رەسمي مالىمەتكە سايكەس, 16 جەلتوقساننان باستاپ Airbus A320 جولاۋشىلار ۇشاعى اپتاسىنا ءۇش رەت – سەيسەنبى, بەيسەنبى جانە سەنبى كۇندەرى دەليگە ۇشاتىن بولادى.
«رەيس الماتىدان تاڭعى ساعات 07:50-دە شىعىپ, دەليگە 11.10-دە ۇشىپ بارادى. ال دەليدەن بەرى قاراي شىعۋ ۋاقىتى - 12:20, الماتىعا ساعات 16:40-تا كەلەدى. ءبىر جاققا ۇشۋ ۋاقىتى 3 ساعات 50 مينۋت», دەلىنگەن رەسمي حابارلامادا.
دەليگە ۇشاتىن بارلىق جولاۋشى, سونىڭ ىشىندە بالالار دا, www.newdelhiairport.in سايتىندا ءتيىستى فورمانى تولتىرۋى قاجەت. ال 5 جاستان اسقان جولاۋشىلار كەلۋگە دەيىن 72 ساعات بۇرىن كوروناۆيرۋسقا جاسالعان پتر-تەست تەرىس ناتيجەسىن تىركەپ جىبەرۋگە ءتيىس.
ۇشاققا قوناردىڭ الدىندا جانە ودان تۇسكەندە ءاربىر جولاۋشىنىڭ دەنە قىزۋى ولشەنەدى. ەگەر كوروناۆيرۋستىق ينفەكتسيانىڭ بەلگىلەرى انىقتالسا, سول ەلدىڭ مەديتسينالىق مەكەمەسىنە وقشاۋلاپ قويادى.
كوروناۆيرۋسقا قارسى ۆاكتسينا الماعان, سونداي-اق, ۆاكتسينالاۋدىڭ تولىق كۋرسىنان وتپەگەن تۋريستەر دەليگە كەلگەن بويدا پتر-تەست تاپسىرىپ, ۇيدە جەتى كۇندىك كارانتيندە وتىرادى. ودان كەيىن تاعى پتر-تەست تاپسىرىپ شىعۋى قاجەت.
