مەملەكەت باسشىسى قاسىم-جومارت توقاەۆتىڭ X ازاماتتىق فورۋمىنا ارنالعان قۇتتىقتاۋىن قر پرەزيدەنتى اكىمشىلىگى باسشىسىنىڭ ءبىرىنشى ورىنباسارى داۋرەن اباەۆ وقىدى.
«ازاماتتىق قوعام قۇرۋ ءبىز ءۇشىن نەگىزگى باسىمدىقتىڭ ءبىرى. ەلباسىنىڭ باستاماسىمەن 2003 جىلدان بەرى تۇراقتى وتكىزىلىپ كەلە جاتقان فورۋم وسىنىڭ ايقىن دالەلى. ديالوگتىڭ وسى ۇلگىسى كوپتەگەن ماسەلەنى تالقىلاپ ۇسىنىس ازىرلەيتىن ءتيىمدى پىكىرتالاس الاڭىنا اينالدى.
فورۋم ازاماتتىق باستامالاردى قولداۋ ءۇشىن جۇيەلى شارالار قابىلداۋعا سەپتىگىن تيگىزۋدە. سونداي-اق ستراتەگيالىق جانە زاڭنامالىق قۇجاتتار دايىنداۋعا ىقپال ەتۋدە. بىلتىر مەنىڭ جارلىعىممەن «ازاماتتىق قوعامدى دامىتۋ تۇجىرىمداماسى» بەكىتىلدى. بۇل قۇجات بيلىك ورگاندارى مەن قوعامدىق ۇيىمداردىڭ سەرىكتەستىگىن كۇشەيتۋدى كوزدەيدى. وعان قوسا تۇرعىنداردىڭ ەلدىك ىستەرگە ەركىن ارالاسۋىنا مۇمكىندىك بەرەدى», دەدى پرەزيدەنت قۇتتىقتاۋ حاتىندا.
اۋىلداعى ازاماتتىق بەلسەندىلىكتى دامىتۋ تۋرالى «قاتونقاراعاي اۋدانىنىڭ تۇراقتى دامۋى» قوعامدىق قورىنىڭ ديرەكتورى سەرىك ءجۇنىسوۆ ايتىپ بەردى.
ەسكە سالا كەتەيىك, پرەزيدەنت قازاقستان حالقىنا جولداۋىندا اۋىلدىق جەرلەردەگى ازاماتتىق باستامالاردى قولداۋدىڭ ءتيىمدى تاسىلدەرىن ازىرلەۋ قاجەتتىگىن اتاپ ءوتتى. وتىرىس مودەراتورى, اقپارات جانە قوعامدىق دامۋ ءمينيسترى ايدا بالاەۆا حالقىنىڭ 47%-ى اۋىلدا ءومىر سۇرەتىن مەملەكەت ءۇشىن بۇل باستامانىڭ ستراتەگيالىق ماڭىزى زور ەكەندىگىن اتاپ ءوتتى. «بۇل ەلىمىزدەگى ازاماتتىق باستامالاردى قولداۋدىڭ جاڭا كەزەڭى», دەدى ا.بالاەۆا.
«سانا-سەزىم» ايەلدەر باستامالارى قۇقىقتىق ورتالىعىنىڭ جەتەكشىسى حاسانوۆا شاحنوز ادام قۇقىقتارىن قامتاماسىز ەتۋ بويىنشا شارالاردى ىلگەرىلەتۋ تۋرالى ءوز پىكىرىمەن ءبولىستى.
بۇل سالا قاسىم-جومارت توقاەۆتىڭ ەل حالقىنا جولداۋىندا بەلگىلەنگەن تاعى ءبىر ستراتەگيالىق باعىت ەكەنى ءمالىم.
ش.حاسانوۆا بالالار مەن انالاردىڭ, قارتتاردىڭ, ەرەكشە قاجەتتىلىكتەرى بار ادامداردىڭ, قۇل ساۋداسى قۇرباندارىنىڭ قۇقىقتارى مەن مۇددەلەرىن, سونداي-اق ازاماتتاردىڭ ساياسي جانە الەۋمەتتىك قۇقىقتارىن قامتاماسىز ەتۋ ماسەلەلەرىن قوزعادى.
ءوز كەزەگىندە مينيستر ا.بالاەۆا بيىلعى 10 ماۋسىمدا پرەزيدەنت «ادام قۇقىقتارى سالاسىنداعى ءبىرىنشى كەزەكتەگى شارالار جوسپارىنا» قول قويعانىن ەسكە سالدى.
«بۇل مەملەكەت پەن پرەزيدەنتتىڭ: قازاقستاندىقتاردىڭ قۇقىقتارى مەن بوستاندىقتارىن قورعاۋدى قامتاماسىز ەتۋ سالاسىنداعى ەلەۋلى وزگەرىستەرگە دايىن ەكەندىگىن كورسەتەدى», دەدى ا.بالاەۆا.
ازاماتتىق قوعامدى دامىتۋ قاۋىمداستىعىنىڭ اتقارۋشى ديرەكتورى دجاميليا اسانوۆا حالىقارالىق ميسسيالاردىڭ ازاماتتىق باستامالاردى دامىتۋعا قوسقان ۇلەسى تۋرالى ايتىپ بەردى.
