ارنايى ماقساتتاعى كۇشتەر تۋرالى كوپتەگەن فيلم ءتۇسىرىلىپ, كىتاپتار مەن ماقالالار جازىلىپ جاتسا دا, قالىڭ وقىرمانعا ولاردىڭ ءومىرى قۇپيا بولىپ كورىنەدى. سول سەبەپتەن بولار, جاس جىگىتتەن باستاپ, اسكەري ءومىردىڭ قىر-سىرىن مەڭگەرگەن وفيتسەرلەرگە دەيىن, ءدال وسى ەليتالىق بولىمشەلەردىڭ قاتارىندا قىزمەت ەتۋدى ارماندايدى.
كسرو كەزىندە اتى اڭىزعا اينالعان «ا» («الفا») ءبولىمىنىڭ داستۇرلەرىن جالعاستىرعان تەرروريزمگە قارسى ارنايى اسكەري بولىمشە («ا» ءبولىمى) قىسقا مەرزىمدە جاۋىنگەرلىك دايىندىقتىڭ جوعارعى دەڭگەيىنە قول جەتكىزدى. تاۋەلسىز ەلىمىزدىڭ العاشقى كۇنىنەن باستاپ ۇيىمداسقان قىلمىس پەن تەررورلىق ارەكەتتەرگە قارسى كۇرەستە ەرەكشە كوزگە تۇسكەن «ارىستان» قىزمەتى تەڭدەسسىز ەرلىكتىڭ, ۇستامدىلىق پەن باتىلدىقتىڭ سيمۆولىنا اينالدى.
2015 جىلعى جەلتوقساندا تۇڭعىش پرەزيدەنت نۇرسۇلتان نازارباەۆ «ارىستان» قىزمەتىنىڭ جەكە قۇرامىمەن كەزدەسىپ, اتالعان ۆەدومستۆونىڭ ماتەريالدىق-تەحنيكالىق بازاسىمەن تانىستى.
«سىزدەردىڭ قىزمەتتەرىڭىز اۋىر ەكەنىن بىلەمىن, بۇل كۇندەلىكتى جاتتىعۋلار مەن اعزاعا تۇسەتىن ۇلكەن فيزيكالىق سالماقتار. بىراق جالىنداعان شاعىڭدا بۇل جاراسىمدى ءارى جاعىمدى بولادى عوي. جاس كەزىمىزدە ءبىز دە سىزدەر سياقتى ارنايى ماقساتتاعى جاۋىنگەر بولعاندى قالايتىنبىز. بۇگىنگى كۇننىڭ ناعىز باتىرىسىڭدار. ەشقانداي قاقتىعىستاردىڭ بولماۋىن تىلەيمىن, بىراق وق-ءدارىمىز قۇرعاق بولۋى ءتيىس», دەدى نۇرسۇلتان ءابىش ۇلى.
2016 جىلدىڭ قىركۇيەگىندە قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ «ارىستان» قىزمەتىنىڭ نەگىزىندە «ا» ارنايى ماقساتتاعى قىزمەتىن قۇرۋ تۋرالى جارلىعىنا قول قويدى. مەملەكەتىمىزدىڭ جوعارى باسشىلىعى ۇلتتىق قاۋىپسىزدىكتى قامتاماسىز ەتۋدەگى «ا» ارنايى ماقساتتاعى قىزمەتىنىڭ ورنى مەن رولىنە ەرەكشە نازار اۋدارادى. ماسەلەن, 2020 جىلعى ۇقك القا وتىرىسىندا قازاقستان پرەزيدەنتى قاسىم-جومارت توقاەۆ ءوز سوزىندە: «كوميتەتتىڭ ارنايى قىزمەتى قازىرگى زامانعى سىن-قاتەرلەر مەن قاۋىپتەرگە قارسى تۇرۋداعى ءتيىمدى قۇرالعا اينالعانىنا» توقتالدى.
سوڭعى ونجىلدىقتىڭ وزىندە عانا ارنايى قىزمەت تەرروريستىك سيپاتتاعى 100-گە جۋىق زورلىق-زومبىلىق ارەكەتتىڭ جولىن كەستى. حالىقارالىق تەرروريستىك ۇيىمدار, ونىڭ ىشىندە «ورتالىق ازيا مودجاحەدتەرىنىڭ جاماعاتى», «دجۋند – ءال-حاليفات», «حيزب-ۋت-ءتاحريردىڭ» قازاقستانداعى قۇرىلىمدارىنىڭ كوزدەرى جويىلىپ, باسقا دا كۇردەلى وپەراتسيالار جۇرگىزىلدى. وزگە ەلدەردىڭ سەرىكتەس ارنايى قىزمەتتەرىمەن بىرلەسە وتىرىپ ونداعان تەرروريست پەن ەكسترەميست ىزدەستىرىلىپ, ۇستالدى جانە ەكستراديتسيالاندى.
