قۇرىلىس سالاسى ماماندارىنىڭ ايتۋىنشا, جىلجىمايتىن م ۇلىك نارىعىنداعى قىمباتشىلىق – الەمدە بولىپ جاتقان قۇبىلىس. دۇنيە ءجۇزىنىڭ كوپتەگەن مەملەكەتىندە باعانىڭ قىمباتتاۋى بايقالعان. Knight Frank كونسالتينگتىك كومپانياسىنىڭ دەرەكتەرىنە جۇگىنسەك, الەمدەگى تۇرعىن ءۇي قۇرىلىسىنىڭ ورتاشا باعاسى بيىلعى جارتىجىلدىقتا 9,2%-عا وسكەن. بۇل – 2006 جىلدان بەرگى العاشقى ءوسىم ەكەن.
الەمدىك جىلجىمايتىن م ۇلىك سالاسىن سارالاساق, بارىنەن بۇرىن تۇركيادا تۇرعىن ءۇيدىڭ باعاسى ەسەلەپ ارتىپتى. مۇندا ءبىر جىلدىڭ ىشىندە باسپانا قۇنى بىردەن 29,2%-عا شارىقتاعان. وسى ەلدە ريەلتور بولىپ جۇمىس ىستەيتىن جاننا قاسىمباەۆانىڭ ايتۋىنشا, پاندەميا كەزىندە تۇركيادا ءۇي باعاسى 10-15%-عا تومەندەگەن. «الايدا كارانتيندىك شەكتەۋ شارالارى جۇمسارعاندا ءۇيدىڭ باعاسى دا قىمباتتاي باستادى. بىراق باسپانا باعاسى كوتەرىلگەنىمەن وعان سۇرانىس ازايعان جوق. اسىرەسە سوڭعى ءبىر جىلدا جەرورتا تەڭىزى جاعالاۋىنداعى تۇركيا كۋرورتتارى ايماعىنان باسپانا الۋشىلار كۇرت كوبەيدى. ولاردىڭ ىشىندە وتانداستارىمىز دا كوپ», دەيدى ريەلتور.
تۇرعىن ۇيلەردىڭ قىمباتتاۋى جاعىنان ەكىنشى ورىندا جاڭا زەلانديا (+25,9%) تۇر. ءۇشىنشى ورىندا – اقش (+18,6%), سلوۆاكيا (18,6%) جانە شۆەتسيا (17,2%). قىسقاسى, 55 ەلدىڭ 18-ىندە تۇرعىن ءۇيدىڭ ەكى ەسەگە قىمباتتاۋى بايقالعان.
قازاقستاننىڭ تۇرعىن ءۇي نارىعىنداعى باعا دا وسىعان ۇقساس. بيىلعى قازان ايىنداعى كورسەتكىش بويىنشا جاڭا ءۇيدىڭ باعاسى ءبىر جىلدىڭ ىشىندە 14,6%-عا ۇلعايعان, دەپ حابارلايدى Finprom رەسۋرسى.
ەلدە تۇرعىن ءۇي باعاسىنىڭ وسۋىنە قۇرىلىس ماتەريالدارى قۇنىنىڭ شارىقتاۋى باستى سەبەپ بولىپ وتىر. قۇرىلىس سالاسىنىڭ ساراپشىلارى ءۇي سالۋعا قاجەتتى تاۋارلاردىڭ قۇنى اسپانداعانى ءوز الدىنا, ولاردىڭ جەتىسپەۋشىلىگى دە ۇلكەن ماسەلە بولىپ وتىرعانىن ايتادى. «پاندەميا كەزىندە قۇرىلىس قارقىنى اجەپتاۋىر باسەڭدەپ قالعان ەدى. كەيبىر كومپانيالار سالىپ جاتقان قۇرىلىستىڭ باعاسىن تۇسىرۋگە دە ءماجبۇر بولدى. ۇيگە سۇرانىس تا تومەندەپ كەتكەن بولاتىن. بىراق بيىل جىل باسىنان بەرى جاڭا باسپاناعا دەگەن سۇرانىس كۇرت ارتتى. بۇعان جۇرتشىلىقتىڭ زەينەتاقى قورىندا جيناقتالعان ارتىق قاراجاتىن ءۇي ساتىپ الۋعا پايدالانۋى دا اسەر ەتكەن بولۋى كەرەك. ەڭ باستىسى, سۇرانىس ەسەلەپ ارتتى. قۇرىلىس تا قايتا جانداندى. قازىر نۇر-سۇلتان قالاسىندا ءۇيدىڭ باعاسى قىمبات بولسا دا ءوتىپ تۇر. مىسالى, ءبىزدىڭ كومپانيانىڭ بيىل پايدالانۋعا بەرىلگەن ءۇيى ءاپ-ساتتە ساتىلىپ كەتتى. 800-دەي پاتەرى بار تۇرعىن ءۇي كەشەنىنەن ءبىر ءوزى 100-دەن استام پاتەر ساتىپ العان ادام بار. سوندىقتان ماتەريالداردىڭ قىمباتتاۋىنا قاراماستان قۇرىلىس باياۋلامايدى. ويتكەنى ۇيگە دەگەن سۇرانىس بار», دەيدى ەلوردالىق قۇرىلىس كومپانياسىنىڭ تەحنيكالىق ديرەكتورى م.رايحانوۆ. ونىڭ پىكىرىنە قاراعاندا, وسىنداي جوعارى سۇرانىس بار كەزدە باعانىڭ ءتۇسۋى دە ەكىتالاي.
