داڭقتى بالۋان داۋلەت تۇرلىحانوۆتىڭ جۇلدەسى ءۇشىن ۇيىمداستىرىلعان جارىستا ءۇرجار, اياگوز, جارما, تارباعاتاي جانە كوكپەكتى اۋداندارىنان, وسكەمەن مەن سەمەي قالالارىنان كەلگەن جاس سپورتشىلار باقتارىن سىنادى.
ءىس-شاراعا اۋدان باسشىلىعى, وبلىستىق گرەك-ريم, ەركىن كۇرەس جانە ايەلدەر كۇرەسى فەدەراتسياسىنىڭ توراعاسى مارات مۇزاپاروۆ, بوكستان ەل قۇراماسىنىڭ باس جاتتىقتىرۋشىسى قايرات ءساتجانوۆ, گرەك-ريم كۇرەسىنەن كسرو سپورت شەبەرى, قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى قايىرتاي ورازالينوۆ قۇرمەتتى قوناقتار قاتارىندا قاتىستى. اۋدان سپورتىنىڭ ارداگەرلەرى دە جارىستىڭ تورىنەن تابىلدى.
جارىستىڭ رەسمي اشىلۋ سالتاناتىندا قۇتتىقتاۋ ءسوز سويلەگەن اۋدان اكىمى رادجان سەيتقانوۆ جاس ۇرپاقتى سالاماتتى ءومىر سالتىن ۇستانۋعا شاقىرىپ, سپورتقا باۋليتىن ءىس-شارالاردىڭ ماڭىزدى ەكەنىن ەرەكشە اتاپ ءوتتى.
بالعىن بالۋانداردىڭ ەكى كۇنگە سوزىلعان بوز كىلەمدەگى بەلدەسۋلەرى تارتىستى ءوتتى. ارقايسىسى نامىستى قولدان بەرمەۋگە تىرىستى, بار كۇش-جىگەرلەرىن سالدى. اشىق بىرىنشىلىك بولعاندىقتان, بۇل سايىستا 180 سپورتشى 11 سالماق دارەجەسى بويىنشا ءوزارا سىنعا ءتۇستى. ناتيجەسىندە, 44 بالۋان جۇلدەگەر اتانىپ, ولارعا ارنايى دايىندالعان مەدال مەن ماداقتاما قاعازدارى, چەمپيوندىق بەلبەۋلەر مەن ۇلتتىق قۇرامانىڭ كۇرەس فورمالارى تاپسىرىلدى.
اۋداندا العاش رەت وتكىزىلگەن وبلىس دەڭگەيىندەگى جارىستىڭ ۇيىمداستىرىلۋىنا كورەرمەندەر دە ريزاشىلىقتارىن ءبىلدىردى.
– سەمەي قالاسى قۇراماسىنىڭ اعا جاتتىقتىرۋشىسى رەتىندە تۋرنيرگە 40-تان استام جاس بالۋان الىپ كەلدىك. كوكپەكتى اۋدانىندا ەلىمىزدىڭ ماقتانىشى, جاستاردىڭ بوي تۇزەيتىن تەمىرقازىعى داۋلەت تۇرلىحانوۆ ەسىمى ۇلىقتالىپ جاتقانى قۋانتادى. قاجىمۇقان مۇڭايتپاسوۆ, جاقسىلىق ۇشكەمپىروۆ, داۋلەت تۇرلىحانوۆتاي بالۋانداردىڭ ەسىمدەرىن قۇلاعىنا قۇيىپ العان ۇرپاق ەلجاندى بولىپ وسەدى, – دەيدى قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى قايىرتاي ورازالينوۆ.
جارىس سوڭىندا بايراقتى باسەكەنى جوعارى دەڭگەيدە ۇيىمداستىرعان اسلان بالابەك ۇلى وبلىستىق گرەك-ريم, ەركىن كۇرەس جانە ايەلدەر كۇرەسى فەدەراتسياسى توراعاسىنىڭ العىس حاتىمەن ماراپاتتالدى.
شىعىس قازاقستان وبلىسى,
كوكپەكتى اۋدانى
