ءىس-شارا بارىسىندا ساۋدا-ەكونوميكالىق, ينۆەستيتسيالىق, اۋىل شارۋاشىلىعى, ترانزيتتىك-كولىك, سۋ-ەنەرگەتيكا سالالارىنداعى, ونەركاسىپتىك كووپەراتسياداعى, تۋريزمدەگى جانە باسقا دا سالالارداعى ەكىجاقتى ىنتىماقتاستىقتى دامىتۋدىڭ وزەكتى ماسەلەلەرى تالقىلاندى.
قازاقستان مەن وزبەكستانعا ورتالىق ازياداعى بارلىق وڭىرلىك ساۋدانىڭ 70%-عا جۋىعى تيەسىلى. 2021 جىلدىڭ 9 ايىندا ەكىجاقتى تاۋار اينالىمى $2,9 ملرد استى, بۇل 2020 جىلدىڭ سايكەس كەزەڭىنىڭ كورسەتكىشىنەن 28,5%-عا جوعارى. وسى جىلدىڭ قورىتىندىسى بويىنشا وزبەكستان قازاقستاننىڭ ەڭ ءىرى ساۋدا سەرىكتەستەرىنىڭ بەستىگىنە كىرۋى مۇمكىن. ءوزارا ساۋدا كولەمىن 2022 جىلى $5 ملرد دەيىن جانە 5 جىل ىشىندە $10 ملرد دەيىن جەتكىزۋ مىندەتى قويىلدى. ەكى ەلدىڭ شەكاراسىندا «ورتالىق ازيا» حالىقارالىق ساۋدا-ەكونوميكالىق ىنتىماقتاستىق ورتالىعىن قۇرۋ جوباسىن ىسكە اسىرۋ بويىنشا جۇمىس جۇرگىزىلۋدە.
قر پرەمەر-ءمينيسترى ونەركاسىپتىك كووپەراتسيا سالاسىنداعى قازاقستان-وزبەكستان ىنتىماقتاستىعىنىڭ جوعارى سەرپىنىن اتاپ ءوتتى.
«Hyundai Auto Asia» بىرلەسكەن كاسىپورنى ءتيىمدى جۇمىس ىستەپ تۇر. «استانا-موتورس» كومپانياسى دجيزاك قالاسىندا Hyundai اۆتوموبيلدەرىن شىعاراتىن زاۋىت سالۋ ماسەلەسىن پىسىقتاۋدا. قوستاناي قالاسىندا «سارىارقااۆتوونەركاسىپ» جشس «UZAuto Motors» اق-مەن بىرلەسىپ Chevrolet اۆتوموبيلدەرىنىڭ, «MAN Auto – Uzbekistan» اق-مەن MAN جۇك اۆتوموبيلدەرىنىڭ ءوندىرىسىن جولعا قويدى. بيىلعى جىلدىڭ قاراشا ايىندا قوستاناي قالاسىندا «اگروماشحولدينگKZ» اق لوكاليزاتسيالاۋ ورتالىعىندا اۋىل شارۋاشىلىعى تەحنيكاسىن ءوندىرۋ بويىنشا «Nurafshon» بىرلەسكەن كاسىپورنى قۇرىلدى. جەڭىل ونەركاسىپتەگى كووپەراتسيانىڭ ءساتتى مىسالى «Alliance» بىرلەسكەن كاسىپورنىندا جانە «Turkestan Textile» تىگىن فابريكاسىندا توقىما ءوندىرىسىن ىسكە قوسۋ بولدى. «ماشينا جاساۋ, قۇرىلىس يندۋسترياسى جانە فارماتسەۆتيكا ونەركاسىبى سالالارىنداعى جاڭا بىرلەسكەن جوبالار ءۇشىن باسقا دا الەۋەتتى ءوسۋ نۇكتەلەرى بار», دەدى اسقار مامين.
قر ۇكىمەتىنىڭ باسشىسى قازاقستاننىڭ وزبەكستانمەن ترانزيتتىك-كولىك سالاسىنداعى ءوزارا ءىس-قيمىلىنىڭ جوعارى دەڭگەيىن اتاپ ءوتتى — تەمىر جول ينفراقۇرىلىمىن دامىتۋ, اۆتوموبيل وتكىزۋ پۋنكتتەرىن جاڭعىرتۋ بويىنشا بىرلەسكەن ءىرى جوبالاردى ىسكە اسىرۋ جۇمىستارى جۇرگىزىلۋدە, جۇك تاسىمالداۋ ءۇشىن قولايلى تاريفتىك ساياسات قالىپتاستىرىلدى.
