اقباقايدىڭ «التىندارى»

اقباقاي اتى اتالسا, ەلدىڭ ەسىنە ونىڭ التىندارى تۇسەدى. ال سول التىن التىن كۇيىندە قالاي كەلەتىنىنە بىلايعى جۇرت ونشا باس اۋىرتا بەرمەيمىز. شىندىعىندا, ول وراسان زور ەڭبەك پەن ءبىلىمدى, وعان قوسا جىلدار بويعى تاجىريبەنى تالاپ ەتەدى. جامبىل وبلىسىنىڭ مويىنقۇم اۋدانىندا ورنالاسقان ايگىلى «اقباقاي» كەن ورنىنىڭ اتى كەشەگى كەڭەس كەزەڭىندە دۇركىرەپ شىقسا, بۇگىندەرى دە ساپتىاياقتىڭ سىرى كەتسە دە, سىنى كەتپەيدى دەگەندەي, شاما-شارقىنشا جۇمىس ىستەپ كەلەدى. ايماقتىڭ قيىر شەتىندەگى اقباقاي كەنتىن جەرگىلىكتى حالىق قاتتى سۇيەدى دەسەك ارتىق ايتقاندىق بولماس. وعان سول كەن ورنىنا سانالى عۇمىرىن ارناعان مامانداردى قوسىڭىز. ونىڭ ىشىندە ۇشقان قۇس پەن جۇگىرگەن اڭدى ىلۋدە ءبىر كەزدەستىرەتىن وسى ءبىر سىرعا تولى سايىن دالادا ماماندىعىن ماقتانىش تۇتقان نازىك جاندى ارۋلار دا بار. سولاردىڭ قاتارىندا «التىن الماس» اق اقباقاي فيليالى التىن ايىرۋ فابريكاسىنىڭ ينجەنەر-تەحنولوگتارى دامەتكەن تولەگەنوۆا مەن الماش دەگەرباەۆا دا بار. قوس بۇرىمدىنىڭ بۇل جەردە قىزمەت ەتىپ كەلە جاتقاندارىنا ون بەس جىلدان استام ۋاقىت بولىپتى. تەحنولوگ ماماندىعىنىڭ جوعارى ءبىلىمىن العاننان بەرى ارۋلار ءوز سالاسىندا جەمىستى ەڭبەك ەتىپ كەلەدى. بۇل ەكەۋىن دە سالادان بولە-جارا قاراي المايسىز. ەكەۋى دە قاراپايىم جۇمىسشى جاس مامان بولىپ باس­تاپ, فابريكانىڭ بارلىق سالالارىن كورگەن كانىگى ماماندار. ماماندىقتارىن شەكسىز سۇيگەن ولار وزدەرىن وزگە جۇمىستاردا ەلەستەتىپ تە كورمەگەن. «مەن سانالى عۇمىرىمدى ءوز ماماندىعىما ارناسام, ول وسى اقباقايمەن تىعىز بايلانىس­تى. راس, العاشىندا بۇل جەردە قيىنشىلىقتار كەزدەستى. ءالى دە جۇمىس بولعان سوڭ اراگىدىك شىعىپ قالادى. ونىڭ بارلىعىنا دا شىدام مەن جۇمىسقا دەگەن ەرەكشە ىنتا كەرەك. سوندا عانا ءىسىڭ العا باسىپ, بەرەكە كىرەدى», دەيدى دامەتكەن اپاي. ال, الماش بولسا, ارىپتەسىنىڭ سوزىنە قوسىپ-الارىم جوق دەپ ك ۇلىمسىرەيدى. كەيدە اۋىسىم سايىن, كەيدە تاۋلىك بويى باستارىنان كاسكا تۇسپەيتىن نازىك جاندار ۇنەمى قىزۋ جۇمىستا جۇرەدى. وبلىس نەمەسە اۋدان ورتالىقتارىنان ىنتالانسا وسىنشاما جىلدىق مول تاجىريبەمەن جايلى جۇمىس تاۋىپ الاتىندارىنا ءبىز سەنىمدى بولساق تا, ولار ونى ءتىپتى ويلارىنا دا الىپ كورمەگەن. وسى ءبىر قيىندىعى مەن قىزىعى قاتار جۇرگەن قاۋىرت جۇمىستارىن وزگەسىنە استە دە ايىرباستامايدى. ونى مامانداردىڭ ماماندىقتارىنا دەگەن ءار جىلى سوزدەرىنەن اڭعارعاندايمىز. التىندى كەننەن ايىرۋدا ينجەنەر-تەحنولوگتاردىڭ اتقارار جۇمىستارى اۋقىمدى. سالانىڭ سان-سالالى ماماندارى جۇمىلا كوتەرگەن جۇكتىڭ ءبىر شەتىن ۇستاۋدا كەيىپكەرلەرىمىز سەكىلدى ينجەنەر-تەحنولوگتار ەڭبەكتەرى ۇشان-تەڭىز. وزدەرىن فابريكاعا كىرپىش بولىپ قالانعاندارىن باقىتقا بالايتىندىقتارى دا وسىدان شىعار ولاردىڭ. جۇمىستارىن اسا ءبىر ىج­دا­عات­تىلىقپەن بەرىلە جاساپ ءجۇر­گەن جانداردى كورگەندە باقىتتىڭ ەڭ ۇلكەنى دە وسى ما دەرسىڭ. وتباسىندا اياۋلى جار, ارداقتى انا بولىپ, ۇل-قىز تاربيەلەپ وتىرعان قوس انانىڭ ماماندىعىنان بەرەكە تاۋىپ وتىرعانى كەيىنگى بۋىنعا ۇلگى-ونەگە. بىزدەگى وي دا وسىعان سايا­دى. ءابدىراحمان قىدىربەك, «ەگەمەن قازاقستان». جامبىل وبلىسى.