الدىن الا ەسەپ بويىنشا ونىڭ قۇنى 14،6 ملرد تەڭگەنى قۇرايدى. سىرداريا وزەنىندە سۋ توسپاسىن سالۋ ماسەلەسى قازاقستان رەسپۋبليكاسىنىڭ زاڭناماسىندا كوزدەلگەن تارتىپپەن (مەملەكەتتىك ينۆەستيتسيالىق ۇسىنىس ازىرلەۋ جانە وعان ەكونوميكالىق قورىتىندى الۋ، تەحنيكالىق-ەكونوميكالىق نەگىزدەمە جانە جوبالاۋ-سمەتالىق قۇجاتتاما ازىرلەۋ) ىسكە اسىرىلاتىن بولادى. جالپى قىزىلوردا وبلىسىنىڭ سۋ شارۋاشىلىعى ماسەلەسى قازاقستان رەسپۋبليكاسى ۇكىمەتىنىڭ تۇراقتى باقىلاۋىندا»، دەپ اتاپ ءوتتى اسقار مامين.

سوڭعى جاڭالىقتار

ۇقساس جاڭالىقتار