ارنايى ماقساتتاعى جاساقتىڭ جاۋىنگەرلەرى ءۇشىن العاشقى ماڭىزدى سىناقتىڭ ءبىرى شىمكەنت قالاسىنىڭ اۋەجايىندا ورىن العان رەيستىك اۆتوبۋستاعى كەپىلگە الىنعان ادامداردى بوساتۋ بويىنشا ارنايى وپەراتسياسى بولدى. ول ارنايى كۇشتىك قۇرىلىمدار تاريحىندا «نابات» وپەراتسياسى رەتىندە تانىمال. الەمدىك تاجىريبەدە العاش رەت تەرروريستەر مەن كەپىلگە الىنعاندار اراسىنان شىعىن بولماعان «نابات» وپەراتسياسى اكادەميالىق وقۋلىقتارعا كلاسسيكالىق ۇلگى رەتىندە ەندى.
ارنايى ماقساتتاعى كۇشتەردىڭ كۇندەلىكتى جۇمىسى جاۋىنگەرلىك وپەراتسيالارعا دايىندىقپەن وتەدى. ءبىر كۇنى ولار تەرروريستەر باسىپ العان ۇشاققا «شابۋىل جاساسا», ەرتەڭىنە پويىز ۆاگونىندا نەمەسە تەڭىز كەمەسىندە ءوز داعدىلارىن شىڭدايدى. ارنايى جاۋىنگەرلىك تاپسىرماعا بارماس بۇرىن ساربازدار جۇزدەگەن, مىڭداعان جاتتىعۋدان وتەدى. ءار قادام, ءار قوزعالىس, قارۋدان اتىلعان ءاربىر وق - ءبارى پىسىقتالادى.
«ا» قىزمەتىنىڭ اكىمشىلىك عيماراتىنىڭ ءبىرىنشى قاباتىندا تەرروريزمگە قارسى وپەراتسيالار مەن جەدەل-جاۋىنگەرلىك ءىس-شارالار بارىسىندا قازا تاپقان جاۋىنگەرلەردى ەسكە الۋعا ارنالعان ەسكەرتكىش-بەلگى ورناتىلعان. قارا ءمارمار تاقتا بەتىنە ۇزاق ءارى باقىتتى ءومىر ءسۇرۋدى, بالالارى مەن نەمەرەلەرىن ءسۇيۋدى ارمانداعان باتىرلاردىڭ ەسىمدەرى جازىلعان. ولاردىڭ ەرلىكتەرى ەشقاشان ۇمىتىلماق ەمەس.
«ا» ارنايى ماقساتتاعى قىزمەتتىڭ ساربازدارى ماڭگىلىككە اتتانعان دوستارى تۋرالى وتكەن ۋاقىتتا سويلەمەيدى. ء«بىز ءۇشىن ولار وتانعا شەكسىز قىزمەت ەتۋدىڭ ۇلگىسى. ءبىز باردا ولار دا ءتىرى, ءبىزدىڭ ارامىزدا ءاردايىم كورىنبەي قولداپ, قورعاپ جۇرەدى, ارقايسىسىن ۇمىتپاي, جادىمىزدا ساقتايمىز» دەيدى ساربازدار.
جاۋىنگەرلەر قازا تاپقان قارۋلاستارىنىڭ جۇبايلارى مەن بالالارىنا كومەك پەن قولداۋ كورسەتۋدى وزدەرىنىڭ ازاماتتىق بورىشى سانايدى. بالالاردىڭ اكەلىك قامقورلىق پەن جىلۋىنا ءزارۋ ەكەندەرىن ەسكەرە وتىرىپ, ءاربىر جەتىستىكتەرىنە قولداۋ بىلدىرەدى, سپورتقا قىزىعۋشىلىق تانىتقان بالالارعا قاجەتتى كەڭەس پەن كومەگىن بەرەدى. قازا تاپقان جاۋىنگەرلەردىڭ ۇلدارى دا باتىر اكەلەرىنىڭ ىزىمەن ءجۇرىپ, ءوز ومىرلەرىن اسكەري قىزمەتپەن بايلانىستىرعىسى كەلەتىنى قۋانتادى. مۇنداي جاعدايدا قىزمەت باسشىلىعى جاس بۋىننىڭ اسكەري جوعارى وقۋ ورىنىنا تۇسۋىنە جاعداي جاساۋعا تىرىسادى.
«وتانشىل» ءسوزىن ۇقك «ا» قىزمەتىنىڭ جاۋىنگەرلەرىنە ەش كۇمانسىز قولدانۋعا بولادى. ءوز حالقىنا, ەلىنە, پرەزيدەنتىنە ادال, سۇيىكتى ىسىنە شىن بەرىلگەن بۇگىنگىنىڭ باتىرلارى ەڭ كۇردەلى جەدەل-جاۋىنگەرلىك مىندەتتەردى ورىنداي وتىرىپ, قازاقستاننىڭ بەيبىت ءومىرىن سەنىمدى قورعايدى.
رۇستەم قۇرمانعازين,
اعا لەيتەنانت
