وسىدان ەكى اپتا بۇرىن بەلگراد تورىندە مارەگە جەتكەن بوكستان الەم چەمپيوناتىندا قازاق ەلىنىڭ بىلعارى قولعاپ شەبەرلەرى 2 التىن, 2 كۇمىس جانە 1 قولا مەدال ولجالاپ, جالپىكوماندالىق ەسەپتە كۋبا جىگىتتەرىن العا جىبەرىپ, ەكىنشى ورىنعا تۇراقتاعان ەدى. جاھاندىق دودادا تەمىرتاس ءجۇسىپوۆ (48 كگ) پەن ساكەن بيبوسىنوۆ (51 كگ) الەم چەمپيونى اتانسا, ماحمۇد سابىرحان (54 كگ) مەن سەرىك تەمىرجانوۆ (57 كگ) كۇمىس جۇلدەگە, ۇلتتىق قۇراما كاپيتانى ابىلايحان ءجۇسىپوۆ (67 كگ) قولا جۇلدەگە يە بولدى.
بوكسشىلاردىڭ قارجىلاي سىياقىلارىن قازاقستان بوكس فەدەراتسياسىنىڭ باسشىسى كەڭەس راقىشەۆتىڭ ءوزى تابىستادى. الەم چەمپيونى اتانعان بوكسشىنىڭ ارقايسىسىنا 70 مىڭ دوللار, كۇمىس جۇلدەگەرلەرگە 50 مىڭ دوللار, قولا جۇلدەگەرگە 25 مىڭ دوللار كولەمىندە سىياقى بەرىلدى.
– بوكس – قازاقتىڭ ۇلتتىق سپورتىنىڭ بىرىنە اينالىپ كەتتى دەسەك, ارتىق ايتقاندىق بولمايتىن شىعار. ويتكەنى بۇل سپورت تۇرىنەن بىزدە ءداستۇرلى ۇرپاقتار ساباقتاستىعى بار. بەلگرادتاعى الەم چەمپيوناتىنا كەلسەك, جاڭارتىلعان قۇرام ءساتتى ونەر كورسەتتى. ءبىز العا قويعان مىندەتىمىزدى ورىنداپ, جانكۇيەرلەردىڭ ءۇمىتىن اقتادىق دەپ ەسەپتەيمىن. سپورتشىلارىمىزدى بەلگرادتاعى جەتىستىكتەرىمەن قۇتتىقتايمىن! – دەدى قبف پرەزيدەنتى كەڭەس راقىشەۆ.
سونداي-اق بوكستان ۇلتتىق قۇرامانىڭ جاتتىقتىرۋشىلار قۇرامى, ولاردىڭ جەكە جاتتىقتىرۋشىلارى, كەشەندى عىلىمي توپ ماماندارى جانە الەم چەمپيوناتىندا ونەر كورسەتىپ, بىراق جۇلدەگە ىلىنبەي قالعان بوكسشىلار دا فەدەراتسيا باسشىلىعىنىڭ نازارىنان تىس قالعان جوق.
اتاپ ايتار بولساق, بوكستان ەرلەر قۇراماسىنىڭ باس باپكەرى قايرات ساتجانوۆقا, الەم چەمپيوندارىنىڭ جەكە باپكەرلەرى قۋانىشباي كوكىشەۆ (ت.ءجۇسىپوۆتىڭ باپكەرى) پەن مىرزاعالي ايتجانوۆقا (س.بيبوسىنوۆتىڭ باپكەرى) 10 مىڭ دوللار, كۇمىس جۇلدەگەرلەردىڭ جەكە جاتتىقتىرۋشىلارى ءىلياس ورالبەكوۆ (م.سابىرحاننىڭ باپكەرى) پەن ازامات ماقاجانوۆقا (س.تەمىرجانوۆتىڭ باپكەرى) – 8,5 مىڭ دوللار, قولا جۇلدەگەردىڭ جەكە جاتتىقتىرۋشىسى باۋىرجان امانباەۆقا (ا.ءجۇسىپوۆتىڭ باپكەرى) 5 مىڭ دوللاردان بەرىلدى.
الەم چەمپيوناتىنا قاتىسقان ءساماتالى تولتاەۆ (60 كگ), ءساناتالى تولتاەۆ (63,5 كگ), اسلانبەك شىمبەرگەنوۆ (71 كگ), نۇرقانات رايىس (75 كگ), نۇربەك ورالباي (80 كگ), بەك نۇرماعانبەت (86 كگ), ايبەك ورالباي (92 كگ) جانە نۇرلان ساپاربايلارعا (+92 كگ) 800 مىڭ تەڭگە جانە ولاردىڭ دا جەكە جاتتىقتىرۋشىلارىنا 400 مىڭ تەڭگەدەن سىياقى بەرىلدى.