وسى جىلدىڭ 10 ايىندا قر مەن ءور اراسىنداعى تەمىر جول تاسىمالىنىڭ كولەمى 20,5 ملن توننانى قۇرادى. قازاقستان پرەمەر-ءمينيسترى ەكى ەلدىڭ قورشاعان ورتانى قورعاۋ, سۋ جانە ورمان شارۋاشىلىعى سالاسىنداعى ىنتىماقتاستىعىنىڭ ماڭىزدىلىعىن اتاپ ءوتتى. بىرلەسكەن كۇش-جىگەرمەن ۆەگەتاتسيالىق كەزەڭدە توقتاعۇل جانە قايراقۇم سۋ قويمالارىنان قوسىمشا سۋ اعىزۋ قامتاماسىز ەتىلدى, بۇل قر جانە ءور اۋىل شارۋاشىلىعى تاۋارىن وندىرۋشىلەردىڭ قاجەتتىلىكتەرىن قامتاماسىز ەتتى. ارال تەڭىزىنىڭ وزەكتى ەكولوگيالىق پروبلەمالارىن شەشۋ, بۇكىل ارال ءوڭىرىنىڭ الەۋمەتتىك-ەكونوميكالىق دامۋىن قولداۋ بويىنشا بىرلەسكەن جوبالار ىسكە اسىرىلۋدا.
«ارال تەڭىزىنىڭ قۇرعاعان تۇبىنە سەكسەۋىل كوشەتتەرىن وتىرعىزۋ بويىنشا كۇش-جىگەرىمىزدى بىرىكتىرۋدى ۇسىنامىز», دەدى ا. مامين.
سونىمەن قاتار, قوس تاراپ «ترانسشەكارالىق ىنتىماقتاستىق ءوسۋدىڭ جاڭا نۇكتەسى رەتىندە» تاقىرىبىندا قر مەن ءور وڭىرارالىق ىنتىماقتاستىعىنىڭ III فورۋمىنا قاتىستى, وعان 200-دەن استام ادام – مەملەكەتتىك ورگانداردىڭ, وڭىرلەردىڭ باسشىلارى, سونداي-اق ەكى ەلدىڭ ىسكەر توپتارىنىڭ وكىلدەرى قاتىستى. قر ساۋدا جانە ينتەگراتسيا ءمينيسترى باقىت سۇلتانوۆ, ءور ينۆەستيتسيالار جانە سىرتقى ساۋدا ءمينيسترىنىڭ ورىنباسارى بادريددين ابيدوۆ, تۇركىستان وبلىسىنىڭ اكىمى ومىرزاق شوكەەۆ, ماڭعىستاۋ وبلىسىنىڭ اكىمى نۇرلان نوعاەۆ, اقتوبە وبلىسىنىڭ اكىمى وڭداسىن ورازالين, قاراقالپاقستان مينيسترلەر كەڭەسىنىڭ توراعاسى كاحرامان ساريەۆ, جيزاق وبلىسىنىڭ حوكيمى ەرگاش ساليەۆ, تاشكەنت وبلىسىنىڭ حوكيمى زوير ميرزاەۆ جانە ت. ب. بايانداما جاسادى.
فورۋم اياسىندا ماشينا جاساۋ, اوك, قۇرىلىس ماتەريالدارىن, ەلەكتر تەحنيكالىق ونىمدەرىن, مەديتسينالىق ماقساتتاعى بۇيىمداردى ءوندىرۋ, ينفراقۇرىلىمدى دامىتۋ جانە باسقا سالالاردا جالپى سوماسى $611,3 ملن قۇرايتىن 54 ينۆەستيتسيالىق جانە كوممەرتسيالىق كەلىسىمشارتقا قول قويىلدى.
تۇركىستان قالاسىنا ساپارى بارىسىندا ەكى ەلدىڭ ۇكىمەت باسشىلارى نازارباەۆ زياتكەرلىك مەكتەبىنىڭ اشىلۋ راسىمىنە قاتىستى, ق. ا. ياسساۋي كەسەنەسىنە, « ۇلى دالا ەلى» ورتالىعىنا, «كەرۋەن-ساراي» تۋريستىك كەشەنىنە جانە باسقا دا نىساندارعا باردى.
