ناتيجەسىندە, وتكەن 9 ايدا بيۋدجەتكە 144 ملرد تەڭگە ءتۇستى, بۇل وتكەن جىلدىڭ سايكەس كەزەڭىنەن 1,8 ەسە ارتىق. قولدانىستاعى باعدارلامالار اياسىندا 3 مىڭنان استام كاسىپكەرگە 26 ملرد تەڭگە كولەمىندە قولداۋ كورسەتىلگەن. ال «ەڭبەك» باعدارلاماسى شەڭبەرىندە «باستاۋ بيزنەس» كاسىپكەرلىك نەگىزدەرىن وقىتۋ جوباسى اۋىلداعى اعايىننىڭ كاسىپ اشىپ, ءىسىن ىلگەرىلەتۋگە ەرەكشە ىقپال ەتىپ وتىر دەۋگە بولادى.
– بيىل «ەڭبەك» باعدارلاماسى شەڭبەرىندە «باستاۋ بيزنەس» كاسىپكەرلىك نەگىزدەرىن وقىتۋ جوباسى بويىنشا 3,1 مىڭنان اسا جۇمىسسىز جانە ءىسىن جاڭا باستاعان كاسىپكەرلەر ءبىلىم الدى. وتكەن جىلدارى اياقتاعانداردى ەسكەرە وتىرىپ, جوبا بويىنشا وقىتىلعانداردىڭ ىشىنەن 1 600 شاماسىنداعى بيزنەس-جوباعا مەملەكەتتىك باعدارلامالار اياسىندا گرانتتىق قارجىلاندىرۋ جاسالىپ, كاسىپكەرلەرگە جەڭىلدەتىلگەن نەسيە بەرىلدى, – دەيدى وبلىستىق كاسىپكەرلەر پالاتاسىنىڭ ديرەكتورى ءلاززات شىڭعىسباەۆا.
«باستاۋ بيزنەس» كاسىپكەرلىك نەگىزدەرىن وقىتۋ جوباسىنا قاتىسىپ, ءوز ءىسىن باستاۋعا قول جەتكىزگەن جاننىڭ ءبىرى – نازگۇل اقجولتاەۆا. ول مەملەكەتتەن قايتارىمسىز گرانت الىپ, جارتىلاي فابريكاتتار شىعاراتىن شاعىن تسەح اشتى. ىسكەر جان بۇگىندە قاپشاعاي قالاسىنىڭ ماڭىنداعى شەڭگەلدى اۋىلىنىڭ بەس مىڭ تۇرعىنىن ءوز ونىمىمەن قامتاماسىز ەتىپ وتىر. نازگۇل اقجولتاەۆا ماماندىعى بويىنشا پەداگوگ, الايدا وسىعان دەيىن ونلاين-بيزنەسپەن اينالىسىپ كەلدى. جەكە ءىسىن دۇكەن اشۋدان باستاعىسى كەلگەنىمەن, كەيىن ءونىم شىعارۋ باعىتىنا بەت بۇردى. وسىلايشا نازگۇل تورتتار, بالىشتەر پىسىرە باستادى, جەمىستەردەن گۇل شوقتارىن جيناپ, ساتتى. ءوندىرىستى ودان ءارى دامىتۋعا وبلىستىق كاسىپكەرلەر پالاتاسى قاپشاعاي قالالىق فيليالىنىڭ ماماندارى قولداۋ كورسەتتى. جاس كاسىپكەرگە «باستاۋ بيزنەس» كاسىپكەرلىك نەگىزدەرى بويىنشا جوباعا قاتىسىپ, كەيىن قايتارىمسىز گرانت الۋعا ءوتىنىم بەرۋ ۇسىنىلدى.
– «باستاۋ بيزنەس» كۋرسىنا قاتىسا وتىرىپ, وڭىرىمىزگە قاجەتتى تاۋارلار نارىعىن زەرتتەپ, تالداۋ جاسادىم. تۇرعىنداردان ۇيدە دايىندالعان, كونسەرۆانتتارسىز, مۇزداتىلعان جارتىلاي فابريكاتتارعا سۇرانىس بار دەگەن پىكىرگە كەلدىم. وسىلايشا مەملەكەتتىك قولداۋ ارقىلى شاعىن تسەح اشتىم, ەندى ءوز دۇكەنىمدى اشۋ ءۇشىن جۇمىس ىستەپ جاتىرمىن, – دەيدى ءوزىنىڭ كاسىپكەرلىكتى مەڭگەرۋ تۋرالى سىرىمەن بولىسكەن نازگۇل.
«ەڭبەك» باعدارلاماسى اياسىندا نازگۇل اقجولتاەۆا 200 ايلىق ەسەپتىك كورسەتكىش كولەمىندە گرانتقا قول جەتكىزىپ, قاراجاتقا جارتىلاي فابريكاتتار شىعاراتىن تسەح ءۇشىن جابدىق ساتىپ الدى. تسەحتا تۇشپارانىڭ ءۇش ءتۇرى, ۆارەنيكتىڭ ءۇش ءتۇرى, كوتلەتتەر, قىرىققابات ورامى, ءمانتى, حينكالي, سامسا, تولتىرىلعان بۇرىش جاسالادى. اي سايىن Damdi Alem برەندىمەن 120 كگ ءونىم شىعارىلادى.
– تۇشپارانى جانە باسقا دا ونىمدەردى قامىر مەن تارتىلعان ەت ساپاسىن جوعالتپاي, حيميالىق قوسپالارسىز قولىمىزبەن جاسايمىز. ساتىپ الۋشىلارىمىزعا ساقتاۋ مەرزىمى از مۇزداتىلعان ونىمدەردى ۇسىنامىز. تۇرعىندار اراسىندا كوكونىس شىرىندارىنان ءتۇرلى-ءتۇستى تۇشپارا ەرەكشە سۇرانىسقا يە. قازىر مەنىمەن بىرگە ەكى ادام جۇمىس ىستەيدى. كەلەسى جىلى ءونىم اسسورتيمەنتىن كەڭەيتىپ, جەكە دۇكەنىمدى اشۋدى جوسپارلاپ وتىرمىن, – دەدى جاس كاسىپكەر.
الماتى وبلىسى