سونىمەن قاتار ۇلتتىق قۇرامانىڭ اعا جاتتىقتىرۋشىسى نۇركەن انداسوۆ – 7 مىڭ دوللار, كوماندا جەتەكشىسى اسقار ءشارىپوۆ, دارىگەر تالعات كۋكانوۆ جانە ماسساج جاساۋشى الىبەك ءابىلوۆ 2 مىڭ دوللار كولەمىندەگى اقشالاي سىياقىعا يە بولدى.
تاعى ءبىر ايتا كەتەرلىگى, الەم چەمپيوناتىنىڭ التىن مەدالىنە يە بولعان سپورتشىنى مەملەكەت 15 مىڭ دوللارمەن, كۇمىس جۇلدەگەردى 7 مىڭ دوللارمەن, ال قولا جۇلدەگەردى 5 مىڭ دوللارمەن ماراپاتتادى. سىياقىلاردى وليمپيادالىق كوميتەتتىڭ باس حاتشىسى اندرەي كريۋكوۆ الماتىداعى جيىندا سالتاناتتى تۇردە تابىس ەتتى.
– ۇلتتىق وليمپيادالىق كوميتەتتىڭ اتىنان كەڭەس راقىشەۆ باستاعان قازاقستان بوكس فەدەراتسياسىن, باپكەرلەر قۇرامىن جانە سپورتشىلاردى الەم بىرىنشىلىگىنىڭ مەدالدارىمەن قۇتتىقتايمىن. بۇل ناتيجە وليمپيا ويىندارىنان كەيىن فەدەراتسيا قايتا قۇرىلىپ, كادرلىق وزگەرىستەر ەنگىزىلىپ, جاڭا جاتتىقتىرۋشىلار شتابىمەن بىرگە قاتەلىكتەرمەن جۇمىس ىستەپ, قورىتىندى شىعارعانىن كورسەتەدى. بۇل جەڭىستەر ءاربىر وتاندىق جانكۇيەر ءۇشىن ماڭىزدى بولدى, بۇكىل ەل بوكسشىلاردىڭ جەتىستىكتەرىنە قۋاندى. بىراق ءاربىر جەڭىس پەن سپورتتىق جەتىستىكتىڭ ارتىندا ۇلكەن كوماندانىڭ – جاتتىقتىرۋشىلاردىڭ, سپورت دارىگەرلەرىنىڭ, فەدەراتسيانىڭ وراسان زور ەڭبەگى تۇرعانىن اتاپ وتكىم كەلەدى. ءبىز بۇگىن ماراپاتتالاتىن كوماندانىڭ ءار مۇشەسىنىڭ, سونىڭ ىشىندە جەكە باپكەرلەردىڭ, دارىگەرلەردىڭ, ماسساجشىلاردىڭ جانە باسقا مامانداردىڭ ۇلەسىن باعالايمىز, – دەدى اندرەي كريۋكوۆ.
– بارلىق بوكسشىلاردىڭ اتىنان مەملەكەت باسشىسىنا سپورتشىلارعا قولداۋ كورسەتىپ, ەلىمىزدە سپورتتى دامىتۋعا كوڭىل ءبولىپ وتىرعانى ءۇشىن, سونداي-اق جاتتىعۋ جۇمىستارى مەن جارىستارعا قاتىسۋىمىزعا بارلىق جاعدايدى جاساپ, ەل نامىسىن ابىرويمەن قورعاۋعا جىگەرلەندىرىپ وتىرعان ءبىزدىڭ بوكس فەدەراتسيامىز بەن ۇلتتىق وليمپيادالىق كوميتەتكە العىس بىلدىرگىم كەلەدى. ءبىزدىڭ قايسىمىزدى الىپ قاراساڭىز دا, الەم چەمپيوناتىنا تەك جەڭىس ءۇشىن اتتاندىق. ءبارىمىز بىردەي ءۇمىتتى اقتاي الماساق تا, ەل نامىسىن ابىرويمەن قورعادىق دەپ ويلايمىن. قازىرگى تاڭدا سپورتشىلاردىڭ بارىنە جاقسى ناتيجەگە قول جەتكىزۋ ءۇشىن بارلىق جاعداي جاسالعانىن بىلەمىز جانە بۇدان كەيىن جاتتىعۋىمىزدى كۇشەيتىپ, بۇدان دا بيىك بەلەستى باعىندىرىپ, قازاقستاندىقتاردى قۋانتۋعا بارىمىزدى سالامىز. بارشاڭىزدى تاۋەلسىزدىگىمىزدىڭ 30 جىلدىعىمەن قۇتتىقتايمىن! – دەدى بوكستان قۇراما كاپيتانى ابىلايحان ءجۇسىپوۆ.
ايتا كەتەيىك, كەلەسى جىلى بوكسشىلاردى بىرقاتار ءىرى جارىس كۇتىپ تۇر. ولاردىڭ ىشىندەگى ەڭ ماڭىزدىسى – قىركۇيەكتە قىتايدىڭ حانجوۋ قالاسىندا وتەتىن جازعى ازيا ويىندارى.