وسىعان بايلانىستى ەۋروپاداعى قاۋىپسىزدىك جانە ىنتىماقتاستىق ۇيىمىنىڭ از ۇلتتار ىستەرى جونىندەگى جوعارعى كوميسسارى قايرات ءابدىراحمانوۆتىڭ ارنايى قۇتتىقتاۋ حاتى ماڭىزدى بولدى.
«قازاقستاننىڭ باستى بايلىعى – حالقى مەن ونىڭ بىرلىگى. ازاماتتىق فورۋمنىڭ قازاقستان حالقىنىڭ بەرەكە-بىرلىگىن, ىنتىماعىن جانە جالپى بەيبىتشىلىك پەن تۇراقتىلىققا نەگىزدەلگەن ساياساتىن الەمگە ناسيحاتتاپ وتىرعانى قۋانتادى. ازاماتتىق فورۋم ءوز وزەكتىلىگىن تانىتىپ, حالىق پەن بيلىك اراسىنداعى بايلانىستى نىعايتۋشى الاڭعا اينالعانى انىق», دەپ جازىلعان از ۇلتتار ىستەرى جونىندەگى جوعارعى كوميسسارى قايرات ءابدىراحمانوۆتىڭ حاتىندا.
بىرىككەن ۇلتتار ۇيىمى باس حاتشىسىنىڭ كەڭەسشىسى ميريانا سپولياريچ ەگگەردىڭ فورۋم دەلەگاتتارىنا ارنالعان بەينە-قۇتتىقتاۋ ءسوزى دە ماڭىزدى بولدى. حالىقارالىق ديپلومات قاتىسۋشىلاردى قۇتتىقتاپ, قازاقستاننىڭ ازاماتتىق فورۋمىنا قولداۋ ءبىلدىردى.
ينكليۋزيا ماسەلەلەرى «شىراق» مۇگەدەكتىگى بار ايەلدەر قاۋىمداستىعى» قوعام بىرلەستىگىنىڭ باسشىسى قالتاەۆا ءلاززات سوزىندە ايتىلدى. ول دەنساۋلىعىنىڭ مۇمكىندىكتەرى شەكتەۋلى ادامداردىڭ قوعامداعى دامۋى, قوعامنىڭ بۇنداي ادامدارعا دەگەن كوزقاراسى, سونداي-اق ەشقانداي بوگەتسىز ازاماتتىق قوعام قۇرۋ قاجەتتىلىگى تۋرالى ايتىپ بەردى.
«ەكو ماڭعىستاۋ» باسشىسى كيريلل وسين ءوز سوزىندە قورشاعان ورتانى قورعاۋ مەن ەكولوگيانىڭ ماڭىزدى ماسەلەلەرىن كوتەردى. ەستەرىڭىزگە سالا كەتەيىك, مەملەكەت باسشىسى قاسىم-جومارت توقاەۆ بۇل ماسەلەگە بىرنەشە رەت نازار اۋدارىپ, بەلسەندى ءىس-قيمىل جاساۋعا شاقىردى.
ازاماتتىق فورۋمنىڭ پلەنارلىق وتىرىسىنىڭ قورىتىندى بولىمىندە ازاماتتىق قوعامنىڭ قازىرگى جاعدايى, جەتىستىكتەرى مەن ودان ءارى دامۋ پەرسپەكتيۆالارى تۋرالى قازاقستاننىڭ ازاماتتىق اليانسىنىڭ پرەزيدەنتى نۇرعازيەۆا بانۋ ايتىپ بەردى.
پلەنارلىق وتىرىستان كەيىن ءداستۇرلى «ۇەۇ-عا ارنالعان سىيلىعى» سالتاناتتى تۇردە تابىس ەتىلدى.
سونىمەن قاتار العاش رەت 15 نوميناتسيا بويىنشا 10 جىلدان استام جۇمىس تاجىريبەسى بار ۇەۇ اراسىندا «تاڭداۋ» سىيلىعى تابىستالدى.
ەستەرىڭىزگە سالا كەتەيىك, مەرەيتويلىق ح ازاماتتىق فورۋم استانادا 22-24 قاراشادا ونلاين-فورماتتا باستالىپ, الماتىدا 2021 جىلعى 26 قاراشادا وفلاين-فورماتتا اياقتالادى.
فورۋم اياسىندا 30-دان استام پىكىرتالاس الاڭدارى, ساراپتامالىق تالقىلاۋلار, فاسيليتاتسيالىق جانە پانەلدىك سەسسيالار ۇيىمداستىرىلدى.
X ازاماتتىق فورۋمدا قازاقستان تاۋەلسىزدىگىنىڭ 30 جىلدىعى اياسىندا بۇگىنگى كۇننىڭ ەڭ وزەكتى تاقىرىپتارى تالقىلاندى. فورۋم ازاماتتىق قوعامنىڭ 100-دەن استام جەتەكشى وكىلدەرى قاتىسقان گيبريدتى ءىس-شارالار ارقىلى 20.000-عا جۋىق ادامدى قامتىدى.