قۇرىلىس شىعىندارىنىڭ باسىم بولىگىن قۇرىلىس ماتەريالدارى الاتىنى بەلگىلى. Nasdaq قور بيرجاسىنىڭ مالىمەتى بويىنشا قۇرىلىس كومپانيالارىنىڭ تاريحىندا بۇرىن-سوڭدى مۇنداي قىمباتتاۋ مەن شىعىندالۋ بولماپتى. تەك شىلدە ايىنىڭ وزىندە ماتەريالداردىڭ باعاسى بىلتىرعىدان 19,4%-عا كوتەرىلگەن. ال ءوندىرۋشى كاسىپورىندار ءوز ونىمدەرىنىڭ باعاسىن 28%-عا قىمباتتاتقان. بۇل – 2021 جىلدىڭ قازان ايىنداعى كورسەتكىش.
قۇرىلىس ماتەريالدارىنىڭ باعاسى, اسىرەسە بيىلعى مامىر ايىندا ەرەكشە وسكەن. اشىق دەرەككوزدەرگە سەنسەك, پلاستيكالىق ماتەريالدار شىعاراتىن كاسىپورىندار ءوز ونىمدەرىنىڭ باعاسىن 13,7%-عا ۇلعايتقان ء(بىر جىلدىڭ ىشىندە). سازدان جاسالعان تاۋارلار – 16,2%-عا, كىرپىش, قىش جابىندار – 18,5%-عا, بەتون باعاسى بىردەن 14,2%-عا ارتقان.
«مەتالدان جاسالعان ماتەريالداردىڭ قۇنى دا اسپانداپ تۇر. مەتاللۋرگيالىق كومپانيالاردىڭ ونىمدەرى 30,9%-عا, قۇبىرلار مەن پروفيلدەر قۇنى 19,8%-عا قىمباتتاعان. ال بۇرىن وسى ماتەريالداردىڭ باعاسى جىلىنا ءارى كەتسە 0,3%-عا عانا وسەتىن», دەيدى ساراپشىلار.
«باسەكەلەستىكتى قورعاۋ جانە دامىتۋ اگەنتتىگى نارىقتاعى قىمباتشىلىقتى بولدىرماۋ ماقساتىندا ءبىرتالاي شارا قابىلداپ جاتقانىن حابارلاعانى ەسىمىزدە. بىراق باعا قۇرىقتالار ەمەس. ويتكەنى قولعا الىنعان شارالاردىڭ ءبارى ۋاقىتشا عانا باعانى توقتاتادى, ودان كەيىن قايتا قىمباتتايدى. بۇعان جىلۋ, جارىقتىڭ, جانار-جاعارمايدىڭ, ديزەل وتىن باعاسىنىڭ ءوسۋى دە ىقپال ەتىپ وتىرعانى انىق. ەندى باعا تۇسەدى دەپ دامەلەنۋدىڭ قاجەتى جوق, تەك نارىقتىڭ وسى زاڭىنا باعىنىپ, وعان بەيىمدەلۋ قامىن جاساۋ كەرەك», دەيدى ساراپشىلار.
