ەكولوگيا • 26 قاراشا، 2021

ەكولوگيا – ازاماتتىق قوعام نازارىندا

ەكولوگيا، گەولوگيا جانە تابيعي رەسۋرستار ءمينيسترى سەرىكقالي برەكەشەۆ X ازاماتتىق فورۋم اياسىندا ۇكىمەتتىك ەمەس ۇيىمدار جانە ازاماتتىق سەكتور وكىلدەرىمەن كەزدەسىپ، قورشاعان ورتانى قورعاۋ، گەولوگيا، سۋ رەسۋرستارى، ورمان شارۋاشىلىعى جانە جانۋارلار الەمىنىڭ وزەكتى ماسەلەلەرىن تالقىلادى.

دۋمان اناش

مينيسترلىكتىڭ قىزمەتىنە قىسقاشا شولۋ جاساعان ۆەدومستۆو باسشىسى لاستانۋ دەڭگەيى جوعارى 10 قالاداعى اتموسفەرالىق اۋانىڭ جاي-كۇيى مەن ونى جاقسارتۋ ءۇشىن قابىلدانىپ جاتقان شارالار تۋرالى ايتىپ بەردى.

الماتى قالاسىندا 2-ءشى جەو-دا بۋ-گاز قوندىرعىسىن سالۋ جانە 3-ءشى جەو-نى جاڭعىرتۋ تۋرالى شەشىم قابىلداندى. «ارسەلورميتتال تەمىرتاۋمەن» كەلىسسوزدەر ناتيجەسىندە كاسىپورىندا قازاندىق جانە گاز تازالاۋ جابدىقتارىن قايتا جاڭارتۋ جۇرگىزىلەدى. بۇل ءوز كەزەگىندە 2025 جىلعا دەيىن اتموسفەراعا شىعارىندىلاردى 30%-عا تومەندەتۋگە مۇمكىندىك بەرەدى. سونداي-اق تەمىرتاۋ قالاسىنىڭ اينالاسىنا 500 مىڭ ءتۇپ اعاش وتىرعىزىلادى. شىعىس قازاقستان وبلىسىندا «قازتسينك» اق جاڭا قولجەتىمدى تەحنولوگيالاردى پايدالانا وتىرىپ، 2025 جىلعا قاراي شىعارىندىلاردى 20%-عا ازايتادى. ماڭعىستاۋ وبلىسىنداعى «قازمۇنايگاز» ۇك» مۇناي ونىمدەرىن جويۋ مەن كادەگە جاراتۋدى باستادى. 2،5 ملن توننا قالدىقتىڭ شامامەن 1 ملن تونناعا جۋىعى
(998 مىڭ توننا) جويىلدى. بۇل جۇمىس تولىقتاي 2024 جىلى اياقتالادى.

«جالپى، ەكولوگيالىق احۋالدى جاقسارتۋ ماقساتىندا جاڭا ەكولوگيالىق كودەكس قابىلداندى، «جاسىل قازاقستان» ۇلتتىق جوباسى بەكىتىلدى، وڭىرلەردىڭ ەكولوگيالىق پروبلەمالارىن كەشەندى شەشۋ جونىندەگى جول كارتالارى بەكىتىلدى. قازىردىڭ وزىندە جۇمىس ءجۇرىپ جاتىر. مينيسترلىك پەن كاسىپورىندار اراسىندا شىعارىندىلاردى 20%-دان 30%-عا دەيىن تومەندەتۋدى كوزدەيتىن مەموراندۋمدارعا قول قويىلدى»، دەپ اتاپ ءوتتى مينيستر ءوز بايانداماسىندا.

ءارى قاراي ول سۋ رەسۋرستارى، فەرمەرلىك شارۋاشىلىقتاردى سۋمەن قامتاماسىز ەتۋ، كانالداردى قايتا جاڭارتۋ جانە تسيفرلاندىرۋ، ترانسشەكارالىق وزەندەر پروبلەمالارى مەن بالقاش كولىنىڭ جاعدايى، سونداي-اق بالىق، ورمان شارۋاشىلىعىن دامىتۋ جانە جانۋارلار دۇنيەسىن قورعاۋ ماسەلەلەرى بويىنشا اتقارىلىپ جاتقان شارالاردى تىلگە تيەك ەتتى.

ۇلتتىق گەولوگيالىق قىزمەتتى قۇرۋ بويىنشا س.برەكەشەۆ كەن ورنىنىڭ، نە باسسەيننىڭ، نە تۇتاس ءوڭىردىڭ گەولوگيالىق قۇرىلىسى مەن جەر قويناۋىنىڭ جاي-كۇيى تۋرالى شىنايى دەرەكتەردى كورسەتەتىن مودەل قۇرۋ فۋنكتسيالارى بار قىزمەتتى قۇرۋ جوسپارلانىپ وتىرعانىن ايتتى. بۇل، سايىپ كەلگەندە، قورلاردى ەسەپتەۋگە جانە كەن ورنىن يگەرۋ جوباسىن جاساۋعا مۇمكىندىك بەرەدى. جالپى العاندا، قىزمەت بيۋروكراتيالىق راسىمدەردى ازايتىپ، گەولوگيالىق اقپاراتتىڭ حالىقارالىق ستاندارتتارعا سايكەس ساقتالۋىن جانە ونىڭ قولجەتىمدىلىگىن قامتاماسىز ەتەدى.

سۇراق-جاۋاپ فورماتىندا مينيستر فورۋمعا قاتىسۋشىلاردىڭ سۇراقتارىنا دا جاۋاپ بەردى.

ء«وز جۇمىسىمىزدا ءبىز ارقاشان «حالىق ۇنىنە قۇلاق اساتىن مەملەكەت» قاعيداتىن ۇستانامىز جانە ازاماتتىق قوعاممەن ديالوگ ورناتۋعا دايىنبىز، ويتكەنى قورشاعان ورتانى قورعاۋ – ءبارىمىزدى بىرىكتىرەتىن ورتاق ءىس»، دەپ تۇيىندەدى ءوز ءسوزىن ۆەدومستۆو باسشىسى ونلاين رەجىمىندە وتكەن كەزدەسۋ بارىسىندا.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز